ფინანსური თანამშრომლობა ჩინეთ-საქართველოს ურთიერთობების გაღრმავების მნიშვნელოვანი მაჩვენებელია, - განაცხადა „დღის ქრონიკასთან“ ინტერვიუში ჩინეთის ელჩმა საქართველოში, ჭოუ ციენმა.

„მიმდინარე წლის მარტში, საქართველოს ეროვნული ბანკის პრეზიდენტი, ქალბატონი ნათია თურნავა ეწვია ჩინეთს და ჩინურ მხარესთან ხელი მოაწერა თანამშრომლობის მემორანდუმს. ეს იყო პირველი შეხვედრა და პირველი ოფიციალური თანამშრომლობის დოკუმენტი ორი ქვეყნის ცენტრალური ბანკის პრეზიდენტებს შორის, რაც ნამდვილად საგულისხმო და ისტორიული მოვლენაა. როგორც ცნობილია, სინძიანგის ხუალინგის ჯგუფის მფლობელობაში არსებული „ბაზისბანკი“ საქართველოში წარმატებით ფუნქციონირებს, მუდმივად აფართოებს საკუთარ საქმიანობას და არაერთი დარგობრივი ჯილდო აქვს მიღებული.

ფინანსები რეალური ეკონომიკისთვის უმნიშვნელოვანესია. დღესდღეობით, როცა კაცობრიობა მნიშვნელოვან გლობალურ ცვლილებებს განიცდის, მსოფლიო ეკონომიკაში სირთულეები და გაურკვევლობა კიდევ უფრო ძლიერდება. ჩინეთ-საქართველოს ფინანსური თანამშრომლობა ხელს შეუწყობს ორმხრივ ვაჭრობას, ინვესტიციებსა და მსხვილი ინფრასტრუქტურული პროექტების განვითარებას. ამავდროულად, ეს გააძლიერებს საქართველოს მდგრადობას გარე საფინანსო რისკების მიმართ და გაზრდის ეკონომიკურ გამძლეობას.

ჩვენ, ორმხრივ თანამშრომლობაში, კიდევ უფრო დიდ მიღწევებს ველით. მაგალითად, საქართველოში უფრო მეტი ჩინური ბანკის გამოჩენა გაზრდის ჩინური იუენის საერთაშორისო გადახდებში გამოყენებას, რაც უფრო მოსახერხებელს და სტაბილურს გახდის ორმხრივ ვაჭრობასა და ინვესტირებას. გარდა ამისა, თუ საქართველოში შესაძლებელი გახდება ჩინეთში პოპულარული გადახდის პლატფორმების – Alipay-სა და WeChat Pay-ს გამოყენება, ეს მნიშვნელოვნად გაზრდის ჩინელი ტურისტების ინტერესს საქართველოს მიმართ“, - აღნიშნა ელჩმა.