,
ავსტრია ქვეყნიდან რუს დიპლომატს აძევებს. ამის შესახებ ინფორმაციას რუსული სამთავრობო მედია Tass ავრცელებს. როგორც გამოცემა ავსტრიულ მედიაზე დაყრდნობით წერს, დიპლომატი პერსონა ნონ-გრატად გამოცხადდა და ქვეყანა პირველ სექტემბრამდე უნდა დატოვოს.
მათივე ინფორმაციის თანახმად, ავსტრიის საგარეო საქმეთა სამინისტროში განუცხადეს, რომ დიპლომატმა დიპლომატიური ურთიერთობების შესახებ ვენის კონვენცია დაარღვია.
სხვა დეტალების დასახელებისაგან, მათ შორის დიპლომატის ვინაობის დასახელებისაგან, საგარეო უწყებამ თავი შეიკავა.
თუმცა Tass ავსტრიულ გამოცემა Kronen Zeitung-ზე დაყრდნობით წერს, რომ დიპლომატი სამრეწველო ჯაშუშობაშია ეჭვმიტანილი. სტატიაში ნათქვამია, რომ დიპლომატი ავსტრიის მოქალაქის მეშვეობით ინფორმაციის შეგროვებაშია ეჭვმიტანილია, რომელიც ავსტრიის ერთ-ერთ მაღალტექნოლოგიურ საწარმოში მუშაობდა.
მათივე ცნობით, ავსტრიის მოქალაქემ ჯაშუშური საქმიანობა თავად აღიარა და თავის კურატორად რუსი დიპლომატი დაასახელა. თავად რუსმა დიპლომატმა კი დიპლომატიური იმუნიტეტის გათვალისწინებით კომენტარის გაკეთებაზე უარი თქვა.
ვენაში რუსეთის საელჩომ დიპლომატის გაძევება გააპროტესტა და ავსტრიული მხარის გადაწყვეტილებას უსაფუძვლო უწოდა.
რუსეთს ავსტრიიდან რუსი დიპლომატის გაძევებაზე სარკისებური რეაქცია ექნება, - ასე გამოეხმაურა კრემლის პრესსპიკერი დიმიტრი პესკოვი მომხდარ ფაქტს.
რუსული მედიის ინფორმაციით, დიპლომატის გაძევებაზე კომენტარი ავსტრიაში რუსეთის საელჩომაც გააკეთა. მათი განმარტებით, მოსკოვის „სარკისებური რეაქცია“ დიდხანს არ დააყოვნებს.
„აღშფოთებული ვართ ავსტრიის ხელისუფლების მიერ მიღებული უსაფუძვლო გადაწყვეტილებით, რაც რუსეთ-ავსტრიის კონსტრუქციული ურთიერთობისთვის საზიანოა. დარწმუნებული ვართ, რომ ამას მოსკოვის სიმეტრიული რეაგირება დაუყოვნებლივ მოჰყვება“, - განაცხადეს საელჩოში.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
