ჭიათურის მერმა გივი მოდებაძემ, საინიციატივო ჯგუფის -,,ერთად ჭიათურისთვის“ წევრებთან ერთად, საბაგიროების სამშენებლო სამუშაოები დაათვალიერა. ადგილზე იმყოფებოდნენ- მერის პირველი მოადგილე გიორგი ბიწაძე და ტრანსპორტის სამსახურის უფროსი ზურაბ ცარციძე.
ჭიათურა-პერევისის და ჭიათურა-ზედა რგანის მიმართულებით სამგზავრო საბაგიროს რეაბილიტაცია აქტიურად მიმდინარეობს. ამ ეტაპზე არსებული შენობა-ნაგებობების აღდგენა-განახლების პროცესი ხორციელდება, პარალელურ რეჟიმში ეწყობა რკინა-ბეტონის კონსტრუქციები, რის შემდეგაც ბაგირების მონტაჟი დაიწყება.
ჭიათურის მერმა საინიციატივო ჯგუფის წევრებს სამგზავრო საბაგიროების სამშენებლო პროცესი ადგილზე გააცნო. კონტრაქტორი კომპანიის წარმომადგენლებმა დეტალურად ისაუბრეს პროექტით განსახორციელებელ სამუშაოებზე.
პროექტის მიხედვით, საბაგირო გზის როგორც ცენტრალური, ასევე პერევისისა და ზედა რგანის დასახლებებში არსებული სადგურები ავთენტურობას შეინარჩუნებს. განახლდება ტექნიკური ნაწილი, გონდოლები, მანქანა დანადგარები და ბაგირები. პროექტი ცენტრალური ბიუჯეტის დაფინანსებით ხორციელდება და მისი ღირებულება 4 600 000 ლარს შეადგენს.
