ეკონომიკის სამინისტრომ ქვეყანაში მოქმედ საფოსტო-საკურიერო კომპანიებს ფოსტის შესახებ კანონპროექტის ახალი ვერსია გაუგზავნა. საქართველოში საერთაშორისო გადამზიდავი კომპანია FedEx-ის წარმომადგენელი კომპანიის ხელმძღვანელის შეფასებით, ახალი კანონპროექტი „ბაზრის უპრეცედენტო რეგულირების მცდელობას“ წარმოადგენს. უწყების მხრიდან წარმოდგენილი ახალი კანონპროექტისა და დარგის უმსხვილესი მოთამაშეების პოზიციების შესახებ ნინო მენთეშაშვილმა გადაცემა #რედაქტ2-ში ისაუბრა.

აღსანიშნავია, რომ „ფოსტის შესახებ“ კანონპროექტზე მუშაობა 2013 წლიდან მიმდინარეობს. ამ დროის განმავლობაში საკანონმდებლო ინიციატივა არაერთხელ გადამუშავდა, ვინაიდან მთავრობის ინიციატივით და ეკონომიკის სამინისტროს ავტორობით მომზადებულ კანონპროექტთან დაკავშირებით კერძო სექტორს არაერთი შენიშვნა ჰქონდა.

ნინო მენთეშაშვილი აღნიშნავს, რომ ახალი კანონპროექტი, ფაქტობრივად ძველ - 10 წლის წინ წარმოდგენილ ვერსიას დაუბრუნდა, რაც კომპანიებისთვის სრულად მიუღებელია. FedEx-ის საქართველოს წარმომადგენლობის ხელმძღვანელი მისი კონკურენტი საერთაშორისო კომპანიების საქართველოს წარმომადგენლობების DHL და UPS-ის სახელითაც საუბრობს და ამბობს, რომ 10 წელია ბიზნესოპერატორები ერთ წრეზე ტრიალებენ.

ნინო მენთეშაშვილი იმასაც ამბობს, რომ წლების განმავლობაში კანონპროექტის სხვადასხვა ვერსია ევროკომისიის სპეციალისტების მხრიდან სწორდებოდა, რასაც თითქოს ეკონომიკის სამინისტროც იზიარებდა.

„მაქვს უფლება ვილაპარაკო ჩვენი კოლეგების, ჩვენი კონკურენტების სახელით. ისეთი საერთაშორისო კომპანიების, როგორებიც არიან DHL და UPS. ჩვენი მთავარი პრობლემა ბოლო ათი წლის მანძილზე სტაბილურობის განცდა და საინვესტიციო გარემოა. სტაბილურობის განცდის არ ქონა პირდაპირ მიმართულია ეკონომიკის სამინისტროსთან, რადგან 10 წლის განმავლობაში ფაქტობრივად ერთ წრეზე გვატრიალებს. ეს არის „ფოსტის შესახებ“ კანონპროექტი, რომლის მეათე ვერსია წარმოადგინეს დღეს და ზუსტად იგივე რუტინულ წრეს გავდივართ - წარმოადგენენ კანონპროექტს, ჩვენ ევროკომისიაში გავაგზავნით და მაღალი თანამდებობის პირები შეაფასებენ ამ კანონპროექტს, მისცემენ მითითებებს, შემდეგ აღმოჩნდება, რომ საქართველოში საკითხის კურატორი მინისტრის მოადგილე ან თავად მინისტრი ამ მითითებებს სათანადოდ ჩათვლიან, ასახავენ კანონპროექტში და ეს ვერსია თაროზე შემოიდება, ერთი წლის შემდეგ იგივე პრობლემის წინაშე ვდგებით.

1 თვის წინ ჩვენთვის წარმოდგენილი კანონპროექტი სრულად პირველი ვერსიის ანალოგია, რომელსაც ევროკავშირის წარმომადგენლების მხრიდან არაერთი ვიდეოკონფერენცია მიეძღვნა, მაგრამ დღეს ისევ ვხედავთ ბაზრის უპრეცედენტო რეგულირების მცდელობას“, - აცხადებს ნინო მენთაშაშვილი.

