ამერიკის შეერთებული შტატების პრეზიდენტის თქმით, ჯონ ბოლტონი გაბოროტებული სულელია, რომელსაც მხოლოდ ომი უნდოდა, - ამის შესახებ დონალდ ტრამპმა Twitter-ზე დაწერა.

„შეშლილი ჯონ ბოლტონის უაღრესად მოსაწყენი წიგნი ცრუ ისტორიებზეა აგებული. ის მხოლოდ კარგს ამბობდა ჩემზე, სანამ სამსახურიდან დავითხოვდი. გაბოროტებული და მოსაწყენი სულელი მანამდე მხოლოდ ომზე ფიქრობდა. აი რეგვენი!“, - წერს ტრამპი.

აშშ-ს პრეზიდენტის განაწყენების მიზეზი მემუარების წიგნი გახდა, რომელიც მისმა ყოფილმა მრჩეველმა უსაფრთხოების საკითხებში ჯონ ბოლტონმა გამოსცა. წიგნში ბოლტონი წერს, რომ ტრამპი არჩევნებში გასამარჯვებლად დახმარებას ჩინეთს სთხოვდა და უკრაინისთვის სამხედრო დახმარების გაწევის წინააღმდეგი იყო. მემუარებში თეთრი სახლის ლიდერი არაკომპეტენტურობაშია მხილებული. ბოლტონი იგონებს, რომ ტრამპს წარმოდგენა არ ჰქონდა, იყო თუ არა ბრიტანეთი ბირთვული სახელმწიფო და არ იცოდა, რომ ფინეთი რუსეთის ნაწილი არ იყო. დონალდ ტრამპი აცხადებს, რომ ბოლტონის მემუარები ზესაიდუმლო ინფორმაციას შეიცავს, რომლის გამოქვეყნების უფლებაც ყოფილ მრჩეველს არ ჰქონდა.