USD
EUR
RUB
თბილისი
ფრანგი ბიზნესმენი ჟაკ ფლერი - საქართველოს მთავრობას საჭირო რეფორმების გატარება უჭირს
თარიღი : 07.05.2021 10:13  397

#ინვესტორისხმა - ასე ჰქვია გადაცემა „Forbes კვირის“ ახალ რუბრიკას, რომლის ფარგლებშიც BMG-ის ბელგიელი ჟურნალისტი გიომ მულარტი საქართველოს ბიზნესგარემოზე უცხოელი ინვესტორების მოსაზრებებს თუ შეფასებებს მოისმენს და გაგიზიარებთ.

74 წლის ფრანგი ჟაკ ფლერი ერთ-ერთი მათგანია. მან საქართველო 25 წლის წინ აღმოაჩინა. ის 15 წლის განმავლობაში, "ბორჯომის" სათავეში იყო, შემდეგ - "შატო მუხრანის", ახლა კი აგრო-სამრეწველო სექტორში ოთხ სხვადასხვა კომპანიას მართავს.

ჟაკ ფლერი „Forbes კვირას“ უყვება, რომ პოზიცია, რომელსაც ის დააფიქსირებს, ამ ქვეყანაში შექმნილი რამდენიმე წარმატებული კომპანიისა და აქ გატარებული ოცდახუთწლიანი გამოცდილების შედეგია.

„საქართველოს ერთი უპირატესობა ის არის, რომ განვითარებადი ქვეყანაა. ვგულისხმობ იმას, რომ ჯერ კიდევ არსებობს მრავალი შესაძლებლობა, რაც დასავლეთის ბევრ ქვეყანაში ადვილად მოპოვებადი არ არის. მეწარმისთვის ან მათთვის, ვინც ჩემს მსგავსად ქმნის ახალ პროექტებს, ახალ კომპანიებს, ცალსახა უპირატესობაა გვქონდეს შესაძლებლობა, დავიწყოთ საქმიანობა იმ სფეროში, სადაც ჯერ არავინ პოზიციონირებს. ევროპაში იგივე ინვესტიციის ჩადების შემთხვევაში, უკვე უზარმაზარი კონკურენტები გეყოლებოდათ. აქ არასდროს ჩამვარდნია არანაირი პროექტი, რაც თავისთავად იმის ნიშანია, რომ ქვეყანაში ბევრი რამ განხორციელებადია. მაგალითად, ბოლო ორი წლის განმავლობაში მე შევქმენი ოთხი კომპანია აგრო-სამრეწველო სექტორში. ევროპაში შეძლებდით ოთხი სხვადასხვა ინტერესის სფეროს განვითარებას და ამ მიმართულებებით საქმიანობას?! - ვერ შეძლებდით, ფაქტობრივად, ამის შანსი არ გაქვთ. ქვეყნის ზომა საინტერესოა, რადგან მარტივად შეგიძლია ნებისმიერი ტიპის ხელშეკრულების გაფორმება“, - ამბობს ჟაკ ფლერი.

მისი შეფასებით, აზიისა და ევროპის შუაში ყოფნა საქართველოსთვის დიდი პლიუსია.

