,
„უკან გაბრუნებთ, უნდა წახვიდეთ ირანში ან თურქეთში, სულ ესაა. გასაგებია?! ესაა მიზეზი. აქ კითხვების დასმის ადგილი არ არის, ეს საზღვარია... არავინ ხართ. მე საქართველოს მცველი ვარ, რაც უფლებას მაძლევს, ისე გელაპარაკოთ, როგორც მომინდება...“ - ეს არის ფრაგმენტი აუდიოჩანაწერიდან, რომელიც bm.ge-ს საქართველოს საზღვრიდან გაბრუნებულმა თურქმენეთის მოქალაქემ მიაწოდა. მან ვინაობის გამხელა არ ისურვა, თუმცა გვიყვება, რომ დღეს, გამთენიისას, საქართველოში თურქეთიდან ჩამოფრინდა, მაგრამ თბილისის საერთაშორისო აეროპორტში მესაზღვრეებმა ქვეყანაში შემოსვლაზე უარი უთხრეს და სიტყვიერი შეურაცხყოფაც მიაყენეს.
აღსანიშნავია, რომ ეს ის უცხოელი ვიზიტორია, რომელიც 2020 წელს საქართველოში სამთავრობო პროგრამის - „იმუშავე საქართველოდან“ ბენეფიციარი იყო და თბილისში ცხოვრობდა; შემდეგ ქვეყანა დროებით დატოვა და 12 თებერვალს, როცა ისევ ჩამოსვლა გადაწყვიტა, მესაზღვრეებმა უკან გააბრუნეს და ახსნა-განმარტებაში მიზეზად „სხვა“ ჩაუწერეს ანუ არაფერი კონკრეტული.
BM.GE-ისთან საუბრისას ვიზიტორი ირწმუნება, რომ თებერვალშიც და ახლაც თბილისის აეროპორტში საზღვარზე ყველა საჭირო დოკუმენტი წარადგინა და აღნიშნა, რომ მას შეეძლო, როგორც თურქმენეთის მოქალაქე, ისე შემოსულიყო, რადგან ამ ქვეყანასთან ავიამიმოსვლა დაშვებულია.
„საზღვარზე წარვადგინე როგორც ნეგატიური PCR-ტესტის პასუხი, ასევე მისამართი, სად უნდა გავჩერებულიყავი; ვაჩვენე უკან დასაბრუნებელი ბილეთიც, მქონდა თანხაც... მიუხედავად ამისა, მესაზღვრეებმა მომთხოვეს სასტუმროს ჯავშანი, რაც არ მქონდა. განვუმარტე, რომ ქვეყანაში პირველად არ შემოვდიოდი და აქამდე სასტუმროს ჯავშნის მოთხოვნა აუცილებლად წარსადგენი საბუთების სიაში არ ყოფილა. ცოტა ხნის შემდეგ განმიცხადეს, რომ უკან მაბრუნებდნენ, მაგრამ ისევე როგორც წინა შემთხვევაში, ახლაც ზუსტი მიზეზი არ დაუსახელებიათ, მეტიც შეურაცხყოფაც მომაყენეს“, - ამბობს უცხოელი ვიზიტორი.
Bm.ge თურქმენეთის მოქალაქესა და ქართველ მესაზღვრეებს შორის დიალოგს უცვლელად გთავაზობთ. აუდიოჩანაწერის შესახებ საქმის კურსშია შინაგან საქმეთა სამინისტრო და ველოდებით პასუხს - რა რეაქცია ექნება ვახტანგ გომელაურის უწყებას აღნიშნულ ფაქტზე. განახლება: აეროპორტში მომხდარ ფაქტთან დაკავშირებით შინაგან საქმეთა სამინისტროს გენერალურმა ინსპექციამ სამსახურებრივი შემოწმება დაიწყო.
მესაზღვრე: საქართველოში შემოსასვლელად თურქეთის რეზიდენტის მოწმობა გჭირდებათ... <მესაზღვრის მოთხოვნა სრულად გასაგებად არ ისმის> ახლა თურქეთში დაბრუნდებით. საელჩოს მიმართეთ...
ვიზიტორი: საელჩოს მივმართე და მითხრეს, რომ შემიძლია საქართველოში შემოსვლა. გაბრუნების მიზეზების შესახებ კი იქ მითხრეს, რომ თქვენ უნდა განგემარტათ ეს საკითხი.
მესაზღვრე: უკან გაბრუნებთ, უნდა წახვიდეთ ირანში ან სტამბულში, სულ ესაა. გასაგებია?! ესაა მიზეზი. აქ კითხვების დასმის ადგილი არ არის, ეს საზღვარია. აქ დაჯექი ახლა, შენთან ლაპარაკი არ მინდა, მანდ დაჯექი. ჩაგსვამთ თვითმფრინავში და გაგგზავნით.
