,,ფერდინანდი და იზაბელა, მადლითა ღმრთისათა მეფე კასტილიისა და დედოფალი... გულითადად მიესალმებიან ყოვლად უშფოთველ კონსტანტინე პანკრატიოსს, ქართველთა საუკეთესო და პატივდებულ ხელმწიფეს.
ჩვენ მივიღეთ თქვენი უშფოთველობისაგან გამოგზავნილი წერილები თქვენი პატივდებული, სასულიერო ელჩების, ძმების - ნილოსისა და ზაქარიას მეშვეობით; მათი მეშვეობით ჩვენ ამავდროულად შევიტყვეთ გარკვეული რამ თქვენი სახელით, მათი სიტყვიერი გარდამოცემისგან.
პირველეს ყოვლისა, ჩვენ უზომოდ გვიხარია თქვენი კათოლიკე რწმენის შესახებ შეტყობის და დაცვის გამო; და ამის საპირისპიროდ, ჩვენ ვგრძნობთ მწუხარებას, როცა შევიტყვეთ მათგან აღძვრის, შფოთვისა და საფრთხის შესახებ, რომელსაც ყოველდღიურად განიცდის თქვენი სიმშვიდე. მიუხედავად ამისა, ნებისმიერ ვითარებაში ჩვენ დიდითა დიდებითა ვადიდებთ ღმერთს, ვლოცულობთ, რომ არა მხოლოდ თქვენ, არამედ ყოველი ნათესავი ქრისტიანეთა იხსნას ურწმუნოთაგან, დაგიცვათ და მოგცეთ ძლევა. ჩვენ ეჭვი არ გვეპარება, რომ მოწყალე ღმერთი ამას მოახდენს, თუ თქვენი უშფოთველობა მომავალშიც, ისევე როგორც დღეს, ყველა ღონეს გამოიყენებს და მხურვალე სულით იბრძოლებს კათოლიკური სარწმუნოების დაცვისა და გაძლიერებისთვის. სახელითა ღვთისათა, ჩვენ მარადის ვევედრებით და მოვუწოდებთ თქვენს სიმშვიდეს რათა ესრეთ ქმნათ და არ შეწყვიტოთ ეს ვალდებულება. რაც შეგვეხება ჩვენ, აქამდეც სწორედ ასე ვმოქმედებდით და ღვთის ნებით გავაგრძელეთ მომავალშიც.
ბეთიკაში, ჩვენს ერთ-ერთ ყველაზე გამორჩეულ და მშვენიერ პროვინციაში ღვთის შეწევნით ჩვენ დავიბრუნეთ გრანადის სამეფო, რომელსაც 800 წელი მართავდნენ ლიბიიდან ჩამოსული არაბები, და ჩვენ ვაიძულეთ აგარიანნი გადაეკვეთათ ლიბიის ზღვა. გარდა ამისა, ჩვენ მთლიანად განვდევნეთ ჩვენი სამეფოებიდან და სამფლობელოებიდან ყველა ებრაელი, რომლებიც დახეტიალობდნენ დიდი და დამღუპველი სიმრავლით.
მაგრამ თუკი, როგორც ჩვენ გვსურს და ვიმედოვნებთ, დიადი ღმერთი შეგვეწევა ჩვენს მისწრაფებებში, ჩვენ არავითარ შემთხვევაში არ შევაჩერებთ განზრახვას, რადგან ჩვენს მეფე ფერდინანდს არ აქვს სხვა უფრო ძლიერი სურვილი, ვიდრე თავისი ჯარებით აფრიკაში გადასვლა და მუდმივი ომის წარმოება კათოლიკური რწმენისათვის.
რაც შეეხება თქვენს საჩუქრებს, რომლებიც თქვენმა ელჩებმა გადმოგვცეს თქვენი განკარგულებით, ჩვენ დიდ მადლობას გიხდით თქვენი ადამიანობისთვის. სულიერად მოხარულნი და კმაყოფილნი, ჩვენ, ჩვენს ძალაუფლებას, სახსრებს და შესაძლებლობებს, ჩვენს სამეფოსა და სამფლობელოებს ვაქცევთ თქვენი ღირსების განკარგულებაში და თქვენს სარგებლობაში, კათოლიკური სარწმუნოების ამაღლებისა და გაძლიერებისათვის, რაც შეეხება სხვა საკითხებს, რაზეც თქვენმა ელჩებმა გვითხრეს, ჩვენ ამომწურავად ვუპასუხეთ, დაე შენმა უშფოთველობამ კეთილად ირწმუნოს რასაც გეტყვიან.
დაე, უკვდავმა ღმერთმა დაიცვას და წყალობაყოს თქვენს სამეფო პიროვნებაზე, თქვენს სამფლობელოსა და სახელმწიფოზე."