„ვისაუბროთ ყოფილი საბჭოთა კავშირის ქვეყნებზე, როგორც პოტენციურ ბაზარზე. საქართველო ცნობილი ქვეყანაა. მას კარგი რეპუტაცია და იმიჯი აქვს. ზაფხულში ჩამოსულ სხვადასხვა ქვეყნის მოქალაქეებს საქართველო მოსწონთ; მოსწონთ კლიმატი, კულტურა და განსაკუთრებით ხალხის სტუმართმოყვარეობა. ბოლო ოთხი წელია საქართველოს თავისუფალი ვაჭრობის ხელშეკრულება აქვს ჩინეთთან ანუ მსოფლიოში ერთ-ერთია, ორი ან სამი ქვეყნიდან, რომელსაც ჩინეთის ბაზარზე თავისუფალი წვდომა აქვს. ასე რომ, როდესაც საქართველოზე ვსაუბრობთ, ეს ერთ-ერთი დიდი უპირატესობაა. მე ელჩის როლს ვთამაშობ. მე ყოველთვის მხარს ვუჭერ საქართველოს, სადაც შემიძლია. თითქოს საქართველოს ვუბრუნებ იმას, რაც ქვეყანამ თავად მომცა ბოლო ოცდახუთი წლის განმავლობაში - ეს არის საშუალება გავაკეთო ბევრი ისეთი რამ, რის გაკეთებასაც საკუთარ ქვეყანაში ვერ შევძლებდი. მე მაქვს ძალიან გამოცდილი ხედვა კულტურის, ხალხისა და ბიზნესის შესახებ. უნდა ითქვას, რომ ყველა იმ ქვეყნიდან, სადაც ოდესმე მიმუშავია, საქართველო არის ყველაზე მეგობრული; საქართველო მუდამ მზადაა ნებისმიერი ადამიანი მიიღოს და სწორედ ესაა მიზეზი, რატომაც ოცდახუთი წლის შემდეგაც აქ ვარ.

როდესაც რაღაცას საქართველოში აკეთებ და წარმატებას მიაღწევ, ქართველი ხდები. ასიმილაციისა და ინტეგრაციის ეს შესაძლებლობა არსებობს, რაც უცხოელი მეწარმისთვის აქ ყოფნას ძალიან საინტერესოს ხდის. ტექნიკური დახმარება ჩემთვის ძალიან მნიშვნელოვანი საკითხია. ამას ინსტიტუტები სერიოზულად არ აღიქვამენ. ეს არის ის, რაც აქ გვჭირდება. უნივერსიტეტში საკმარისი განათლებაა ხალხის მოსამზადებლად, მაგრამ ბევრი პრაქტიკული, მარტივი გამოცდილება გვაკლია. რა თქმა უნდა, მეტი პროგრესია საჭირო. წინა მთავრობა იყო აგრესიული რეფორმატორი და ზოგჯერ მათ პოლიტიკას არ ვეთანხმებოდით, მაგრამ ეს მთავრობა სუსტია რეფორმების განხორციელების შესაძლებლობების მხრივ. თუმცა, ისინი არსებული ბიზნესების ინტერესებს ითვალისწინებენ. წინა მთავრობა აკეთებდა იმას, რაც სურდა. ზოგჯერ ეს ძალიან კარგი იყო. ვფიქრობ, მათ ძალიან კარგად დაიწყეს, თუმცა ამას ქაოსი მოჰყვა. ამ მთავრობას უფრო მეტად უჭირს ქვეყნისთვის საჭირო რეფორმებისა და ცვლილებების წარმოება“, - აცხადებს ჟაკ ფლერი.

სხვა
ინდოეთის ტყის კაცი ჯადავ პაიენგი, ვინც 550 ჰექტარ უნაყოფო მიწაზე მარტომ გააშენა ტყის მასივი

ოთხი ათწლეულის წინ, 16 წლის ჯადავ „მოლაი“ პაიენგმა მდინარე ბრაჰმაპუტრაზე მდებარე, მსოფლიოში უდიდეს კუნძულ მაჯულისზე უამრავი გვალვის გამო დახოცილი გველი ნახა.  მაშინ, ჯერაც ბავშვს, დააინტერესა, ერთ დღეს ადამიანებსაც იგივე ბედი ხომ არ ელოდათ.

ნანახმა იმდენად შეძრა, რომ საკუთარ სახლთან ახლოს მან ნერგების დარგვა დაიწყო. ამ საქმეს მან თავისი სიცოცხლის 40 წელზე მეტი მიუძღვნა; ტყის კაცმა, დაახლოებით 550 ჰექტარ ტერიტორიაზე, სრულიად მარტომ დარგო ხეები.

