ერთი გმირის ისტორია - უფროსი ლეიტენანტი მურმან ჩანქსელიანი

"ერთი გმირის ისტორია" - უფროსი ლეიტენანტი მურმან ჩანქსელიანი

თარიღი: 449

დაიღუპა 1993 წლის 25 სექტემბერს, სოხუმისთვის ბრძოლაში... დაიბადა 1950 წლის 7 მარტს, ლენტეხის რაიონის სოფელ ბავარში. სკოლა დაამთავრა ლენტეხის რაიონში. მოგვიანებით,მისი ოჯახი, საცხოვრებლად გადავიდა ხონის რაიონის სოფელ პატარა კუხში. 1993 წლის 26 ივლისიდან მსახურობდა 21-ე მექანიზებული ბრიგადის მეორე ბატალიონში, ნაღმმტყორცნელთა ასეულის პირველი ოცეულის მეთაურის თანამდებობაზე; 1993 წლის 21 სექტემბერს, საბრძოლო დავალების შესასრულებლად, მივლინებულ იქნა სოხუმში; 1993 წლის 25 სექტემბერს, დაიღუპა სოხუმის ახალ რაიონში, სოხუმის დაცვისათვის წარმოებულ ბრძოლაში.

ლიანა ჩანქსელიანი-მეუღლე _ ‘’30 წლის შემდეგაც არ შემიძლია მურმანზე ცრემლების გარეშე საუბარი... დღემდე გულით ვატარებ იმ დიდ სიყვარულს, რასაც ის ჩვენ გვჩუქნიდა. გადაუჭარბებლად ვიტყვი, რომ ჩემი მეუღლე, გამორჩეული პიროვნება გახლდათ_ წესიერი, ძალიან განათლებული, 3 არაჩვეულებრივი შვილის მოსიყვარულე მამა და ჩემთვის კი_მზრუნველი მეუღლე. სამივე შვილი ისე გავზარდე, რომ უმამობით გამოწვეული უდიდესი ტკივილი, მამაზე მოგონებით, მისი ვაჟკაცობით და გმირული საქციელით ოდნავ მაინც დაეამებინა...

მურმანი და მისი დედმამიშვილები, ბავშვობიდან, რაიონისა და სკოლის ბიბლიოთეკის კარს არ მოშორებიან_ კითხვა უყვარდათ,მთელ დროს წიგნებთან ატარებდნენ. მურმანს განსაკუთრებით უყვარდა საქართველოს ისტორია, თავისი სამშობლოს თითოეული კუთხე; ყველა ისტორიული ძეგლი იცოდა, ამაყობდა თავისი ქვეყნის მდიდარი ისტორიით და ბედნიერი იყო, რომ საქართველოს შვილი გახლდათ! სამშობლოს წინაშე უდიდეს პასუხისმგებლობას გრძნობდა. აფხაზეთში საომარი მოქმედებები რომ დაიწყო, არც კი დაფიქრებულა, ისე მივიდა 21-ე ბრიგადაში, აიღო იარაღი ხელში და ქვეყნის დასაცავად წავიდა. ცრემლიანი ვევედრებოდი_ არ წახვიდე, დარჩი და ბავშვებს მივხედოთ-მეთქი; ‘’სახლში ვერ დავჯდები!.. ჩემი ბიჭების გვერდით უნდა ვიყო, მათ არასოდეს მივატოვებო’’,- მპასუხობდა. თავი გადადებული ჰქონდა, თითქოს... და ასეც დაასრულა თავისი ლამაზი სიცოცხლე!.. როცა მისი შენაერთი სოხუმისთვის საბრძოლველად გაემართა, თანამებრძოლებს ისე გაჰყვა, ჩემთვის არაფერი უთქვამს! ღამის 2 საათზე შეიტყო, რომ სოხუმში მიდიოდა, სახლში არც მოსულა, არ დამემშვიდობა, მამამისთან მივიდა, თავისი ძმა ნახა და უთხრა: “მე, ბიჭებთან ერთად, სოხუმში მივდივარ; ჩემს ოჯახს შენ გიტოვებ, მიმიხედე... ლიანასთან ვერ მივდივარ გამოსამშვიდობებლად და ნურც შენ ეტყვი, რომ სოხუმში წავედი, თორემ, ინერვიულებს. რომ ჩამოვალ, თავად ავუხსნი ყველაფერს...ჩემზე კი, არ იდარდოთ, მშვიდობით დაგიბრუნდებითო.’’ თუმცა, ვეღარ დამიბრუნდა! მე კი დავრჩი ხერხემალში გადატეხილი_ 3 შვილის ამარა, რომელთაგან უფროსი, 14 წლის იყო და პირველმა, სწორედ მან შეიტყო მურმანის დაღუპვის ამბავი. როცა მეუღლის შესახებ ვერაფერი გავიგე, ჩემი უფროსი ვაჟი გავუშვი სამხედრო ნაწილში, რომ იქნებ, რაიმე ინფორმაცია შეეტყო. ხონში იყო სამხედრო ბაზა, მისულა ბავშვი იქ და ჭიშკართან შეკრებილი მეომრები უნახავს; ამ დროს, ავტობუსი ჩამომდგარა, იქიდან გადმოსული ჯარისკაცები, ცრემლებით გადაეხვივნენ, თურმე, ეზოში შეკრებილთ_მურმანი აღარ გვყავსო... ჩემს ბიჭს გაუგია ეს საზარელი ამბავი, გული მოუკვდა, მაგრამ მე არაფერი მითხრა! გაურკვევლობაში ჩავარდნილს, სულ ცრემლებით მქონდა თვალები სავსე. მე რომ ვტიროდი, მომიჯდებოდა გვერდით და ისიც ტიროდა! შენ რაღატომ ტირი, დედი-მეთქი, ვეკითხებოდი და შენ რომ ტირი, გული მიკვდება და ამიტომ ვტირი მეცო... მთელი კვირის განმავლობაში, გულით დაატარებდა ამხელა ტკივილს...

