«Reuters» (დიდი ბრიტანეთი): გამოკითხვა: „უკრაინისადმი ამერიკული საზოგადოების მხარდაჭერა მცირდება: გამაფრთხილებელი ნიშანი კიევისათვის“

дата: 325

ბრიტანული საინფორმაციო სააგენტო „როიტერი“ (Reuters) თავის ვებ-გვერდზე აქვეყნებს სტატიას სათაურით „უკრაინისადმი ამერიკული საზოგადოების მხარდაჭერა მცირდება: გამაფრთხილებელი ნიშანი კიევისათვის“ (ავტორები - ჯეისონ ლენგი და პატრიცია ზენგერლი).

გთავაზობთ პუბლიკაციის ტექსტს:

ახალი გამოკითხვის თანახმად, რიგით ამერიკელებში უკრაინის შეიარაღებით მხარდაჭერა მცირდება, ამასთან - შეერთებული შტატების ორივე მთავარი პოლიტიკური პარტიის წარმომადგენლებში. ეს გამაფრთხილებელი ნიშანი უნდა იყოს კიევისთვის, რომელიც რუსეთის აგრესიასთან ბრძოლაში ამერიკულ დახმარებას მნიშვნელოვნად ეყრდნობა.

"როიტერის" და "იფსოსის" ერთობლივი კვლევის მიხედვით, რესპონდენტების მხოლოდ 41% ეთანხმება იმას, რომ ვაშინგტონი უკრაინას იარაღით უნდა დაეხმაროს. ორდღიანი გამოკითხვა ოთხშაბათს, 4 ოქტომბერს დასრულდა. კითხვას უარყოფით პასუხს სცემს გამოკითხულ ამერიკელთა 35%, დანარჩენი კი ამბობს, რომ ზუსტად არ იცის.

შეიარაღების მიწოდების მხარდაჭერა წელს მაისიდან შემცირდა. მაშინ დახმარებას ამერიკელების 46% უჭერდა მხარს, 29% კი წინააღმდეგი იყო.

„უკრაინის პრობლემები ჩვენი საქმე არაა და მათში ამერიკა არ უნდა ჩაერიოს“ - ამ თვალსაზრისს მხარს უჭერს დემოკრატების მხარდამჭერთა 34%, ხოლო რესპუბლიკელებისა -დაახლოებით 56%.

გამოკითხვის პარალელურად, ამერიკის კონგრესში განსახილველად ახალი კანონპროექტია შეტანილი, რომლის მიხედვითაც, პრეზიდენტი ჯო ბაიდენი უკრაინის დასახმარებლად, დამატებით $24-მილიარდიანი პაკეტის დამტკიცებას ითხოვს. აქედან $17 მილიარდი თავდაცვის დაფინანსებისთვისაა განკუთვნილი.

ვაშინგტონმა კიევი უკვე უზრუნველყო 44 მილიარდი დოლარის ღირებულების სამხედრო დახმარებით. აქ შედის ათობით ტანკი, ათასობით რაკეტა და მილიონობით საარტილერიო ჭურვი, რომლებიც უკრაინას 2022 წლის თებერვალში, რუსეთის თავდასხმის შემდეგ მიეწოდა.

წელს, ივინისიდან მოყოლებული, უკრაინულმა ძალებმა კონტრშეტევის შედეგად დაიბრუნეს სოფლები და დასახლებები, რომლებიც რუსეთს ჰქონდა ოკუპირებული. წარმატებულ კონტრიერიშში უკრაინელ ჯარისკაცებს ხელს რუსეთის მიერ დანაღმული უზარმაზარი ტერიტორიები უშლის.

უკრაინის ამ მასშტაბით დახმარებას ზოგიერთი რესპუბლიკელი ეწინააღმდეგება, განსაკუთრებით ისინი, ვინც ყოფილ პრეზიდენტ დონალდ ტრამპთან ასოცირდება და მის ხელახლა არჩევას ემხრობა. დახმარება გასული კვირის ბოლოს, კონგრესში მიღებული ბიუჯეტის დაფინანსების კანონპროექტიდან საერთოდ ამოიღეს. კომპრომისის შედეგად, ბოლო მომენტში დამტკიცებული კანონით, კანონმდებლებმა მთავრობის დახურვა აიცილეს თავიდან.

