ამერიკულ სტუმარ-მასპინძლობაზე გაფიქრებისას, Hilton-ის სახელის გახსენება სრულიად ბუნებრივი მოვლენაა. ბრენდი, რომელიც 100 წელიწადზე მეტია არსებობს, არა მხოლოდ იმითაა ცნობილი, რომ მისი ქსელი მსოფლიო მასშტაბითაა გავრცელებული, არამედ იმითაც, რომ საუკუნეზე მეტია სტუმართმოყვარეობის ინდუსტრიის მნიშვნელოვანი ნაწილია. 

დამფუძნებელი

პირველი სასტუმროს გახსნა კონრად ჰილტონის სახელს უკავშირდება. ეს 1919 წელს მოხდა და მიზნად ტექსასის საუკეთესო სასტუმროდ ფუნქციონირებას ისახავდა. კონრადი 1887 წელს, რვაშვილიან ოჯახში დაიბადა და ბავშვობიდან ამბიციურ პიროვნებად ყალიბდებოდა. მის განათლებაში დიდი წვლილი მიუძღვის დედას, რომელმაც 11 წლის ბიჭი „გოსის” სამხედრო აკადემიაში გაგზავნა.

ამის შემდეგ ის გადავიდა კოლეჯში, სადაც სასულიერო პირები ასწავლიდნენ. უნდა ითქვას, რომ კონრადი საკმაოდ კეთილშობილ ადამიანად ყალიბდებოდა, თუმცა მაინცდამაინც მაღალი აკადემიური მოსწრება არ ჰქონია. ყველაზე მეტად თავი მათემატიკაში გამოიჩინა. პარალელურად, ის ხშირად მონაწილეობდა კლასგარეშე აქტივობებში.

კოლეჯის დასრულების შემდეგ, მშობლიურ ქალაქში რომ დაბრუნდა, ეკონომიკური კრიზისი იყო და დედამ საჭმლის მიწოდების სერვისი შექმნა, რომელშიც კონრადი აქტიურად ჩაერთო, რათა ოჯახს დახმარებოდა. ამ საქმიანობამ მათი ეკონომიკური მდგომარეობა გააუმჯობესა და კონრადი მამის მაღაზიის მართვაშიც ჩაერთო, თუმცა მამა-შვილი განსხვავდებოდა ერთმანეთისგან და კონრადმა მალე დატოვა საოჯახო ბიზნესი.

გადამწყვეტი ღამე

სხვადასხვა სფეროში თვითდამკვიდრების მცდელობის შემდეგ, მათ შორის, პოლიტიკაშიც, კონრადს 1-ელი მსოფლიო ომი და სამხედრო სამსახური წამოეწია. 2 წლის შემდეგ დაბრუნდა ოჯახთან, მამა გარდაეცვალა და მეგობრის რჩევით, ტექსასისკენ გაემართა, სადაც თავისი დანაზოგით ბანკის შეძენას აპირებდა, თუმცა მისი საქმეები აქაც უკუღმა წავიდა, ბოლო წუთში გამყიდველმა ფასი გაზარდა და კონრადმა უარი თქვა ამხელა ფასის გადახდაზე. ის უკვე ოჯახთან დაბრუნებას აპირებდა და ღამის გასათევად The Mobley Hotel-ში გაჩერდა, რომელიც იმ ქალაქში ერთადერთი სასტუმრო იყო. სწორედ ამ ერთმა ღამემ და სასტუმროში გაჩერებამ მოუტანა მას ახალი იდეა – თავისი დანაზოგით ეყიდა სასტუმრო.

Hilton-ის დაარსება

კონრადი გაესაუბრა სასტუმროს მფლობელს და მათ შორის 40000 დოლარის ღირებულების გარიგება შედგა. მან დახმარებისთვის რამდენიმე მეგობარს დაურეკა და სოლიდური სესხი აიღო Cisco ბანკიდან. ქალაქში ერთადერთი და წამყვანი სასტუმრო საკმაოდ მოთხოვნადი იყო და ხალხი საათობით ელოდა თავის რიგს ოთახის მისაღებად. პირველი, რაც კონრადმა გააკეთა, სასადილოს დამატებით ოთახებად გადაკეთება იყო. 

მისი ბიზნესი იმდენად მალე აყვავდა, რომ მან შტატში კიდევ რამდენიმე სასტუმროს გახსნა შეძლო. კერძოდ: დალასში, აბილენში, ვაკოსა და ელ პასოში. საინტერესოა, აღვნიშნოთ, რომ ახალ ფილიალებში ნელ-ნელა ახალი მოწყობილობებიც შედიოდა, მაგალითად, ვაკოს ფილიალი იყო პირველი სასტუმრო, რომელსაც ჰქონდა კონდიციონერი.

1949 წელს, Caribe Hilton Hotel-ის გახსნით, Hilton სასტუმროების პირველი საერთაშორისო ქსელი გახდა პუერტო რიკოში. კიდევ ერთი დიდი წარმატება ეწვიათ 10 წლის შემდეგ, როდესაც San Francisco Airport Hilton გახსნეს. ის ამ ტიპის პირველი სასტუმრო იყო და იმხელა გავლენა იქონია კონკურენტებზე, რომ აეროპორტთან ჩადგმული სასტუმროები დომინოს პრინციპით გავრცელდა.

Hilton დღეს

დღეს Hilton Hotels and Resorts საკულტო, გლობალური ბრენდია 78 ქვეყანაში, რომელიც 600-მდე ძვირადღირებულ სასტუმროს აერთიანებს. წარმატებულ სტუმარ-მასპინძლობასთან ერთად მთელ მსოფლიოში, ბრენდი თავის იმიჯზეც ზრუნავს და სწორედ ამ მიზნით, 2010 წლიდან, რებრენდინგის შედეგად მან ახალი სახელი და ლოგო წარუდგინა საზოგადოებას.

ავტორი: მარიამ გოჩიაშვილი

https://www.marketer.ge