ჩემი ოჯახის უბედურების შესახებ მთელს სოფელს სცოდნია, თურმე, უკვე გადმოსვენებისთვის ემზადებოდნენ, მაგრამ მე არავინ არაფერს მეუბნებოდა... მურმანი, ჩვენს სოფელში, პატარა კუხში დავკრძალეთ. მისი გარდაცვალების შემდეგ, ჩემი ცხოვრება, ერთ დიდ მონატრებად და ცრემლად იქცა, მაგრამ ამ ცრემლებს არავის ვაჩვენებდი_ ლექსებს ვწერდი და ასე ვცდილობდი მონატრების და ტკივილის დაამებას... 8 შვილიშვილი მყავს, მათგან ერთი ვაჟია და ისიც ჩემი მურმანის მოსახელე... 30 წელია, სულ იმის მოლოდინში ვარ, როდის შევხვდები ჩემს მეუღლეს მარადისობაში; ბევრი მაქვს მისთვის სათქმელი...

მინდა, ასევე, მადლობა გადავუხადო ყველაფრისთვის, უპირველეს ყოვლისა კი იმ დიდი სიყვარულისთვის, რაც სამშობლოს და ოჯახის მიმართ ჰქონდა! არ შემიძლია, მადლიერება არ გამოვხატო ვეტერანების საქმეთა სახელმწიფო სამსახურის და პირადად თქვენი_საზოგადოებასთან ურთიერთობის განყოფილების მიმართ იმ ღვაწლისთვის, რომელსაც ასე უშურველად გასწევთ სამშობლოსთვის ბრძოლის ველზე დაცემული გმირების სახელების უკვდავსაყოფად! ‘’

