თბილისში საქართველო - საუდის არაბეთის ბიზნესფორუმმა მუშაობა დაიწყო. ფორუმი საქართველოს პირველი ვიცე-პრემიერის, ეკონომიკისა და მდგრადი განვითარების მინისტრ ლევან დავითაშვილისა და საუდის არაბეთის დელეგაციის ხელმძღვანელის, ინვესტიციების მინისტრ ხალიდ ალ-ფალიჰის მისასალმებელი სიტყვებით გაიხსნა.
ღონისძიებას 300-მდე დელეგატი ესწრება, მათ შორის საქართველოს და საუდის არაბეთის როგორც სამთავრობო, ისე ბიზნესწრეების ფართო წარმომადგენლობა.
როგორც პირველმა ვიცე-პრემიერმა სიტყვით გამოსვლისას აღნიშნა, ჩვენი ქვეყნის ეკონომიკური ზრდისთვის ძალიან მნიშვნელოვანია პირდაპირი უცხოური ინვესტიციები და მთავრობის მიზანია, რომ სხვადასხვა ქვეყნიდან ხარისხიანი, პირდაპირი ინვესტიციები მოვიზიდოთ როგორც ეკონომიკური ზრდის შენარჩუნების, ასევე ეკონომიკის სტრუქტურის გაუმჯობესებისთვის. ამ მიმართულებით ეკონომიკის სამინისტრო ბევრს მუშაობს სხვადასხვა ქვეყანასთან, აქვს ინტენსიური დიალოგი ძირითად პარტნიორებთან და ერთ-ერთი ასეთი მნიშვნელოვანი, პოტენციური პარტნიორი საქართველოსთვის არის საუდის არაბეთი, რომელიც უმსხვილეს ეკონომიკას წარმოადგენს სპარსეთის ყურეში.
„ჩვენი პრიორიტეტია საუდის არაბეთის სამეფოსთან - ყურის ერთ-ერთ წამყვან ქვეყანასთან და უფრო ფართოდ - არაბულ სამყაროსთან ურთიერთობების განმტკიცება. ბოლო წლებში, გასული წლის ჩათვლით, ჩვენ შევინარჩუნეთ მზარდი ტენდენცია ორმხრივი ვაჭრობის, ასევე საუდის არაბეთის ინვესტიციების მიმართულებით. გარდა ამისა, საუდის არაბეთიდან ინვესტიციების შემდგომი ხელშეწყობის მიზნით, საქართველო მზადყოფნას გამოთქვამს, აქტიურად იმუშაოს ორ ქვეყანას შორის „ორმხრივ საინვესტიციო ხელშეკრულებაზე“, - განაცხადა ლევან დავითაშვილმა თავის გამოსვლაში.
პირველმა ვიცე-პრემიერმა საუდის არაბეთის დელეგაციის წევრებს გააცნო საქართველოში არსებული ეკონომიკური ტენდენციები და საინვესტიციო კლიმატის, ასევე მიმდინარე მსხვილი ინფრასტრუქტურული პროექტების შესახებ მიაწოდა ინფორმაცია, მათ შორის ანაკლიის ღრმაწყლოვანი პორტის და შავი ზღვის წყალქვეშა ელექტრო კაბელის შესახებ.
როგორც ლევან დავითაშვილმა აღნიშნა, ფორუმის ფარგლებში დაგეგმილი ორი ქვეყნის ბიზნესსექტორის (B2B) შეხვედრები შესანიშნავი შესაძლებლობა იქნება საქართველოში საინვესტიციო შესაძლებლობების შესახებ ამომწურავი ინფორმაციის მისაღებად. მისი თქმით, ამ მხრივ, მნიშვნელოვანია გასული წლის ოქტომბერში ორი პალატის მიერ დაარსებული ერთობლივი ბიზნესსაბჭო, რომელმაც იდეალური ჩარჩო შექმნა ორივე ქვეყნის ბიზნესისთვის კავშირების დასამყარებლად და ახალ პროექტებზე სამუშაოდ.
„ევროპისა და აზიის გზაჯვარედინზე მდებარე ჩვენი ქვეყანა შესაძლებლობების უნიკალურ ნაზავს გთავაზობთ, რაც საქართველოს მიმზიდველ დანიშნულების ადგილად აქცევს როგორც ინვესტორებისთვის, ისე ბიზნესისთვის. ჩვენი მიზანია, ხელი შევუწყოთ ეკონომიკური ზრდისა და სტაბილურობის კლიმატს და განვახორციელეთ რეფორმების ფართო სპექტრი, რომელიც გულისხმობს როგორც ბიზნესის კეთების გამარტივებას, ისე საგადასახადო ტვირთის შემცირებას. დღეს საქართველო ინვესტიციების განსახორციელებლად ისეთი ადგილია, სადაც დაბალ ხარჯებთან ერთად დაგხვდებათ შემცირებული რისკები, არაჩვეულებრივი ბიზნეს კლიმატი, მწვანე ენერგიის ხელმისაწვდომობა და წვდომა 2,3 მილიარდზე მეტი მომხმარებლის გლობალურ ბაზრებზე თავისუფალი ვაჭრობის ხელშეკრულებების ფარგლებში“, - აღნიშნა პირველმა ვიცე-პრემიერმა.
ფორუმის მიმდინარეობისას საუდის არაბეთის ბიზნესსექტორის წარმომადგენლები გაეცნენ საქართველოს საინვესტიციო გარემოსა და შესაძლებლობების პრეზენტაციას, რომელიც მათ სააგენტოს „აწარმოე საქართველოში“ დირექტორმა მიხეილ ხიდურელმა წარუდგინა.
ამასთან, ორი ქვეყნის წარმომადგენლებმა გაცვალეს ურთიერთთანამშრომლობის მემორანდუმები სოფლის მეურნეობის, ენერგეტიკისა და კულტურული ურთიერთობების მიმართულებით.
