გერმანული გაზეთი „ტაგესშპიგელი“ (Der Tagesspiegel) აქვეყნებს სტატიას სათაურით „ბერლინში ვიზიტის წინ. გერმანელი „მწვანე“ პოლიტიკოსი ანტონ ჰოფრაიტერი თბილისს აკრიტიკებს: „საქართველოს მომავალი ევროკავშირში სასწორზეა დადებული“ (ავტორი - ალბრეხტ მაიერი). მასალაში განხილულია ის სიტუაცია, რომელიც საქართველო-გერმანიის ურთიერთობებშია შექმნილი, პრემიერ-მინისტრ ირაკლი კობახიძის ბერლინში ვიზიტის წინ.
გთავაზობთ პუბლიკაციას მცირეოდენი შემოკლებით:
დღეს, პარასკევს, გერმანიის კანცლერი ოლაფ შოლცი იღებს სტუმარს იმ ქვეყნიდან, რომლის მოსახლეობის უმეტესობა ევროკავშრში გაწევრიანების სურვილს გამოხატავს. ამასთან, საქართველოს პრემიერის ვიზიტი დაჩრდილულია თბილისში მიმდინარე [ანტისამთავრობო] დემონსტრაციებით, რომლის მიზეზია მმართველი პარტიის მიერ ინიცირებული საკმაოდ წინააღმდეგობრივი კანონპროექტი „უცხოელი აგენტების შესახებ“. კრიტიკოსები მთავრობას საყვედურობენ და ამხელენ, რომ კანონპროექტი რუსეთის ინტერესებს ემსახურება.
„ქართული ოცნება“ სამოქალაქო საზოგადოებას ემუქრება...“
„თავისი ბოლო კანონპროექტით პარტია „ქართული ოცნება“ ისევ ცდილობს სამოქალაქო საზოგადოების დისკრედიტაციასა და დაშინებას“, - აცხადებს გერმანიის „მწვანეთა პარტიის წარმომადგენელი, ბუნდესტაგის ევროპული კომიტეტის თავმჯდომარე ანტონ ჰოფრაიტერი „ტაგესშპიგელთან“ ინტერვიუში, - ამრიგად, საქართველოს მთავრობა საფრთხეს უქმნის ქვეყნის მომავალს - ევროკავშირში გაწევრიანებას“.
„ვიმედოვნებ, რომ კანცლერი ოლაფ შოლცი მკაფიოდ განუცხადებს საქართველოს მთავრობის მეთაურს, თუ როგორი სავარაუდო საფრთხე ემუქრება ქვეყნის ევროპულ პერსპექტივას. გერმანია მხარს უჭერს ქართულ სამოქალაქო საზოგადოებას და ყველა იმ ადამიანს, რომელიც ქვეყნის ევროპული გზის მომხრეს წარმოადგენს“, - ხაზს უსვამს ანტონ ჰოფრაიტერი.
ოლაფ შოლცის გარდა, ირაკლი კობახიძეს დაგეგმილია აქვს ბერლინში შეხვდეს გერმანიის ფედერალურ პრეზიდენტს ფრანკ-ვალტერ შტაინმაიერს და ბუნდესტაგის თავმჯდომარეს ბერბელ ბასს.
საქართველო და ევროკავშირი: ჯერ მხოლოდ კანდიდატის სტატუსი
უკრაინაში რუსეთის არმიის შეჭრის შემდეგ საქართველომ - კავკასიურმა სახელმწიფომ - გააქტიურა თავისი ძალისხმევა ევროკავშირის წევრად მიღების მიზნით, თუმცა ჯერ-ჯერობით ამ საქმეში რაიმე დიდი პროგრესი მიღწეული არ არის: ევროკავშირის სამიტზე, გასული წლის დეკემბრის ბოლოს, გადაწყდა, რომ გაწევრიანებისათვის მოლაპარაკება დაიწყება მხოლოდ უკრაინასა და მოლდოვასთან. საქართველო ჯერ-ჯერობით კანდიდატის სტატუსით რჩება.
ევროკავშირის ყოყმანი გამოწვეულია საქართველოს მმართველი პარტიის „ქართული ოცნების“ და თვითონ პრემიერ-მინისტრ ირაკლი კობახიძის მყიფე კურსით ევროკავშირთან და რუსეთთან დამოკიდებულების გამო.