ჯადავ პაიენგმა თავი დაანება სწავლას, რათა მთელი დრო და ენერგია ტყეების განაშენიანებისთვის დაეთმო. კამეჩებით მოვაჭრის ოჯახში დაბადებული ჯადავი წარმოშობით ინდოეთის ჩრდილო-აღმოსავლეთით მდებარე რეგიონში, ასამში მცხოვრები თემიდანაა.

მან მდინარე ბრაჰმაპუტრას მშრალ, ქვიშიან სანაპიროზე დაიწყო მცენარეების თესლების და ნერგების დარგვა. ადგილობრივები ურჩევდნენ, რომ ისეთი ხის ჯიშები დაერგო, რომლებიც მკაცრ კლიმატურ პირობებს გაუძლებდნენ. თავიდან ჯადავმა 25 ნერგითა და მცირე ოდენობით თესლებით დაიწყო.

ჯადავის ამბავი პირველად 2010 წელს გახდა ცნობილი, როდესაც ჯითუ კალიტამ, ველური ბუნების ფოტოგრაფმა და დამოუკიდებელმა ჟურნალისტმა მისი საქმიანობის შესახებ დაწერა. ამ ფაქტს მალევე საერთაშორისო აღიარება მოჰყვა და მსოფლიოს მრავალი ქვეყნიდან ხალხმა მისი ტყის მოსანახულებლად ჩამოსვლა დაიწყო, სადაც 120-ზე მეტი ფრინველის სახეობა ბინადრობს, მათ შორის მრავალი გადამფრენი ჩიტიც.

ამ ადამიანის ხელით გაშენებულ ტყეში კაზირანგას ტყის ნაკრძალიდან ხშირად ისეთი დიდი ცხოველებიც გადმოდიან, როგორიცაა ვეფხვები და სპილოები. ტყის კაცის თქმით, სპილოების დიდი ჯოგი აქ ყოველწლიურად 3 თვეს ატარებს.

პაიენგი ხეების ნერგების დარგვას ტროპიკული წვიმების დადგომამდე 3 თვით ადრე იწყებს, რომელიც, როგორც წესი ყოველწლიურად, ივნისში იღებს სტარტს. წლის დანარჩენ დროს იგი ტყიდან თესლების შეგროვებას უთმობს.  მისი თქმით, ბრაკონიერები კვლავ რჩებიან მისი ტყის მთავარ საფრთხედ, თუმცა ადგილობრივი სატყეო დეპარტამენტი მას ტყის დაცვაში ეხმარება. ჯადავი ამბობს, რომ აუცილებელია, მომავალ თაობებს ვასწავლოთ ტყის მასივების შემცირებით გამოწვეული საფრთხეების შესახებ. მათ უნდა უყვარდეთ ბუნება. მისი თქმით, ტყეს უკვე შეუძლია საკუთარი თავის მოვლა, თუკი მას ადამიანები არ შეეხებიან.

ტყის მცველს თავისი გამორჩეული წვლილისთვის მიღებული აქვს ინდოეთის ერთ-ერთი უმაღლესი სამოქალაქო ჯილდო, პადმა შრი. მის საყვარელ ტყეს მის პატივსაცემად „მოლაი“ უწოდეს. ამ ადამიანის ისტორია შეტანილია ეკოლოგიურ სასკოლო პროგრამებში, მათ შორის, აშშ-შიც. იგი მიწვეულია მექსიკაში, რათა დაეხმაროს არასამთავრობო ორგანიზაციას Fundacion Azteca, რომლის მიზანია ქვეყანაში 7 მილიონი ხის დარგვა. ის თავის მდიდარ გამოცდილებას მექსიკელებს გაუზიარებს.

 

სრულად
გამოკითხვა
ვინ გაიმარჯვებს რუსეთ - უკრაინის ომში?
ხმის მიცემა
სხვათა შორის

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.