ივანე ჯანჯღავა-თანამებრძოლი_ ‘’მურმანი, ჩვენს შენაერთში, 1992 წლის ბოლოს მოვიდა. 21-ე ბრიგადის მეორე ბატალიონი ხონში იყო დისლოცირებული. მანამდე მონაწილეობა ჰქონდა მიღებული პოზიციურ ბრძოლებში ოჩამჩირეში, კერძოდ, მერკულაში. ოფიცერი გახლდათ. გემზე ჰქონდა სამსახური გავლილი და იქ ჰქონდა მიღებული უფროსი ლეიტენანტის წოდება. 1993 წლის სექტემბრის დასაწყისში, პატაკი დაწერა ჯარიდან წასვლის თაობაზე; ჯერ, გათავისუფლებული არც იყო, როცა სოხუმში ჩვენი ბატალიონის წასვლასთან დაკავშირებით განგაში გამოცხადდა. მურმანი ავიდა კანცელარიაში, გამოითხოვა თავისი პატაკი და დახია: ’’სადაც თქვენ ხართ, მეც იქ ვიქნები ბოლომდეო,’’ თანამებრძოლებს გვითხრა... სოხუმში 1993 წლის 22 სექტემბერს ჩავფრინდით. ორი ბატალიონი ვიყავით ერთად_ 21-ე ბრიგადის მეორე და მესამე ბატალიონი. მებრძოლების ნაწილს მოუწია გუმისთის მიმართულებით წასვლა, ჩვენ კი_სოხუმში, ახალ რაიონში განვლაგდით. მურმანი იმ ჯგუფში იყო, ვისაც ფუნიკულიორის დაცვა დაევალა; შენაერთი იქ მიემართებოდა, როცა მეთაური, ალეკო ლეჟავა დაიჭრა, სწორედ მაშინ დაიღუპა მურმანი_ 1993 წლის 25 სექტემბერს... როგორც ჩვენი თანამებრძოლები ამბობენ, იგი, დაჭრილი მეთაურისა და თანამებრძოლების ბრძოლის ველიდან გამოსაყვანად შევიდა ტყვიების წვიმაში და იქიდან ვეღარ დაბრუნდა!... მას შეეძლო, არ წამოსულიყო საბრძოლო მოქმედებების ზონაში, მით უფრო მაშინ, როცა შეიარაღებული ძალებიდან წასვლაზე პატაკი დაწერილი ჰქონდა, მაგრამ ისეთი ვაჟკაცი იყო, სამშობლოს და თანამებრძოლების ისეთი ერთგული, რომ თანამებრძოლების გვერდით დადგა ბოლომდე! სამშობლოს უკანასკნელ ამოსუნთქვამდე უერთგულა და სიცოცხლეც გაწირა! აფხაზეთში საბრძოლო მოქმედებები რომ დაიწყო, კარგი სამსახური მიატოვა, იარაღი აიღო ხელში და ომში წავიდა_საქართველოსთვის ომში! მურმან ჩანქსელიანი უაღრესად წესიერი, პატიოსანი, გულანთებული პატრიოტი იყო. თავისი ოჯახი და სამშობლო უზომოდ უყვარდა და ეს სიყვარული თავისი სიკვდილითაც დაამტკიცა!’’

მურმან ჩანქსელიანი (სიკვდილის შემდეგ) დაჯილდოვდა მედლით’’მხედრული მამაცობისათვის’’.

ბიზნესი

რას წარმოადგენს ამერიკული BlackRock-ი, რომელიც $10.5 ტრილიონის აქტივებს მართავს?

გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.

ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.

რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?

2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.

აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:

#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)

#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)

#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)

#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)

#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)

#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)

#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)

#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)

#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)

#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)

წყარო:https://bm.ge/

სრულად

გამოკითხვა

ვინ გაიმარჯვებს რუსეთ - უკრაინის ომში?

უკრაინა

რუსეთი

არ მაქვს პასუხი

ხმის მიცემა

სხვათა შორის

მსოფლიოს ისტორიაში, უდიდესი იმპერიები ტერიტორიით(მლნ კვ. კმ): ბრიტანეთი - 35.5 მონღოლეთი - 24.0 რუსეთი - 22.8 ქინგის დინასტია (ჩინეთი) - 14.7 ესპანეთი - 13.7 ხანის დინასტია (ჩინეთი) - 12.5 საფრანგეთი - 11.5 არაბეთი - 11.1 იუანების დინასტია (ჩინეთი) - 11.0 ხიონგნუ - 9.0 ბრაზილია - 8.337 იაპონია - ~8.0 იბერიული კავშირი - 7.1 მინგის დინასტია (ჩინეთი) - 6.5 რაშიდუნების ხალიფატი (არაბეთი) - 6.4 პირველი თურქული სახანო - 6.0 ოქროს ურდო - 6.0 აქემენიანთა ირანი - 5.5 პორტუგალია - 5.5 ტანგის დინასტია (ჩინეთი) - 5.4 მაკედონია - 5.2 ოსმალეთი - 5.2 ჩრდილო იუანის დინასტია (მონღოლეთი) - 5.0 რომის იმპერია - 5.0

Ford, საავტომობილო ბაზრის დომინანტი მაშინ, როდესაც საავტომობილო ბაზარი ჯერ კიდევ ჩამოყალიბების პროცესში იყო, Ford Model T იყო დომინანტი მანქანა. 1916 წლის მონაცემებით, ის მსოფლიოში ყველა ავტომობილის 55%-ს შეადგენდა.

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.

კულტურა

თურქმენეთის დედაქალაქ აშხაბადში შოთა რუსთაველის მემორიალი გაიხსნა

სრულად

ვანი ეტრუსკული ცივილიზაციისადმი მიძღვნილ გამოფენას მასპინძლობს

სრულად

გენიალური ქართველი კინომსახიობის, დოდო აბაშიძის, დაბადებიდან 100 წელი გავიდა

სრულად