„საქართველოს მოქალაქეებისათვის ევროკავშირის შენგენის ზონაში უვიზო რეჟიმის შემოღების შვიდი წლის შემდეგ გერმანიის ხელისუფლებამ მიგრანტების ნაკადის შემცირება გადაწყვიტა“, - ნათქვამია გერმანული სამაუწყებლო კომპანია „დოიჩე ველეს“ (Deutsche Welle) თავის ვებ-გვრდზე გამოქვეყნებულ სტატიაში სათაურით „გერმანიამ ქართველებს პოლიტიკური თავშესაფრის მიღების გზა გაურთულა“. პუბლიკაციაში გადმოცემულია ქართველი მიგრანტების მდგომარეობა გერმანიაში, ასევე შეფასებულია თბილისში გერმანიის შინაგან საქმეთა ფედერალური მინისტრის ნენსი ფეზერის ვიზიტი, რომლის დროსაც ხელი მოეწერა ორმხრივ შეთანხმებას მიგრაციის შესახებ.

გთავაზობთ სტატიას მცირე შემოკლებით:

ბრალდებულებს სახელად ჰქვიათ გივი, სოლომონი, თორნიკე და მიხეილი. მათი ასაკია 31-დან 39 წლამდე. საბრალდებო დასკვნის თანახმად, 2022 წლის ნოემბერ-დეკემბერში მათ ბერლინის ჩრდილოეთ რაიონებში სულ მცირე ხუთი ბინა გაძარცვეს და ნაძარცვს - ძვირფასეულობას, ელექტრონულ აპარატურას და სხვა ნივთებს ყიდდნენ, ხოლო მიღებულ ფულს სამშობლოში გზავნიდნენ, საქართველოში. ახლა ოთხივე განსასჯელთა სკამზე სხედან, ბერლინის საქალაქო სასამართლოში, სადაც  მათ წინააღმდეგ აღძრული სისხლის სამართლის საქმე იხილება.

ეს პირველი მსგავსი შემთხვევა არ არის. 2022 წლის ზაფხულში ბერლინის სასამართლომ სამწლიანი პატიმრობის განაჩენი გამოუტანა საქართველოს მოქალაქეს - 30 წლის ლაშა ბ.-ს, რომელიც ბინებს ძარცვავდა და მთლიანობაში 60 ათასი ევროს ღირებულების ნივთები მოიპარა.

ამასთან, სისხლის სამართლის საქმეების ფედერალური უწყების მონაცემებით, გერმანიაში მყოფი ქართველი ქურდების ნახევარზე მეტს განაცხადი აქვს წარდგენილი... პოლიტიკური თავშესაფრის მიღებაზე.

უვიზო რეჟიმმა თავშესაფრის მიღების მსურველები გაამრავლა

საქართველოს ევროპული მომავალი ბერლინში, ბრიუსელში და თბილისში პოლიტიკოსებს ცოტა სხვადასხვანაირად ჰქონდათ წარმოდგენილი. როცა 2017 წლის 27 მარტიდან ევროკავშირმა ვიზები გააუქმა კავკასიური რესპუბლიკის მოქალაქეებისათვის, ევროპაში იმედოვნებდნენ, რომ ევროპაში უვიზო მოგზაურობა ქართველებს კიდევ უფრო მეტად დაარწმუნებდა დემოკრატიისა და საბაზრო ეკონომიკის უპირატესობაში. მაგრამ ერთი წლის სემდეგ ევროკავშირის ქვეყნებმა, მათ შორის გერმანიამ და შვედეთმა, დაიწყეს ლაპარაკი, რომ შესაძლოა ქართველი მოქალაქეებისათვის უვიზო რეჟიმი გაეუქმებინათ. ამის მიზეზი იყო დამნაშავეობის ზრდა და თავშესაფრის მიღების თხოვნების მატება. ცხადია, გერმანიის საიმიგრაციო უწყებებმა დაიწყეს განაცხადების უარყოფა, რომლის დონემ 99%-ს მიაღწია.

საქართველოსა და გერმანიის მოქალაქეების შემოსავლების მოცულობაში განსხვავება იმდენად მაღალია, რომ ქართველების საკმაოდ დიდ რაოდენობას თავში ეშმაკური აზრი მოუვიდა - საცხოვრებლად გერმანიაში გადასვლა, თანაც გერმანელი გადასახადის გადამხდელთა ხარჯზე. უვიზო რეჟიმის პირველ წელიწადში გერმანიაში თავშესაფრის მთხოვნელთა რაოდენობა, წინა წლებთან შედარებით, სამჯერ გაიზარდა.