წყარო: https://www.reuters.com/world/us/us-public-support-declines-arming-ukraine-reutersipsos-2023-10-05/

Тбилиси

გლდანის რაიონში სანდრო ახმეტელის (ყოფილი აკაკი ვასაძის) რეაბილიტირებული ქუჩა გაიხსნა

გლდანის რაიონში სანდრო ახმეტელის (ყოფილი აკაკი ვასაძის) რეაბილიტირებული ქუჩა გაიხსნა. პროექტზე ადგილობრივმა გამგეობამ მერიის შესაბამის სამსახურებთან ერთად იმუშავა.

რეაბილიტირებული ქუჩა თბილისის მერმა კახა კალაძემ მერის მოადგილეებთან, ანდრია ბასილაიასთან და ირაკლი ბენდელიანთან ერთად დაათვალიერა.

„გლდანის რაიონში კიდევ ერთი ინფრასტრუქტურული პროექტი დასრულდა. სანდრო ახმეტელის ქუჩაზე, საკმაოდ მძიმე მდგომარეობა იყო. პირველ რიგში, განახლდა მიწისქვეშა კომუნიკაციები, რომელიც ამორტიზებული იყო და სერიოზულ პრობლემას უქმნიდა ტერიტორიაზე არსებულ საცხოვრებელ კორპუსებს. მოეწყო სადრენაჟე სისტემა, სანიაღვრე ქსელი, შეიცვალა წყლის, წყალარინებისა და გაზმომარაგების ქსელები. ყველაფერი, რაც კი აუცილებელი იყო, გამოცვლილია. გარდა ამისა, ელექტროგადამცემი ხაზები მიწისქვეშა კაბელარხებში განთავსდა. პარალელურად, მიმდინარეობს სამი სკვერის სარეაბილიტიაციო სამუშაოები. აქაც ყველაფერი სრულად მოწესრიგდება. ძალიან მიხარია, რომ კიდევ ერთი მნიშვნელოვანი პროექტი განვახორციელეთ“, - განაცხადა კახა კალაძემ.

სამუშაოების ფარგლებში, სრულად შეიცვალა სანიაღვრე ქსელი და 15 000 კვადრატულ მეტრ ფართობზე ასფალტის საფარი დაიგო. გზის საფარის მოწესრიგებამდე, ტერიტორიაზე კომპანია „ჯორჯიან უოთერ ენდ ფაუერმა“ მიწისქვეშა კომუნიკაციები შეცვალა, შესაბამისმა კომპანიებმა კი არსებული ქსელები რეაბილიტაციის შემდეგ, მიწისქვეშა კაბელარხებში განათავსეს.

გარდა ამისა, ახმეტელის ქუჩაზე შპს „თბილსერვის ჯგუფმა“ მოაწყო გარე განათების ქსელი და დამონტაჟდა ენერგოეფექტური LED სანათები. განთავსდა 30 ერთეული დიდი ზომის ნაგავშემკრები კონტეინერი.

ტრანსპორტისა და ურბანული განვითარების სააგენტომ გზის სავალი ნაწილიდან გამოყო საზოგადოებრივი ტრანსპორტისთვის განკუთვნილი ზოლი, დაიხაზა საგზაო მონიშვნები და ზებრა გადასასვლელები, დამონტაჟდა შუქნიშნები და მოეწყო საპარკინგე ადგილები. მოეწყო საზოგადოებრივი ტრანსპორტის მოსაცდელები.

ახმეტელის ქუჩის რეაბილიტაციის ფარგლებში, გამწვანების მასშტაბურ სამუშაოებს გარემოს დაცვის საქალაქო სამსახური ახორციელებს. კერძოდ, გზის მიმდებარედ არსებულ თარგებში, რომელთა საერთო ფართობი 3 700 კვადრატული მეტრია, მოეწყო სარწყავი სისტემები, შეტანილია ნოყიერი მიწის ნაზავი და მიმდინარეობს სხვადასხვა სახეობის ხე-მცენარეების დარგვა. ამ ეტაპზე, დარგულია 419 ძირი მწვანე ნერგი. გარდა ამისა, ტერიტორიაზე დაიგება ბალახის საფარი.

პარალელურად, ხორციელდება გზის მიმდებარედ არსებული სამი სკვერის რეაბილიტაცია. ჯამში, 5 404 კვადრატულ მეტრ ფართობზე უკვე მოეწყო საფეხმავლო ბილიკები, გარე განათებისა და სარწყავი სისტემები, დამონტაჟდება საბავშვო ატრაქციონები და ჩატარდება გამწვანების სამუშაოები.

რეაბილიტაციის პროექტის საერთო ღირებულებამ 5 327 846 ლარი შეადგინა.