ჩინეთის დაავადებათა კონტროლის ცენტრის დირექტორი გაო ფუ - ჩინური ვაქცინების ეფექტურობა დაბალია

Date: 488

ჩინეთის დაავადებათა კონტროლის ცენტრის დირექტორი გაო ფუ აღიარებს, რომ ჩინური ვაქცინის ეფექტურობა დაბალია და ხელისუფლება მის მოდიფიცირებას განიხილავს. ამის შესახებ ჯაო ფუმ 10 აპრილს, ჩენგდუში, ვაქცინებისა და ჯანმრთელობის ეროვნულ კონფერენციაზე განაცხადა. ინფორმაციას "ვაშინგტონ პოსტი" ავრცელებს.

"ჩინურ ვაქცინებს დაცვის ძალიან მაღალი მაჩვენებელი არ აქვთ", - განაცხადა ჯაო ფუმ.

გაო ფუს განცხადებით, განიხილება სხვადასხვა ჩინური ვაქცინის მოდიფიცირება, რათა იმუნიზაციის პროცესი მეტი ეფექტურობის წარიმართოს.

მოგვიანებით, ოფიციალურმა პირებმა არ ისურვეს კომენტარი გაეკეთებინათ გაო ფუს განცხადებასთან დაკავშირებით. თუმცა ჩინეთის დაავადებათა კონტროლის ცენტრის ერთ-ერთმა წარმომადგენელმა დაადასტურა, რომ მიმდინარეობს მუშაობა mRNA-ზე დაფუძნებულ ვაქცინებზე. აქამდე, ჩინეთი აცხადებდა, რომ მისი ვაქცინები ტრადიციული მეთოდით იყო დამზადებული.

ჟურნალისტები ეცადნენ კონფერენციის შემდეგ მეტი ინფორმაცია მიეღოთ გაო ფუსგან, თუმცა მან სატელეფონო ზარებს არ უპასუხა.

ჩინური ვაქცინები მსოფლიოს ათეულობით ქვეყანამ შეიძინა, მათ შორის, საქართველომ. საქართველოში ჩინური "სინოფარმის" ვაქცინის 100 000 დოზა ჩამოვიდა. ვაქცინის ერთ დოზაში საქართველოს მხარემ დაახლოებით 20 დოლარი გადაიხადა.

უახლოეს მომავალში, საქართველოში კიდევ ერთი ჩინური ვაქცინა შემოვა. სინოვაკის ვაქცინის 100 000 დოზას საქართველო ჩინეთისგან უსასყიდლოდ მიიღებს.

31 დეკემბერს, ჩინეთმა Sinopharm-ის მიერ შემუშავებული კორონავირუსის საწინააღმდეგო ვაქცინა ფართო გამოყენებისთვის დაამტკიცა. ფარმაცევტული კომპანია Sinopharm-ის განცხადებით, მესამე ფაზის კვლევებმა აჩვენა, რომ ვაქცინა 79%-ით ეფექტურია. მანამდე, დეკემბრის დასაწყისში, არაბთა გაერთიანებულ საამიროებმა განაცხადა, რომ ვაქცინა 86%-ით ეფექტური აღმოჩნდა. არაბთა გაერთიანებულ საამიროები პირველი ქვეყანა იყო, ჩინეთს გარეთ, რომელმაც Sinopharm-ის ვაქცინა გადაუდებელი გამოყენებისთვის სექტემბერში დაამტკიცა.

ჯანდაცვის სფეროს წარმომადგენლებს ვაქცინის ეფექტურობაზე გარკვეული კითხვის ნიშნები აქვთ, რადგან ვაქცინის საბოლოო კვლევის შედეგები ჯერ არ გამოქვეყნებულა.

აღნიშნული ვაქცინა ერთ-ერთია იმ 5 ვაქცინას შორის, რომელიც ჩინეთში შექმნეს, დანარჩენებს საგანგებო ავტორიზაცია აქვთ მინიჭებული. ჩინეთში ჯანდაცვის მუშაკებისა და მაღალი რისკის მქონე მოქალაქეების აცრა, ვაქცინების საბოლოო კვლევის პარალელურად, ივლისში დაიწყო.

Sinopharm-ს ასევე ვაქცინის სხვა კანდიდატიც აქვს, თუმცა მას არ დაუსახელებია, თუ ფართო გამოყენებისთვის მისი რომელი ვაქცინა იქნა დამტკიცებული. ჩინეთში ერთ-ერთი კოვიდ ვაქცინა ბიოფარმაცევტულმა კომპანია Sinovac-მა შექმნა. თურქეთში Sinovac-ის კვლევის შედეგებმა აჩვენა, რომ ვაქცინა 91.25 %-ით ეფექტურია, თუმცა ბრაზილიაში ჩატარებული კვლევის მიხედვით, მისი ეფექტურობა მხოლოდ 50%-ია.

აღსანიშნავია, რომ ჩინური ვაქცინები, არც ფართო გამოყენებისთვის და არც გადაუდებელი შემთხვევებისთვის, ჯანმრთელობის მსოფლიო ორგანიზაციას ამერიკის სურსათისა და წამლის ადმინისტრაციის (FDA) და არც ევროპის მედიკამენტების სააგენტოს (EMA) მიერ არ არის ავტორიზებული.

culture

პარიზის წიგნის ფესტივალზე საქართველოს მწერალთა სახლი ეროვნული სტენდით პირველად არის წარმოდგენილი

კულტურის სამინისტროს მხარდაჭერით 12-14 აპრილს საქართველოს მწერალთა სახლი 2024 წლის პარიზის წიგნის ფესტივალზე ეროვნული სტენდით პირველად მონაწილეობს.