ვიზიტორი: შემიძლია, სახელი და გვარი გკითხოთ?
მესაზღვრე: არა, იმიტომ რომ უკან გაბრუნებთ და ჩემი სახელი თქვენი საქმე არაა.
ვიზიტორი: კარგი, მე დავრუნდები უკან, არ არის პრობლემა...
მესაზღვრე: თქვენ ვერასდროს შემოხვალთ საქართველოში...
ვიზიტორი: აღარასდროს მომინდება საქართველოში შემოსვლა, მაგრამ ყველა შემთხვევაში მიუღებელია ის, როგორც ექცევით ხალხს.
მესაზღვრე: ეს ჩემი ქვეყანაა და მე ვიცავ მას.
ვიზიტორი: თქვენ არ ხართ პრეზიდენტი... და არანაირი უფლება არ გაქვთ, ასე ელაპარაკოთ ადამიანებს.
მესაზღვრე: ახლა დაბრუნდებით სტამბულში და დაკარგავთ თქვენს გასაჩერებელ ადგილს. შენ წახვალ თურქმენეთში და იქ დარჩები სამუდამოდ, გაიგე თუ ვერა?!
ვიზიტორი: არ დავრჩები თურქმენეთში სამუდამოდ...
მესაზღვრე: აქ დაჯექით.
ვიზიტორი: რატომ მაშინებთ, შემიძლია თქვენი სახელი გავიგო? ვინ ხართ?
მესაზღვრე: არ გაშინებთ, არ შეგიძლიათ ჩემი სახელის გაგება, იმიტომ რომ არავინ ხართ. მე საქართველოს მცველი ვარ, რაც უფლებას მაძლევს, ისე გელაპარაკოთ, როგორც მომინდება...
ვიზიტორი: არ გაქვთ უფლება, ადამიანებს ასე ელაპარაკოთ... თქვენ არც პრეზიდენტი ხართ... არც ღმერთი... შეიძლება ასე მოქცევა?
მესაზღვრე: ოჰოოო, არ მიყვარს, როდესაც ვინმე რუსულად მელაპარაკება... გაგგზავნით უკან სტამბულში, საიდანაც თურქმენეთში დაგაბრუნებენ.
ვიზიტორი: რატომ მომაყენეთ შეურაცხყოფა?
მესაზღვრე: იმიტომ, რომ ჩვენ არ ვიღებთ ბ...ს და ა.შ. გასაგებია?!
ვიზიტორი: გგონიათ, რომ ასეთი საუბარი გამშვენებთ?
მესაზღვრე: არა, ეს სიმართლეა. იმ საქმით, რომლითაც თქვენ დაკავებული ხართ თურქეთში და საქართველოში. მორჩა, აქ დებილები არ ვართ.
წყარო:https://bm.ge/
ევროკომისიამ ვიქტორ ორბანის მმართველობის პერიოდში გაყინული 35 მილიარდი ევროს განბლოკვის მიზნით პიტერ მადიარს 27 პირობა წაუყენა, - ინფორმაციას Financial Times-ი ავრცელებს.
გამოცემის ინფორმაციით, უნგრეთის საპარლამენტო არჩევნებში გამარჯვების შემდეგ ევროკომისიამ პიტერ მადიარის პარტია „ტისასთან“ მოლაპარაკებები უკვე დაიწყო.
ევროკომისიის მიერ წამოყენებულ პირობებს შორის უნგრეთის მიერ რეფორმების განხორციელება და უკრაინასთან ურთიერთობების გაუმჯობესება შედის.
ევროპელი დიპლომატების განცხადებით, ევროკავშირის წევრი სახელმწიფოები ელიან, რომ პიტერ მადიარის მთავრობა ვიქტორ ორბანის მიერ უკრაინისთვის 90 მილიარდი ევროს სესხის გამოყოფასა და რუსეთის წინააღმდეგ სანქციების ახალ პაკეტზე დაწესებულ ვეტოს მოხსნის.
ასევე, ევროკომისიის წარმომადგენლის ცნობით, 35 მილიარდი ევრო გაყინულია უნგრეთის მოქმედი პრემიერ-მინისტრის ვიქტორ ორბანის მიერ აუცილებელ რეფორმებზე უარის, ასევე, კანონის უზენაესობის დარღვევისა და კორუფციის გაზრდის გამო.
გამოცემა წერს, რომ გაყინული თანხების განბლოკვის მიზნით უნგრეთის ახალ მთავრობას ისეთი წარსული გადაწყვეტილებების გაუქმება მოუწევს, რომლებსაც ევროკავშირი მისი წესების დარღვევად მიიჩნევს.
