,
ბრიტანული სამაუწყებლო კომპანია „ბიბისი“ (BBC) აქვეყნებს ვრცელ რეპორტაჟს სამხრეთ კორეაში მიმდინარე მოვლენების შესახებ სათაურით „პრეზიდენტმა სამხედრო მდგომარეობის შემოღება დააპირა, მაგრამ ფიასკო განიცადა“ (ავტორი - ჯეიკ ვონი).
გთავაზობთ პუბლიკაციას შემოკლებით:
სამხრეთ კორეის პრეზიდენტის იუნ სოკ იოლის მოულოდნელი მცდელობა ქვეყანაში სამხედრო მდგომარეობის შემოღების თაობაზე ექვსი საათის შემდეგ კრახით დასრულდა; პარლამენტმა პრეზიდენტს მხარი არ დაუჭირა. იუნ სოკ იოლს სხვა გზა აღარ ჰქონდა და ამიტომ უკან დაიხია.
„ეროვნულმა კრებამ მოითხოვა, რომ საგანგებო მდგომარეობა უნდა გაუქმდესო და ამიტომ მე უკან გავიწვიე საარმიო ქვედანაყოფები, რომლებიც სამხედრო მდგომარეობის უზრუნველყოფაში მონაწილეობდნენ“, - განაცხადა ტელემიმართვაში პრეზიდენტმა. მისი გამოსვლის შემდეგ სწრაფად შეიკრიბა მინისტრთა კაბინეტი, რომელმაც სამხედრო მდგომარეობა გააუქმა. საარმიო ნაწილები ყაზარმებში დაბრუნდნენ.
გუშინ მთლიანად გადადგა პრეზიდენტის აპარატის პერსონალი. თვითონ პრეზიდენტს გადადგომა ჯერ არ გამოუცხადებია, თუმცა მისი ოპონენტები დემოკრატიული პარტიიდან, რომლებსაც პარლამენტში უმრავლესობა აქვთ, აცხადებენ, რომ თუ იუნ სოკ იოლი თვითონ არ დატოვებს პოსტს, მას იმპიჩმენტს მოუწყობენ.
მოვლენები კი ასე დაიწყო: სამშაბათს საღამოს, პრეზიდენტი ტელევიზიით გამოვიდა და განაცხადა, რომ ქვეყანას ჩრდილოეთ კორეიდან „კომუნისტური საფრთხე“ ემუქრება და საჭიროა სამხედრო მდგომარეობის გამოცხადება კონსტიტუციური წესრიგის დასაცავად. „მაგრამ მთავარი ისაა, რომ საფრთხე გვემუქრება როგორც ჩრდილოეთიდან, ასევე ადგილობრივი ანტისახელმწიფოებრივი ელემენტების მხრიდანაც, რომლებიც უნდა ამოიძირკვონ“, - ხაზი გაუსვა იუნ სოკ იოლმა, - „ოპოზიცია ხელს უშლის სახელმწიფოს ნორმალურ საქმიანობას და ცდილობს მინისტრებს და მეც, პრეზიდენტსაც, იმპიჩმენტი მოგვიწყოს“.
„ეს არის ანტისახელმწიფოებრივი ქმედება, რომელიც არღვევს კორეის რესპუბლიკის დემოკრატიას და აშკარად ჰგავს სამოქალაქო ომის გაჩაღების მცდელობას“, - განაცხადა პრეზიდენტმა, რომლის ტექსტი მის საიტზეა გამოქვეყნებული, - „ჩვენი პარლამენტი იქცა დანაშაულებრივი ჯგუფების ბუდედ და ცდილობს ქვეყნის კოლაფსი გამოიწვიოს, ლიბერალური დემოკრატია საკანანონმდებლო დიქტატურით ჩაანაცვლოს“.
თუმცა არც მმართველი პარტია და არც ოპოზიცია პრეზიდენტის გადაწყვეტილებას სამხედრო მდგომარეობის გამოცხადების შესახებ არ დაეთანხმა. პარლამენტში უმრავლესობის მქონე სამხრეთ კორეის დემოკრატიული პარტიის ლიდერის ლი ჯე მიონის თქმით, პრეზიდენტის გამოსვლა კონსტიტუციას ეწინააღმდეგება, ხოლო საპრეზიდენტო პარტიის „ხალხის ძალის“ ხელმძღვანელმა ხან დონ ხუნმა თავიანთი ლიდერის ბრძანებულობას უკანონო უწოდა.
პრეზიდენტის ბრძანების თანახმად, არმიის გენერალ პაკ ან სუს დაევალა სამხედრო მდგომარეობის უზრუნველყოფა - აიკრძალა ყოველგვარი პოლიტიკური საქმიანობა, მათ შორის პარლამენტის, ადგილობრივი ორგანოებისა და ასოციაციების მუშაობა, ასევე მიტინგები და დემონსტრაციები. „საგანგებო სამხედრო მდგომარეობის წესების დამრღვევები მკაცრად დაისჯებიანო“, - ნათქვამი იყო პრეზიდენტის ბრძანებაში.