Grand Palais Éphémère–ში ფესტივალისა და საქართველოს ეროვნული სტენდის გახსნას მწერალთა სახლის დირექტორი ქეთევან დუმბაძე, საქართველოს საგანგებო და სრულუფლებიანი ელჩი საფრანგეთის რესპუბლიკაში გოჩა ჯავახიშვილი და ლიტერატურული სფეროს წარმომადგენლები ესწრებოდნენ.

საქართველოს ეროვნული სტენდის პრეზენტაცია გაიმართა ღონისძიებით - „ჰაგიოგრაფიიდან პოსტმოდერნიზმამდე“. მწერალთა სახლის სტენდის სტუმრებს, ქართული მწერლობის გაცნობასთან ერთად, საინტერესო კალიგრაფიულ აქტივობაში ჩართვის შესაძლებლობა ჰქონდათ. კალიგრაფმა გიორგი სისაურმა მათ ქართული ანბანით დაუწერა სასურველი სიტყვები, გამონათქვამები, ფრაზები, სახელები და ა. შ. ასევე გაიმართა ღონისძიება, სახელწოდებით, „თექვსმეტსაუკუნოვანი უწყვეტი ლიტერატურული პროცესი“, რომელიც განიხილავს ქართულ ლიტერატურას, ქართულ-ფრანგულ ლიტერატურულ ურთიერთობებსა და ქართული და ევროპული ლიტერატურის კავშირს.

პირველ საფესტივალო დღეს გამართულ პანელ-დისკუსიაში მონაწილეობა მიიღეს საქართველოს საგანგებო და სრულუფლებიანმა ელჩმა საფრანგეთის რესპუბლიკაში გოჩა ჯავახიშვილმა და ფრანგული ფილოლოგიის დოქტორმა, პროფესორმა, ივანე ჯავახიშვილის სახელობის თბილისის სახელმწიფო უნივერსიტეტის რომანული ფილოლოგიის ფაკულტეტის ხელმძღვანელმა ბელა ხაბეიშვილმა. შეხვედრას ასევე ესწრებოდნენ უცხოელი გამომცემლები, ლიტერატურული აგენტები, მედიის წარმომადგენლები და ქართული სათვისტომოს საპატიო წევრები.

ფესტივალის მსვლელობისას ქართულ სტენდზე დაგეგმილია არაერთი აქტივობა და საქმიანი შეხვედრა - PUBLISHERS MATCHMAKING. შეხვედრის მონაწილეები იქნებიან საქართველოს მწერალთა სახლი, ქართული გამომცემლობები: „სეზან ფაბლიშინგი“, „მედუზა,“ „ბაკმი“ და მთარგმნელები - მაია ვარსიმაშვილი და მაია გიორხელიძე. შეხვედრაზე განიხილავენ ქართული ლიტერატურის კატალოგს. მთარგმნელი დალი იაშვილი წარადგენს მიხეილ ჯავახიშვილის მოთხრობას - „ლამბალო და ყაშა“ და მოთხრობების კრებულს. მთავარ სცენაზე გაიმართება წიგნის - „მზე, მთვარე და პურის ყანა“ წარდგენა. წიგნს წარადგენენ ავტორი - მწერალი და კინორეჟისორი თემურ ბაბლუანი და ეროვნული კინოცენტრის წარმომადგენელი ევროპაში სოფიო ბაბლუანი. ქართველ გამომცემლებთან ერთად საქართველოს სტენდთან იქნებიან ფრანგული გამომცემლობები: LE CHERCHE MIDI, GINGKO, EDITIONS DES CARNETS DU DESSERT DE LUNE, MEDUZA, და იტალიური გამომცემლობა MODERN TIMES, რომლებიც წარმოადგენენ ფრანგულად თარგმნილ კლასიკურ და თანამედროვე ქართულ პროზასა და პოეზიას.

საქართველოს ეროვნულ სტენდზე წარმოდგენილი იქნება ბუკლეტი ქართველი ავტორების 50-ამდე ნამუშევრის სინოპსისითა და ამონაბეჭდებით ისეთი ცნობილი ნაწარმოებებიდან, როგორიც არის „შუშანიკის წამება“, „ვეფხისტყაოსანი“ და სხვა.

აღსანიშნავია, რომ პარიზის წიგნის ბაზრობა ევროპის ერთ-ერთი ყველაზე მნიშვნელოვანი კულტურული მოვლენაა, რომელიც ყოველწლიურად გაზაფხულზე იმართება და მასში მონაწილეობას 1 200 გამომცემელი და 2 000 ავტორი იღებს. საქართველოს წელს პირველად მიეცა საშუალება, საკუთარი სტენდით ჩაერთოს საფესტივალო აქტივობებში.

ფესტივალში ეროვნული სტენდით მონაწილეობა საქართველოსთვის ძალიან მნიშვნელოვანია.

საფესტივალო აქტივობები მწერალთა სახლს, ქართველ მწერლებსა თუ გამომცემლებს დაეხმარება ლიტერატურული ურთიერთობების წარმართვაში, ქართული მწერლობის პოპულარიზაციაში, ახალი კონტაქტების მოძიებასა და მთარგმნელობითი საქმიანობის ხელშეწყობაში.

See all