,
წყარო:https://bm.ge/
შეხვედრას პირადად არ ვესწრებოდი, თუმცა მაღაროელებს უთხრეს, რომ 6 თვით წყდება მუშაობა, ამ ეტაპზე, უმუშევრად რჩება 5 400-ზე მეტი ადამიანი, - ამის შესახებ bm.ge-ის მაღაროელმა, ტარიელ მიქაცაძემ განუცხადა.
საქმე ის არის, რომ ზესტაფონის ფეროშენადნობთა ქარხანა და ჭიათურის მაღარო მუშაობას წყვეტენ.
მისი თქმით, გუშინ შპს „მაღაროელის“ თანამშრომლებს შეხვდა კომპანიის წარმომადგენელი, თემურ ხონელია და განუცხადა, რომ კომპანია 6 თვით, 2025 წლის აპრილამდე აჩერებდა მუშაობას. დასაქმებულებს საშუალება ჰქონდათ ხელფასის 60% მიეღოთ.
“თავიდან ამბობდნენ, რომ საწარმოები გაჩერდებოდა 3 თვე, თუმცა გუშინ საღამოს გვითხრეს, რომ საუბარია სამუშაო პროცესის 6 თვემდე გაჩერებაზე. თანამშრომლებისთვის პირობები მიუღებელია, 60%-იანი ანაზღაურება საკმარისი არ არის, რადგან საბანკო ვალდებულებები აქვთ. მათ გვაჩვენეს დოკუმენტაცია, რომ მთავრობა საწარმოების გაჩერების ნებართვას აძლევს. თუ სახელმწიფომ შეისწავლა და ნამდვილად კრიზისშია კომპანია, მაშინ აიღოს თავის თავზე პასუხისმგებლობა და გადაგვიხადოს დარჩენილი თანხა, ან უზრუნველგვყოს სამსახურებით”, - განაცხადა ტარიელ მიქაცაძემ და დასძინა, რომ უმუშევრად დარჩენილი თანამშრომლები განცხადებას აუცილებლად გააკეთებენ, თუმცა ამ ეტაპზე დაგეგმვის პროცესში არიან.
მიქაცაძის ინფორმაციით, ზესტაფონის ფეროშენადნობთა ქარხანაში 1800 ადამიანი მუშაობს, ხოლო ჭიათურის მაღაროში 3600-მდე.
“ასე მოულოდნელად, გაფრთხილების გარეშე ადამიანების გაშვება სახლში, არ შეიძლება. მარტივი მდგომარეობის წინაშე არ ვართ”, - თქვა მიქაცაძემ.
bm.ge ცდილობს დაუკავშირდეს საწარმოების 100%-იანი წილების მფლობელ “ჯორჯიან მანგანეზს”, თუმცა დაკავშირება ამ დრომდე ვერ ხერხდება. კომპანიის წარმომადგენელი ჯერ კიდევ რამდენიმე დღის წინ ჩვენთან საუბარში ამბობდა, რომ შუქრუთის მაღაროს მფლობელი კომპანია ფინანსური კრიზისის წინაშე დგას და გამორიცხული არ არის, მძიმე შედეგების წინაშე დადგეს.
ირანისკენ კიდევ ერთი მშვენიერი არმადა მიემართება, - ამის შესახებ აშშ-ის პრეზიდენტმა, დონალდ ტრამპმა აიოვას შტატში, მხარდამჭერების წინაშე სიტყვით გამოსვლისას განაცხადა.
„ივნისში, ირანის ბირთვული პოტენციალი გავანადგურეთ. ამას ხალხი 22 წელი ელოდა. მათ ბირთვულ იარაღამდე დაახლოებით ერთი თვე აშორებდათ. ეს უნდა გაგვეკეთებინა“, - განაცხადა ტრამპმა.
დონალდ ტრამპმა იმედი გამოთქვა, რომ ირანი აშშ-სთან შეთანხმებას გააფორმებს.
„ახლა ირანისკენ კიდევ ერთი მშვენიერი არმადა მიემართება. დიდი იმედი მაქვს, რომ შეთანხმებას გააფორმებენ. შეთანხმება პირველივე ჯერზე უნდა გაეფორმებინათ“, - აღნიშნა აშშ-ის პრეზიდენტმა.
ცნობისთვის, ავიამზიდ „აბრაამ ლინკოლნის“ დამრტყმელი ჯგუფი ახლო აღმოსავლეთში ორშაბათს ჩავიდა. აშშ-ის ცენტრალურმა სარდლობამ განაცხადა, რომ დამრტყმელი ჯგუფი სამხედრო მზადყოფნის შემოწმების მიზნით წვრთნებს ჩაატარებს.
ინფორმაციისთვის, აშშ-ის პრეზიდენტის, დონალდ ტრამპის განცხადებით, ირანმა აშშ-სთან ახალი ბირთვული შეთანხმება უნდა დადოს, რომლის ფარგლებშიც თეირანი ურანის გამდიდრებას ვეღარ შეძლებს. 2025 წლის გაზაფხულზე აშშ-ის პრეზიდენტმა ირანის უზენაეს ლიდერს, აიათოლა ალი ხამენეის წერილი გაუგზავნა და მოლაპარაკებებისკენ მოუწოდა. წერილის თანახმად, დონალდ ტრამპმა ირანს ორი თვე მისცა, რათა ბირთვული პროგრამა შეეჩერებინა. 2025 წლის აპრილში, ომანში აშშ-ისა და ირანის დელეგაციებს შორის მოლაპარაკებები დაიწყო, რომელიც ივნისამდე გაგრძელდა. ირანმა ბირთვული პროგრამის შეჩერების შესახებ აშშ-ის მოთხოვნას მიუღებელი უწოდა და განაცხადა, რომ აშშ-ს ახალ წინადადებას წარუდგენდა. გასული წლის 13 ივნისს ისრაელმა ირანში რამდენიმე სამხედრო ობიექტს დაარტყა, ხოლო ისრაელის იერიშების დაწყებიდან ერთი კვირის შემდეგ, აშშ-მა ირანში ბირთვული ობიექტები დაბომბა.
