,
სოჭში ვლადიმირ პუტინთან გამართული შეხვედრის შემდეგ, თურქეთის პრეზიდენტმა, რეჯეფ თაიფ ერდოღანმა განაცხადა, რომ უკრაინამ უნდა შეარბილოს თავისი პოზიცია მარცვლეულის შეთანხმების აღდგენის შესახებ მოლაპარაკებებში. ინფორმაციას ამის შესახებ ბრიტანული გამოცემა The Guardian-ი ავრცელებს.
„უკრაინამ განსაკუთრებით უნდა შეარბილოს თავისი მიდგომები, რათა შესაძლებელი იყოს რუსეთთან ერთობლივი ნაბიჯების გადადგმა“, - განუცხადა ერდოღანმა ჟურნალისტებს.
ერდოღანმა აღნიშნა, რომ თურქეთი მზად არის, თავისი წვლილი შეიტანოს, რომ რუსეთსა და უკრაინას პირდაპირი მოლაპარაკებები ჰქონდეთ.
თავის მხრივ, რუსეთის პრეზიდენტმა, ვლადიმირ პუტინმა განაცხადა, რომ რუსეთი დაუყოვნებლივ აღადგენს შავი ზღვის მარცვლეულის შეთანხმებას, როგორც კი მისთვის მიცემული დაპირებები შესრულდება.
რეჯეფ თაიფ ერდოღანის განცხადებით, ანკარასა და მოსკოვს შორის არსებული მჭიდრო ურთიერთობები რეგიონული პრობლემების გადაწყვეტის ერთ-ერთ გზას წარმოადგენს.
"შეხვედრაზე რეგიონული პროცესები განვიხილეთ. ჩვენი მჭიდრო კონტაქტი რუსეთთან რეგიონული და გლობალური პრობლემების გადაწყვეტას შეუწყობს ხელს. ანკარა კვლავ აცხადებს, რომ მზად არის, შუამავლის როლი ითამაშოს უკრაინაში შექმნილ სიტუაციასთან დაკავშირებით, რადგან რეგიონში სტაბილურობის უზრუნველყოფით არის დაინტერესებული", - განაცხადა ერდოღანმა.
თურქეთის პრეზიდენტის განცხადებით, შეხვედრაზე საუბარი, ასევე, ქალაქ სინოპში ატომური ელექტროსადგურის მშენებლობასაც შეეხო, რომელშიც რუსი სპეციალისტები მიიღებენ მონაწილეობას.
შეგახსენებთ, რომ თურქეთში რუსი ინჟინრების მონაწილეობით უკვე შენდება აქუიუს ატომური ელექტროსადგური.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
