ყარაბაღის სეპარატისტული მთავრობის ყოფილი წევრები აზერბაიჯანმა დააკავა. მათ შორისაა ყარაბაღის მეოთხე პრეზიდენტი არაიკ არუთუნიანი, მესამე პრეზიდენტი ბაკო სააკიანი და მეორე პრეზიდენტი არკადი ღუკასიანი.
არუთინიანს 2020 წელს აზერბაიჯანის ქალაქი განჯას დაბომბვა ედება ბრალად, ხოლო ღუკასიანსა და სააკიანს პირველი ომისას ჩადენილ დანაშაულებში თანამონაწილეობა. ისინი კიდევ ერთ დაკავებულ, რუბენ ვარდანიანთან ერთად იმ ადამიანთა სიას ქმნიან, რომლებიც დაუფარავად პრო-რუსული პოლიტიკის გატარების მიუხედავად რუსეთმა მაინც არ დაიცვა და გასწირა.
ფიქრობენ, რომ ეს შეიძლება ყოფილიყო რუსეთის მხრიდან პასუხი სომხეთს, რომელმაც საერთაშორისო სისხლის სამართლის სასამართლოზე მიერთება გამოაცხადა, რომლიდან გამომდინარეც ძებნილ დამნაშავეებს (მათ შორის რუსეთის ხელისუფლებას) სომხეთის ტერიტორიაზე შესვლის შემთხვევაში დაკავება ემუქრება. ცხადია სომხეთის ხელისუფლების მიდგომები რუსეთთან მიმართებით შეიძლება იყოს ერთ-ერთი ფაქტორი, მაგრამ სინამდვილეში ერთ მიზეზთან არ გვაქვს საქმე, მით უფრო რომ თუკი კრემლი სომხეთის მოქმედი ხელისუფლების კურსზეა გაბრაზებული მაშინ მით უმეტეს არ გასწირავდა თავის სასარგებლო პრო-რუსულ ძალებს ყარაბაღის ხელისუფლებიდან.
უფრო დამაჯერებელია ვიფიქროთ, რომ რამდენიმე ფაქტორის კომბინაციასთან გაქვს საქმე, მათ შორის იმასთან, რომ რუსეთი უბრალოდ დასუსტებულია და ყარაბაღის საკითხზე საბოლოოდ დაიბანა ხელი, შესაბამისად, აზერბაიჯანთან არანაირი გამწვავების სურვილი არ აქვს და ხელსაც არ უშლის მოქმედებაში. ხოლო მეორეს მხრივ სომხეთში ახალი დაპირისპირების შესაქმნელად მათი დაკავება პრო-რუსული ძალებისათვის ახალი დემონსტრაციების მიზეზიც შეიძლება გახდეს.