საქართველოში FedEx-ის წარმომადგენელი კომპანიის ხელმძღვანელი ამბობს, რომ საფოსტო ბაზარი 2005 წლიდან სრულად ლიბერალიზებულია, რაც ბაზარზე თავისუფალ კონკურენციას ითვალისწინებს და კომპანიები თავისუფალი კონკურენციის პრინციპით ვითარდებიან. მისი ინფორმაციით, ეკონომიკის სამინისტროს მხრიდან კომპანიებისთვის გადაგზავნილი კანონპროექტის საბოლოო ვერსიაში საუბარია ბაზრის თავიდან დარეგულირებაზე, რაც კერძო ოპერატორებს შეეხებათ, ასევე სექტორის მარეგულირებლის გაჩენასა და საკონტრიბუციო გადასახადზე, რომელიც უნივერსალური ოპერატორის სტატუსის მქონე კომპანიის ფონდში კერძო კომპანიების მხრიდან განსაზღვრული თანხების ჩარიცხვას გულისხმობს.

„ახალი კანონპროექტი რერეგულაციას გულისხმობს, რაც დემოკრატიული ქვეყნების მაგალითზე უპრეცედენტოა. მსგავსი რეგულაციები თურქმენეთში გვხვდება, მაგრამ თურქმენეთი ჩვენთვის არ არის ისეთი მოდელი, რომელსაც უნდა მივბაძოთ. ევროპის ქვეყნებში მსგავსი პრეცედენტი არ არსებობს და მეტსაც გეტყვით, რომ ეკონომიკის სახელმძღვანელოებში წერია, რომ ბაზარზე მეორედ მოსვლა უნდა მოხდეს, რომ სრულად ლიბერალიზებული ბაზარი თავიდან დარეგულირდეს. მეორე - დანახვა უნდა იმ ფაქტს, რომ სრულად ლიბერალიზაციის შემდეგ საფოსტო ბაზარი საქართველოში განვითარდა და დღეს უპრეცედენტო განვითარებას მიაღწია, რადგან ელექტრონული კომერცია ვაჭრობის ერთ-ერთი ყველაზე განვითარებული სავაჭრო ფორმაა და შესაბამისად მის განვითარებასთან ერთად წარმოიშვა ძალიან ბევრი კომპანია, რომელიც ელექტრონულ კომერციას ემსახურება.

ასოცირების 99-ე და 100-ე მუხლში წერია, რომ საფოსტო-საკურიერო ბაზარი რეგულაციებისგან თავისუფალი უნდა იყოს და რაც რეგულირებას შეიძლება დაექვემდებაროს, ეს უნივერსალური საფოსტო მომსახურებაა. მსოფლიოში ყველა ერთხმად აღნიშნავს, რომ ეს სფერო უნდა იყოს დერეგულირებული. ეს კანონპროექტი სრულად ეწინააღმდეგება ამ მიდგომებს და საკურიერო მომსახურების სრულად დარეგულირებას ცდილობს. თავისუფალი კონკურენციის რეგულაცია, რომელიც ამ კანონპროექტშია ჩაწერილი, თავისუფალი ბაზრის არსს სრულად ეწინააღმდეგება.

კანონპროექტის მიხედვით შემოდის მარეგულირებელი, რომელიც მხოლოდ აღრიცხვის მეთოდებით არ მოქმედებს, არამედ შემოდის სრული კონტროლით, საკონტრიბუციო გადასახადით, სხვადასხვა ვალდებულებით, რომელიც საფოსტო-საკურიერო სამსახურმა უნდა წარადგინოს, ანუ სრულად რეგულირებული სფერო ხდება, რაც ევროპის ქვეყნების პრაქტიკას თუ შევხედავთ უპრეცედენტოა და ბაზარზე აბსოლუტურად მავნე ზეგავლენას მოახდენს“, - განაცხადა ნინო მენთეშაშვილმა.