,
უძრავი ქონების საკონსულტაციო კომპანია „პროსპექტის“ პარტნიორის ლევან ელიზბარაშვილის განცხადებით, ბაზარზე ჭარბი მიწოდების რისკი გაცემული ნებართვების გათვალისწინებით, შესაძლოა 2025 წლისთვის, ამ პროექტების დასრულების შემდეგ დადგეს.
გადაცემა „უძრავი ქონების პროსპექტში“ საუბრისას მან სფეროში სხვა სექტორებიდან წარმატებული ბიზნესების შემოსვლაზეც ისაუბრა, რამაც შესაძლოა „ნაკლებად კვალიფიციური მოთამაშეების წარმატებაზე“ მომდევნო პერიოდში მნიშვნელოვნად იმოქმედოს.
„მიწოდების სიჭარბის მცირე ნიშნებია ჯერ, თუმცა ვნახოთ ბაზარი როგორ მოიქცევა და რას დაარეგულირებს. უძრავი ქონების ბაზარი ბევრ საკითხზეა დამოკიდებული. თქვენ იცით, რომ საშუალოდ პროექტების ხანგრძლივობა არის 2 წლიანი, ამიტომ გვაქვს ეს პერიოდი რომ დავაკვირდეთ და ვნახოთ არსებულ მიწოდებას როგორ აითვისებს. ყველა რეპორტი რომელიც ქვეყნდება და ვრცელდება საზოგადოებაში ემყარება საჯარო რეესტრის მონაცემებს, ანუ ეს არის უკვე რეგისტრირებული ბინები. რეალური სურათის ნახვა კი ჩვენ უფრო შეგვეძლება 2025 წლის ბოლოს, როცა სტატისტიკის აღმრიცხველები ნახავენ ამის შედეგს.
მნიშვნელოვანი არ არის მხოლოდ გაყიდული ბინები, აქ მნიშვნელოვანია რა მიმართებაა ახალ და ე.წ. ძველ ბინებს შორის, რა მოსდის გაქირავების ფასს, გაყიდვების ფასს. ასევე იმას, თუ რა შეთავაზებები გამოაქვთ დეველოპერებს, რის საშუალებას ძლევენ მომხმარებლებს და ეს მოქნილობა როგორ იცვლება დინამიკაში. 2023 წელს ეს ბაზარი იყო მომხმარებელზე ორიენტირებული, თუმცა 2024 წელს ამის ბევრად მეტი ნიშანი გამოჩნდა, ისინი გაცილებით აგრესიულები არიან განვადებების კუთხით.
ჩვენ ამ სფეროში კონსულტანტები ვართ, ამიტომ ხმამაღალი განცხადებებისგან თავს ვიკავებთ. ჩემი სუბიექტური აზრით კი დეველოპერების გარკვეულ ნაწილს მოუწევს ბევრად უფრო სიღრმისეულად მიაპყროს ყურადღება მარკეტინგისა და გაყიდვების საკითხებს. თქვენ იცით რა რაოდენობის ოპერატორი ჰყავს ამ ბაზარს, სექტორი იყო მიმზიდველი და საინტერესო ნებისმიერი ბიზნესმენისთვის.
თუ დააკვირდებით ბოლო მოვლენებს, ნახავთ, რომ სხვა სექტორში კვალიფიციური მოთამაშეებმა გადაწყვიტეს აქ შემოსვლა. ეს იმოქმედებს ნაკლებად კვალიფიციური მოთამაშეების წარმატებაზე და მათ შედეგებზე. ამიტომ დეველოპერებმა პროექტის პარამეტრებს ყურადღება უნდა მიაქციონ თავშივე. „პროსპექტს“ საწყის ეტაპზე დახმარებისთვის მიმართავს 40%-მდე. 60% კი მაშინ, როცა ყველაფერი დამტკიცებული და შეთანხმებულია, საპროექტო პირობები ცნობილია და საბინაო ფონდი ჩამოყალიბებულია. აქ ჩვენ ვისურვებდით, რომ ეს პროექტები ბევრად უფრო შეესაბამებოდეს არსებულ მოთხოვნებს იმისთვის, რომ გაყიდვებისა და ფულადი ნაკადების ამოღება ბევრად უფრო მარტივი იყოს.“ - განაცხადა ლევან ელიზბარაშვილმა.
წყარო:bm.ge
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