უვიზო რეჟიმის ბოროტად გამოყენება ქართველების მიერ

გერმანული კანონები ნებისმიერ უცხოელს პრინციპულ უფლებას აძლევს ქვეყნაში შემოსვლისთანავე პოლიტიკური თავშესაფარი ითხოვოს. მათ, ვინც ასეთი განაცხადი წარადგინა, გერმანია საცხოვრებელი ფართობით და საკვებით უზრუნველყოფს მანამ, სანამ განაცხადის განხილვის პროცესი მიმდინარეობს. შედეგმაც არ დააყოვნა: საერთო საცხოვრებლები ქართველი მიგრანტებით გაივსო, რომლებსაც თავშესაფრის მიღება სურდათ. მათი გათვლები მარტივი იყო: ბევრისთვის მომგებიანი იყო  გერმანულ საერთო საცხოვრებელში ყოფნა, თვეში 400 ევროს მიღება და ლოდინი. გერმანული ბიუროკრატიული მანქანის გამო განაცხადების განხილვა წლობით ჭიანურდებოდა, შესაბამისად, ასევე ხანგრძლივდებოდა ქართველთა ლოდინი, ევროების ყოველთვიური მიღება და ფულის სამშობლოში გადაგზავნა, ნათესავებისათვის.

საბოლოო ჯამში ისეთი სიტუაცია შეიქმნა, რომ მაგალითად, საქსონიაში, ლტოლვილის სტატუსის მიღების პრეტენდენტთა განთავსების ცენტრში მყოფი ყოველი მეხუთე პიროვნება ქართველი იყო. დროის გარკვეულ მონაკვეთში საქართველოს მოქალაქეები პირველ ადგილზე გავიდნენ პოლიტიკური თავშესაფრის თხოვნის თვალსაზრისითაც. ისინი საკმაოდ უცნაურ კამპანიაში აღმოჩნდნენ - ავღანელებს, სირიელებსა და ერაყელებს შორის, თუმცა მათი ქვეყნები, კვკასიური სახელმწიფოსაგან განსხვავებით, ევროკავშირში მიღების პრეტენდენტები არ იყვნენ.

ქართველო მიგრანტებო, ფრთხილად!

2023 წლის 19 დეკემბერს გერმანიის შინაგან საქმეთა ფედერალურმა მინისტრმა ნენსი ფეზერმა და მისმა ქართველმა კოლეგამ ვახტანგ გომელაურმა თბილისში ხელი მოაწერეს შეთანხმებას, რომელიც მთელ რიგ ზომებს ითვალისწინებს ქართველ მიგრანტთა ნაკადის შესამცირებლად - ვთქვათ, საქართველოში საინფორმაციო კამპანიის მოწყობას დევიზით „ქართველებს გერმანიაში თავშესაფრის მიღების მცირე შანსი აქვთ“.

გერმანული პრესის თანახმად, საქართველოს მთავრობა უკვე მჭიდროდ თანამშრომლობს გერმანიასთან იმ ქართველი მოქალაქეების დეპორტაციის საკითხში, რომლებსაც გერმანულმა საიმიგრაციო სტრუქტურებმა თავშესაფრის მიღებაზე უარი უთხრეს და სამშობლოში დაბრუნება „გამოუწერეს“. იგივე ეხება დამნაშავეებად შერაცხულ საქართველოს მოქალაქეებსაც.

გასულ კვირას გერმანიის პარლამენტის ზედა პალატამ - ბუნდესრატმა მიიღო გადაწყვეტილება საქართველოს იმ ქვეყნების სიაში შეტანაზე, რომლებიც უსაფრთხო სახელმწიფოებს წარმოადგენენ. შესაბამისად, ქართველთა განცხადებები სწრაფად იქნება განხილული, მათ უარის ვერდიქტს გამოუტანენ და ასევე სწრაფად მოხდება მათი დეპორტაცია გერმანიიდან. მიმდინარე წლის 11 თვეში, გერმანიის შინაგან საქმეთა სამინისტროს მონაცემებით, გერმანიაში თავშესაფარი საქართველოს 9 ათასმა მოქალაქემ ითხოვა.

პრიორიტეტი - უკრაინელებს...

რა თქმა უნდა, გერმანიიაში თავშესაფრის მიღება სხვა ქვეყნების მოქალაქეებსაც სურთ. საერთო ჯამში, გერმანიას იგივე თხოვნით სხვადასხვა ქვეყნის 304 ათასმა ადამიანმა მიმართა.

მაგრამ იმდენად, რამდენადაც გერმანიაში სხვა ქვეყნიდან ჩასულ მიგრანტებთან ერთად, ერთი მილიონი უკრაინელიც იმყოფება, რომლებსაც ასევე ჭირდებათ საცხოვრებელი ფართობი, გერმანიის ხელისუფლება ყველანაირი ხერხებით ცდილობს შეამციროს არალეგალური მიგრანტების შესვლა თავის ტერიტორიაზე.

წყარო: https://www.dw.com/ru/germania-usloznaet-gruzinam-put-k-poluceniu-ubezisa/a-67768510