გერმანული გაზეთი „ბერლინერ ცაიტუნგი“ (Berliner Zeitung) ეხმაურება ახლო აღმოსავლეთში დაწყებულ სამხედრო-პოლიტიკურ კრიზისს და აქვეყნებს სტატიას სათაურით „ჰამასი“ ისრაელში ქაოსს იწვევს, პუტინი კი სარგებელს იღებს“ (ავტორი - მაიკლ ბაკფიში).

გთავაზობთ პუბლიკაციას მცირე შემოკლებით:

ის, რაც ახლო აღმოსავლეთს ომს საშიშს და სახიფათოს ხდის, არის „ჰამასისა“ და „ჰეზბოლას“ დამოკიდებულება ირანზე - ფინანსური და სამხედრო თვალსაზრისით. თავის მხრივ, ირანელი მოლებისა და აიათოლების რეჟიმი მხარს უჭერს სტრატეგიულ „ძმობა-მეგობრობას“ რუსეთთან. თეირანი მოსკოვს დიდი რაოდენობით „შაჰედებს“ - უპილოტო საფრენ აპარატებს (დრონებს) აწვდის, რომლებიც უკრაინის ქალაქებს და ელექტროსადგურებს დიდ ზიანს აყენებენ.

„არ არსებობს რაიმე დადასტურება იმისა, რომ ვლადიმერ პუტინს პირდაპირი დამოკიდებულება აქვს ისრაელზე „ჰამასის“ შეტევის მიმართ, მაგრამ თუ ირანი რაღაც მომენტში სამხედრო ჩარევას გადაწყვეტდა, თეირანი, ალბათ, მოსკოვიდან გარკვეულ მხარდაჭერას აუცილებლად მიიღებდა - უკიდურეს შემთხვევაში, პოლიტიკურს მაინც.

ახლოაღმოსავლური კრიზისი: უკრაინა უყურადღებოდ?

ვლადიმერ პუტინს ადრე ღია ანტიისრაელური პოლიტიკა არ გაუტარებია. მან რამდენჯერმე მიიღო კრემლში ისრაელის პრემიერ-მინისტრი ბენიამინ ნეთანიაჰუ. რუსეთის პრეზიდენტი მდუმარედ ითმენდა ისრაელის თავდასხმებს სირიაში მყოფ ირანელ სამხედრო სპეციალურ ქვედანაყოფებზე, მაგრამ დღეს ვლადიმერ პუტინი უდიდეს სარგებელს იღებს ებრაელებისა და არაბებების შეტაკებიდან. ახლო აღმოსავლეთში გაჩაღებული ახალი ომი დასავლეთის ყურადღებას მთლიანად „შთანთქავს“ და ამრიგად, უკრაინა გვერდზე რჩება, კიევზე ყურადღების ფოკუსირება აღარ ხდება.

აშშ-ის პრეზიდენტმა ჯო ბაიდენმა, როგორც ყოველთვის, ისრაელს მტკიცე და განუხრელი თანადგომა გამოუცხადა. ამერიკა ისრაელისათვის დამცავი ფარის როლს ასრულებს და იერუსალიმს ყოველთვის უყოყმანოდ ეხმარება. აქედან გამომდინარე, ნათელი ხდება ვლადიმერ პუტინის გათვლა: ერთდროულად ორ ომში მონაწილეობა აშშ-ის საზოგადოებისთვის ერთობ მძიმე გამოცდა იქნებოდა. და თუ მართლაც ასე მოხდება, ამერიკისათვის უპირველესი საზრუნავი ისრაელი იქნებოდა, უკრაინა კი მეორეხარისხოვან საქმედ გადაიქცეოდა.

„ყველაფერი დასავლეთის ბრალია“

აშშ-ის ომის შემსწავლელი ინსტიტუტის (ISW) მონაცემების მიხედვით, კრემლი უკვე ბრალს სდებს დასავლეთს საინფორმაციო კამპანიის ესკალაციაში და ცდილობს ახლო აღმოსავლეთში გაჩენილ ახალ კრიზისში პასუხისმგებლობა მას დააკისროს.

რუსეთის ყოფილმა პრეზიდენტმა, ამჟამად კი უშიშროების საბჭოს თავმჯდომარის მოადგილემ დიმიტრი მედვედევმა თავის „ტელეგრამ-არხში“ ებრაელებსა და არაბებს შორის დაწყებულ კონფლიქტში პასუხისმგებლობა ამერიკასა და მის მოკავშირეებს დააკისრა და აღნიშნა, რომ ვაშინგტონს მეტი ყურადღება ახლოაღმოსავლურ კრიზისზე უნდა გაემახვილებინა და არა უკრაინაზე. სწორედ უკრაინისადმი გადაჭარბებული ზრუნვის გამო თეთრმა სახლმა „ჰამასელების“ განზრახვებს თვალი ჯეროვნად ვეღარ მიადევნა. „უმჯობესი იყო, რომ ვაშინგტონს და მის მოკავშირეებს ახლო აღმოსავლეთის საქმეები გაერჩიათ, ამის ნაცვლად კი ეს იდიოტები რუსეთის საქმეებში ჩაერივნენ“, - წერს დიმიტრი მედვედევი.

რუსეთის პოლიტიკა: პალესტინაც და ისრაელიც...

რუსეთს ახლო აღმოსავლეთში ისტორიულად მჭიდრო კვშირები აქვს. ჯერ კიდევ საბჭოთა კავშირის დროიდან მოყოლებული, მოსკოვს პალესტინელებთან და არაბულ გასამხედროებულ [ტერორისტულ] მოძრაობა „ჰამასთან“ საკმაოდ ახლო კონტაქტები აქვს. სხვათა შორის, საგარეო საქმეთა მინისტრის სერგეი ლავროვის მოადგილე მიხეილ ბოგდანოვი მიმდინარე წელს რამდენჯერმე შეხვდა „ჰამასის“ წარმომადგენლებს. კაცმა რომ თქვას, კრემლი ზოგადად ორივე მხარესთან ურთიერთობებს ინარჩუნებს, მაგრამ ზოგჯერ არაბებისკენ იხრება ხოლმე: სწორედ ამიტომაც გასაკვირი არ არის რუსეთის განცხადება, რომლის თანახმად, კრიზისი მხოლოდ პალესტინის დამოუკიდებლობის ცნობით გადაწყდება, ანუ ორი სახელმწიფოს - ისრაელისა და პალესტინის არსებობის აღიარებით.

წყარო: https://www.morgenpost.de/politik/article239754899/israel-hamas-gaza-putin-russland-ukraine-usa.html