,
გარემოს დაცვისა და სოფლის მეურნეობის მინისტრის პირველი მოადგილის, ნინო თანდილაშვილის ხელმძღვანელობით, გარემოს ეროვნულ სააგენტოში, შოვში განვითარებული სტიქიის მიზეზების დადგენასთან დაკავშირებით, სამუშაო შეხვედრა გაიმართა, - ამის შესახებ ინფორმაციას გარემოს დაცვისა და სოფლის მეურნეობის სამინისტრო ავრცელებს.
მათივე ცნობით, გარემოს ეროვნული სააგენტოს სპეციალისტებისგან შემდგარი 6 ჯგუფი სტიქიის ადგილზე რჩება და საველე სამუშაოებს ახორციელებს. პირველადი დასკვნისთვის, სამუშაო ჯგუფებისგან მიღებული ინფორმაციის დამუშავება უწყვეტად მიმდინარეობს.
„ვამუშავებთ და მაქსიმალურ ანალიზს ვუკეთებთ ყველა იმ ინფორმაციას, რაც განვითარდა ხეობაში. საზოგადოებას, ამ ძალიან მძიმე დროს, მაქსიმალურად ზუსტი ინფორმაცია უნდა მიეწოდოს. ჩვენ არც ერთი წუთით მუშაობა არ შეგვიჩერებია. დღეს დილას, ჩვენმა სპეციალისტებმა ხეობა კიდევ ერთხელ დეტალურად დაათვალიერეს. ხვალ უკვე გვექნება დასკვნა, რომელიც ემყარება კონკრეტულ მონაცემებს და ანალიზს. დასკვნას საზოგადოებას ოპერატიულად მივაწვდით.
ამ ეტაპისთვის რაც შემიძლია ვთქვა, არის ის, რომ მყისიერი მოვლენის განვითარებას ჰქონდა ადგილი. ეს არის მყინვარული დნობის პროცესი. მოხდა კლდეზვაური მასისა და მყინვარის ნაწილის ჩამოშლა. პროცესები ხეობაში განვითარდა ძალიან სწრაფად, რასაც თან დაერთო ღვარცოფული და თანმდევი მეწყრული პროცესები. საქმე გვაქვს რამდენიმე ბუნებრივი მოვლენის თანხვედრასთან; საბოლოო ჯამში, მივიღეთ უმძიმესი სურათი. მინდა, კიდევ ერთხელ მოვუწოდო ყველას და ვთხოვო, როდესაც ასეთი რთული ემოციურო ვითარებაა, ჩვენ უნდა მოვუსმინოთ სპეციალისტებს, დავეყრდნოთ მონაცემებს და არ უნდა გავავრცელოთ ისეთი ინფორმაცია, რომელიც საზოგადოებას შეიყვანს შეცდომაში და კიდევ უფრო მეტად დაამძიმებს ისედაც ძალიან მძიმე ემოციურ ფონს. ჩვენი თხოვნა იქნება ყველას მიმართ, გადაუმოწმებელი ინფორმაციის გავრცელებისგან თავი შევიკავოთ. სპეციალისტებს სჭირდებათ დრო იმისათვის, რომ მაქსიმალურად ზუსტი დასკვნა გააკეთონ და სტიქიის მიზეზებთან დაკავშირებულ ყველა კითხვას გავცეთ ამომწურავი პასუხი”, - განაცხადა გარემოს დაცვისა და სოფლის მეურნეობის მინისტრის პირველმა მოადგილემ, ნინო თანდილაშვილმა.
შოვში მეწყერი 3 აგვისტოს ჩამოწვა. ამ დროისთვის არსებული ოფიციალური მონაცემებით, სტიქიის შედეგად 16 ადამიანია დაღუპული, 20 ადამიანს კი ეძებენ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
