,
საქართველოს ეროვნული ოლიმპიური კომიტეტი ოლიმპიური ნებართვის გარეშე რეკვიზიტების გამოყენებას კრძალავს. აღნიშნულის შესახებ სეოკ-ი საგანგებო განცხადებას ავრცელებს.
კომიტეტში აცხადებენ, რომ იმ შემთხვევაში თუ მონიტორინგის პროცესში უნებართვო აქტივობები გამოვლინდება, კომიტეტი კანონმდებლობით გათვალისწინებულ ზომებს მიმართავს. კერძოდ, დამრღვევ პირებს სასამართლოს წესით აუკრძალავს ნებისმიერ უნებართვო აქტივობას და მოითხოვს დამრღვევი პირების მიერ უნებართვო აქტივობებით მიღებულ შემოსავალს/მოგებას.
საქართველოს ეროვნულ ოლიმპიურ კომიტეტში იმასაც განმარტავენ, რომ ამგვარი შემოსავალი ან მოგება კანონმდებლობით განსაზღვრულ მოცულობაზე მეტი იქნება, სისხლის სამართლებრივი პასუხისმგებლობის დადგომის შესაძლებლობაც არსებობს.
საქართველოს ეროვნული ოლიმპიური კომიტეტის განცხადებას უცვლელად გთავაზობთ:
„როგორც საზოგადოებისათვის ცნობილია, 2024 წლის ზაფხულის ოლიმპიური თამაშები, 2024 წლის 26 ივლისიდან 11 აგვისტომდე პერიოდში, ჩატარდება საფრანგეთის დედაქალაქ პარიზში.
ოლიმპიადის მოახლოვებასთან ერთად, გვსურს, გავავრცელოთ წინამდებარე საჯარო მოწოდება ოლიმპიური რეკვიზიტების უნებართვო გამოყენების აღკვეთის შესახებ.
ოლიმპიური თამაშები წარმოადგენს საერთაშორისო ოლიმპიური კომიტეტის (სოკ-ი), როგორც ოლიმპიური მოძრაობის წამყვანი ხელმძღვანელი ორგანოს ექსკლუზიურ საკუთრებას, რომელიც ყოველგვარი შეზღუდვის გარეშე ფლობს მასთან დაკავშირებულ ყველა უფლებას, რაც ითვალისწინებს ნებისმიერი არსებული ან მომავალში შემუშავებული ფორმით და საშუალებით მათ ორგანიზების, ჩატარების, მართვის, მაუწყებლობის, ჩაწერის, წარმომადგენლობის, რეპროდუქციის და გავრცელების უფლებებს. შესაბამისად, ყველა უფლება ნებისმიერ ოლიმპიურ რეკვიზიტზე (ოლიმპიური სიმბოლო, დროშა, დევიზი, ჰიმნი და აღნიშვნები (რაც მოიცავს, მაგრამ არ შემოიფარგლება „ოლიმპიური თამაშებით,” „ოლიმპიადის თამაშებით” და ა.შ.), ნიშნები, ემბლემები, დროშები და ჩირაღდნები) და მათ გამოყენებაზე, ეკუთვნის ექსკლუზიურად სოკ-ს, რაც მოიცავს მაგრამ არ შემოიფარგლება მათი გამოყენებით ნებისმიერი მოგების მიღების, კომერციული და სარეკლამო მიზნებით.
ააიპ საქართველოს ეროვნული ოლიმპიური კომიტეტი (სეოკ-ი), რომელიც საქართველოს ტერიტორიაზე წარმოადგენს სოკ-ს, აქტიურ მონიტორინგს უწევს და აკონტროლებს ოლიმპიური ღონისძიებების და/ან მონაწილეების შესახებ და მათთან დაკავშირებით ნებისმიერი საშუალებითა და ფორმით (იქნება ეს ზეპირად თუ წერილობით) ინფორმაციის გავრცელებას და/ან, შეუზღუდავად, ოლიმპიური სიმბოლოების, ოლიმპიური თამაშების ემბლემების, პიქტოგრამების, გრაფიკული გამოსახულებების, ოლიმპიური ნაკრებების ნებისმიერი ემბლემის და/ან ლოგოს, სიტყვების („ოლიმპიური“, „ოლიმპიადა“, „ოლიმპიური თამაშები“ და ა.შ.), მასპინძელი ქალაქების სახელების, ოლიმპიური ღონისძიებების და/ან მონაწილეების ლოგოს, დროშის, გამოსახულების, სახელის, სპორტული ტიტულის, წლების, სავაჭრო ნიშნების და/ან შესაბამისი კანონმდებლობით და/ან სხვაგვარი ფორმით დაცული სასაქონლო ნიშნების, დასახელებების, დევიზების და/ან ნებისმიერი სხვა სახის სიმბოლოს, გამოსახულების, ნიმუშის, სიტყვის, გამოთქმის, გამონათქვამის და ა.შ. გამოყენებას, მათ შორის, შეუზღუდავად, ნებისმიერ პირდაპირ და/ან არაპირდაპირ სარეკლამო/მარკეტინგულ აქტივობას, პოპულარიზაციის ნებისმიერ ფორმას, მაგალითად, სოციალურ მედიასა და სოციალურ ქსელში, ბილბორდებზე, ტელევიზიით, რადიოთი, ბეჭდვით თუ ონლაინ სივრცეებში, შეტყობინებებს/აქციებს (მიუხედავად იმისა იქნება ფასიანი თუ უფასო), ტრადიციულ რეკლამას/PR-ს (პირადი გამოსვლებისა და პრეს-რელიზების ჩათვლით), მათ შორის, ნებისმიერ პროდუქტზე/სავაჭრო სივრცეში და ა.შ.
ამდენად, გთხოვთ, გაითვალისწინოთ, რომ ნებისმიერი პირის მხრიდან ნებისმიერი ზემოაღნიშნული აქტივობა, მათ შორის, ერთმნიშვნელოვნად, ოლიმპიური რეკვიზიტების გამოყენება დაიშვება მხოლოდ სოკ-ის პრინციპების/წესების შესაბამისად და აღნიშნულის წინასწარ, სეოკ-ისგან ნებართვის მიღების და მასთან შეთანხმების გზით.
სეოკ-ი იმედს იტოვებს, რომ წინამდებარე განცხადების გამოქვეყნებით, ინფორმაცია მიეწოდებათ სათანადო პირებს და ისინი იმოქმედებენ სეოკ-ის ნებართვის შესაბამისად ან/და განცხადების გაცნობიდან უმოკლეს ვადებში, უზრუნველყოფენ უკანონო მოქმედებების აღკვეთას.
ამასთან, სეოკ-ი განაგრძობს აქტიური მონიტორინგს და დარღვევების გამოვლენის შემთხვევაში, დაუყოვნებლივ მიმართავს კანონმდებლობით გათვალისწინებულ ზომებს. კერძოდ, დამრღვევ პირებს სასამართლოს წესით აუკრძალავს ნებისმიერ უნებართვო აქტივობას და მოითხოვს დამრღვევი პირების მიერ უნებართვო აქტივობებით მიღებულ შემოსავალს/მოგებას. ამასთან, თუ ამგვარი შემოსავალი/მოგება აღემატება კანონმდებლობით განსაზღვრულ მოცულობას, შესაძლებელია დადგეს სისხლის-სამართლებრივი პასუხისმგებლობის საკითხიც“, - ნათქვამია საგანგებო განცხადებაში.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