ერთი მხრივ, ირაკლი კობახიძე აცხადებს, რომ მისი პრიორიტეტია საქართველოს შესვლა ევროკავშირში და ნატოში, მაგრამ მეორე მხრივ, მთავრობის მეთაური კიდევ ერთხელ ცდილობს სამოქალაქო საზოგადოებაზე გავლენის მოხდენას და ამ მიზნით სარგებლობს წინააღმდეგობრივი ხასიათის მქონე კანინპროექტით, რომელიც მიმართულია საქართველოში უცხოური გავლენების აღსაკვეთად.
ქართული კანონპროექტის ჩრდილოვანი მხარეები
გასულ წელს თბილისის მთავრობამ, მასობრივი საპროტესტო აქციების გამო, აღნიშნული კანონპროექტი უკან გაიწვია. სხვათა შორის, ანალოგიური კანონი მოქმედებს რუსეთშიც ე.წ. „უცხოელი აგენტების“ წინააღმდეგ. მისი ძირითადი მიზანია ხელი შეუშალოს და გადაუკეტოს ფინანსების მიღების წყაროები საზოგადოებისათვის კრიტიკულად მნიშვნელოვან არასამთავრობო ორგანიზაციებს. ამ კანონის საფუძველზე რუსეთის უმაღლესმა სასამართლომ აკრძალა უფლებადამცველი ორგანიზაციის „მემორიალის“ საქმიანობა 2021 წელს.
საქართველოს შემთხვევაში, მმართველი პარტიის „ქართული ოცნების“ მიერ შემუშავებული კანონპროექტი გულისხმობს, რომ ის საზოგადოებრივი არასამთავრობო ორგანიზაციები, რომლებიც საზღვარგარეთიდან თავიანთი დაფინანსების 20%-ზე მეტს იღებენ, რეგისტრირებულნი უნდა იყვნენ როგორც „უცხოური სახელმწიფოს ინტერესების დამცველი ორგანიზაციები“.
რასაკვირველია, გერმანიის ფედერალური მთავრობა საქმის კურსშია, რომ ირაკლი კობახიძე, რომელიც პრემიერ-მინისტრის პოსტს მიმდინარე წლის თებერვლიდან ფლობს, გეგმავს შარშან პარლამენტიდან უკან გაწვეულ კანონის გადახედვას. გასულ კვირას, საგარეო საქმეთა ფედერალურმა სამინისტრომ განაცხადა, რომ ევროკავშირელ პარტნიორებს შორის განხილული იქნება საპასუხო ზომები იმ შემთხვევისათვის, თუ საქართველოს ხელისუფლება კანონპროექტის მიღებას (ან მის მოქმედებას) არ შეაჩერებს.
ევროკავშირის საგარეოპოლიტიკურმა უწყებამ საქართველოს მთავრობა შარშან, 2023 წელსაც გააკრიტიკა, რადგან ხელისუფლება, მარტის თვეში გამართული მასობრივი პროტესტების მიუხედავად, მაინც [სადაო] კანონპროექტის პრინციპების ერთგული დარჩა. „სამოქალაქო ორგანიზაციებისადმი მხარდაჭერა და მასმედიის თავისუფლების დაცვა არა მხოლოდ დემოკრატიის განუყოფელ ნაწილს წარმოადგენს, არამედ ევროკავშირში გაწევრიანების პროცესის ცენტრალურ ელემენტსაც“, - ნათქვამია განცხადებაში.
გლობალური ფინანსური ქსოვილი სხვადასხვა ტიპის კომპანიების ურთიერთქმედებაზე დგას. ფინანსურ ეკოსისტემაში ვხვდებით, როგორც ბანკებს, ასევე ნეობანკებს და ფინტექ-კომპანიებს, საპენსიო ფონდებს, საგადახდო სერვისების მიმწოდებელ ორგანიზაციებს, კერძო კაპიტალის მმართველებს, ჰეჯ-ფონდებსა და აქტივების მმართველ კომპანიებს. აი, სწორედ ამ ბოლო კატეგორიას განეკუთვნება ამერიკული BlackRock-ი, რომელიც სხვა ადამიანებისა და კომპანიების აქტივებს მართავს, ანუ მარტივად რომ ვთქვათ, ინვესტიციას მათ ნაცვლად დებს. გამართული ბიზნესმოდელის გარდა, ამერიკულ კორპორაციას მაღალი რეპუტაცია, ინვესტორებისთვის ფინანსური სარგებლის გენერირების დეკადების განმავლობაში დამტკიცებული შედეგები და პლანეტარული მასშტაბის კავშირები გამოარჩევს.