უნდა აღინიშნოს, რომ სამხრეტ კორეაში სამხედრო მდგომარეობა სულ ბოლოს მხოლოდ 1979 წელს იქნა შემოღებული, პრეზიდენტ პაკ ჯონ ჰის მკვლელობასთან დაკავშირებით.
რა ხდებოდა პარლამენტის წინ
როგორც კი მოსახლეობამ სამხედრო მდგომარეობის გამოცხადება შეიტყო, ეროვნული კრენის (პარლამენტის) შენობის წინ ხალხმა შეკრება დაიწყო. შესასვლელთან მივიდნენ პოლიციელებიც... შენობის თავზე შეიმჩნეოდნენ სამხედრო ვერტმფრენებიც.
მოვლენები პირდაპირი ტელეეთერით გადაიცემოდა. ჟურნალისტები და შეშფოთებული მოქალაქეები დეპუტატების გადაწყვეტილებას ელოდებოდნენ. მოხდა რამდენიმე შეტაკება პოლიციელებსა და აქციის მონაწილეებს შორის. მომიტინგეები სკანდირებდნენ - „არა სამხედრო მდგომარეობას“, „დიქტატურა დაემხობა“, „გახსენით კარი“ და ა.შ. საბოლოოდ 190-მა დეპუტატმა 300-დან ხმა მისცა პრეზიდენტის მიერ გამოცხადებული სამხედრო მდგომარეობის გაუქმებას. პარლამენტის გადაწყვეტილებას მოქალაქეები სიხარულით შეხვდნენ.
როგორც სამხრეთ კორეის ეროვნული კრების წევრი ოპოზიციური დემოკრატიული პარტიიდან ხონ კი ვონი იხსენებს „ბიბისის“ კორესპონდენტთან ჯეიკ ვონთან საუბარში, „შუაღამისას ცოლმა გამაღვიძა და მითხრა, რარაც უსიამოვნო ამბავი ხდებაო. ჯერ ყურებს არ დავუჯერე, მაგრამ შემდეგ პარლამენტში გავქანდი, იქ უკვე პოლიციიელები იდგნენ და არ შემიშვეს, იძულებული გავხდი მესერზე გადავმძრვრალიყავი. პარლამენტის დარბაზში სხვა დეპუტატებიც მოვიდნენ, ყველას ერთი აზრი ჰქონდა - პრეზიდენტი შეცდა. მისი პარტიის წევრებიც კი გაკვირვებულები იყვნენ.
პოლიტიკური კრიზისის მიზეზები
მიმდინარე წლის გაზაფხულზე სამხრეტ კორეაში საპარლამენტო არცევნები გაიმარტა, რომელშიც ოპოზიციურმა დემოკრატიულმა პარტიამ 300-დან 192 ადგილი მიიღო, ანუ პრეზიდენტის პარტიამ „ხალხის ძალამ“ გამანადგურებელი კრახი განიცადა. პარტიის ლიდერი ხან დონ ხუნი და პრემიერ-მინისტრი ხან დოკ სუ გადადგნენ.
მასმედია წერდა, რომ გაზაფხულზე ჩატარებული არჩევნები შეიძლება ერთგვარ რეფერენდუნადაც კი ჩაითვალოს პრეზიდენტ იუნ სოკ იოლის ნდობის მიმართ, რომელსაც ვადის დასრულებამდე კიდევ სამი წელი რჩება.
საბოლოო ჯამში დემოკრატიულმა პარტიამ პრეზიდენტი და მისი ადმინისტრაცია არაკომპეტენტურობაში დაადანაშაულა და განაცხადა, რომ იუნ სოკ იოლს ჯერ „კოჭლ იხვად“, შემდეგ კი „მკვდარ იხვად“ გადააქცევდა. თავის მხრივ, მუქარებში არც პრეზიდენტმა უკან არ დაიხია და გაჩაღდა სიტყვიერი ომი. იუნ სოკ იოლი აცხადებდა, რომ პარლამენტი მის ინიციატივებს ბლოკავდა და ნორმალური მუშაობის სესაძლებლობას არ აძლევდა.
მოკლედ, პრეზიდენტის ინიცირებულ კანონებს პარლამენტი მხარს არ უჭერდა, პრეზიდენტი კი ოპოზიციური პარლამენტის მიღებულ კანონებს ბლოკავდა და ვეტოს ადებდა, თუმცა ზოგჯერ უშედეგოდ. მაგალითად, ამას წინათ პარლამენტმა პრეზიდენტის ადმინისტრაციას ბიუჯეტი შეუმცირა, იუნ სოკ იოლმა კი ვერაფერი გააწყო.
აღსანიშნავია, რომ პრეზიდენტის ცოლი ჯიმ გონ ჰი 2023 წელს სკანდალის ცენტრში მოხვდა - საზოგადოების წინაშე „დიორის“ ფირმის მდიდრული ხელჩანთით გამოვიდა. ამბობენ, ნაჩუქარიაო, მაგრამ კანონი პოლიტიკოსებს და მათ ცოლებს ძვირფასი საჩუქრების მიღებას უკრძალავს. იუნ სოკ იოლს ბოდიშის მოხდა მოუწია ცოლის საქციელის გამო.
წყარო: https://www.bbc.com/russian/articles/cy890pznpx7o
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