ამ ყველაფრის დამსახურებით, BlackRock-ი პლანეტის უდიდეს აქტივების მმართველ კომპანიად იქცა, რომლის პორტფელი, ბოლო შედეგებით, $10.5 ტრილიონად იყო შეფასებული. 2024 წლის პირველი კვარტალის ფინანსური ანგარიშის თანახმად, გასულ ერთ წელიწადში, ამერიკულმა კორპორაციამ აქტივების ზომა $1.4 ტრილიონით გაზარდა. ამ თანხის მასშტაბს რომ მიხვდეთ, გეტყვით, რომ მექსიკის მთლიანი შიდა პროდუქტი სწორედ $1.4 ტრილიონია, როცა ესპანეთის, ინდონეზიის და საუდის არაბეთის - ნაკლები. თუმცა BlackRock-ის ჯამური აქტივების ზომა უფრო შთამბეჭდავია, რადგან ამ მაჩვენებელს ქვეყნების მშპ-სთან თუ შევაფარდებთ, აღმოვაჩენთ, რომ მას მხოლოდ ამერიკის შეერთებული შტატები და ჩინეთი უსწრებს.
რა შემოსავალს და წმინდა მოგებას აგენერირებს BlackRock-ი $10.5 ტრილიონად შეფასებული აქტივების მართვით?
2024 წლის I კვარტალში, BlackRock-მა $4.7 მილიარდის შემოსავალი მიიღო, რაც 11%-ით მეტია, ვიდრე შარშან. შემოსავალთან ერთად, ბოლო პერიოდში მკვეთრად, კერძოდ 36%-ითაა გაზრდილი კომპანიის წმინდა მოგება, რომელმაც მიმდინარე წლის პირველ სამ თვეში $1.5 მილიარდი შეადგინა. აღნიშნულ მაჩვენებლებს, უმეტესწილად, ის ფინანსური ინსტრუმენტები აგენერირებენ, რომელთაც BlackRock-ის პორტფელში ვხვდებით - აქ იგულისხმება, როგორც კომპანიების კაპიტალი, ანუ აქციები, ასევე ფიზიკური აქტივები, მათ შორის უძრავი ქონება.
აქციების კუთხით, BlackRock-ის აქტივებს შორის ყველაზე დიდი წილი მსოფლიოს უდიდეს ტექნოლოგიურ, ფარმაკოლოგიურ და ფინანსურ კომპანიებზე მოდის. BlackRock-ის აქციების პორტფელის ათი უდიდესი პოზიცია კი, შემდეგნაირად გამოიყურება:
#1 - Microsoft - $229.7 მილიარდად შეფასებული 542.02 მილიონი აქცია (BlackRock-ის პორტფელის 5.37%)
#2 - Apple - $178.4 მილიარდად შეფასებული 1.04 მილიარდი აქცია (BlackRock-ის პორტფელის 4.17%)
#3 - NVIDIA - $164.66 მილიარდად შეფასებული 182.42 მილიონი აქცია (BlackRock-ის პორტფელის 3.85%)
#4- Amazon - $115.18 მილიარდად შეფასებული 638.54 მილიონი აქცია (BlackRock-ის პორტფელის 2.69%)
#5 - META - $77.18 მილიარდად შეფასებული 158.94 მილიონი აქცია (BlackRock-ის პორტფელის 1.8%)
#6 - Alphabet (Class A) - $62.77 მილიარდად შეფასებული 415.9 მილიონი აქცია (BlackRock-ის პორტფელის 1.47%)
#7 - Alphabet (Class C) - $54.11 მილიარდად შეფასებული 355.37 მილიონი აქცია (BlackRock-ის პორტფელის 1.27%)
#8 - Eli Lilly - $50.78 მილიარდად შეფასებული 65.27 მილიონი აქცია (BlackRock-ის პორტფელის 1.19%)
#9 - Broadcom - $46.27 მილიარდად შეფასებული 34.91 მილიონი აქცია (BlackRock-ის პორტფელის 1.08%)
#10 - Berkshire Hathaway (Class B) - $45.21 მილიარდად შეფასებული 107.51 მილიონი აქცია (BlackRock-ის პორტფელის 1.06%)
წყარო:https://bm.ge/