„ამერიკული მასობრივი ინფორმაციის საშუალებები იუწყებიან, რომ დონალდ ტრამპი სერიოზულად ფიქრობს ვაშინგტონში სამხედრო აღლუმი ჩაატაროს“, - წერს ბრიტანული გაზეთი „დეილი ექსპრესი“ (Daily Express) სტატიაში, რომლის სათაურია „CNN-მა ექსტრენულ გამოშვებაში დონალდ ტრამპის სამხედრო იდეა გააკრიტიკა, რომელიც ვლადიმერ პუტინის მოქმედებას ჰგავს“ (ავტორი - ჯეს ფილიპსი).

გთავაზობთ პუბლიკაციას მცირე შემოკლებით:

ორი დღის წინ ამერიკულმა ტელეარხმა CNN-მა თავისი გადაცემა ექსტრენულად შეწყვიტა და წამყვანმა ერინ ბერნეტმა მაყურებლებს დონალდ ტრამპის გეგმა გააცნო, რომელიც, მისი თქმით, „ისეთია, როგორიც პუტინის რუსეთში ხდება“.

როცა ტელეეკრანზე მორბენალი სტრიქონი გამოჩნდა - „ტრამპი ზოგიერთი ქვეყნის მიმართ ტარიფის შემოღებას აყოვნებს, რადგან საკითხი მრჩევლისადმი ნდობას ეხება“ -  წამყვანმა, თავის მხრივ, განმარტა: „იმიტომ, რომ დონალდ ტრამპი, როგორც ამბობენ, სამხედრო აღლუმის მომზადებით არის დაკავებული“.

ერინ ბერნეტმა აღნიშნა, რომ აშშ-ის არმიის სამხედრო აღლუმი „ძალიან ძვირი დაჯდება“. მან გაიხსენა, რომ დონალდ ტრამპი აღლუმის ჩატარებას ჯერ კიდევ პირველი ვადით პრეზიდენტობის დროს აპირებდა და იმ დროს იდეაზე უარი თქვა სწორედ იმის გამო, რომ აღლუმის ორგანიზებისათვის 100 მილიონი დოლარი დაიხარჯებოდა.

„წლევანდელი აღლუმი, თუ გამოვითვლით, დონალდ ტრამპის დაბადების დღეს - 14 ივნისს - ემთხვევა, როცა ასევე აღინიშნება აშშ-ის არმიის შექმნის 250-ე წლისთავი და სახელმწიფო დროშის დღე. ჩვენს ხელთ არსებული მონაცემებით, აღლუმში მონაწილეობას მიიღებენ სამხედრო მოსამსახურეები, ჯავშანტექნიკა, სამხედრო ავტომობილები და ბევრი სხვა შეიარაღება. მსგავსი საზეიმო ღონისძიებები აშშ-სათვის ტრადიციული არ არის ისინი უფრო პოლარულია ჩვენი ქვეყნის ფარგლებს გარეთ, მაგალითად, რუსეთში, ჩინეთში, ჩრდილოეთ კორეაში. ანუ აღლუმებს ისეთი „ძლიერი ლიდერები აწყობენ, რომლებიც დონალდ ტრამპის აღფრთოვანებას იწვევენ, მაგალითად, ვლადიმერ პუტინი“.

შემდეგ ტელეწამყვანმა კიდევ ერთი პარალელი გაავლო დონალდ ტრამპსა და ვლადიმერ პუტინს შორის: „იცით, როცა რუსული მასმედია იტყობინება, თუ რამდენი შაიბა გაიტანა ვლადიმერ პუტინმა ჰოკეის მატჩში, თქვენ ეს ნაცნობ მოვლენად მოგეჩვენებათ დღევანდელი სიტუაციის ფონზე და სწორიც იქნებით. იმ დროს, როცა სავაჭრო ომის ბობოქრობს, რუსულმა მედიამ გაავრცელა პრესრელიზი რეპორტიორებისათვის, რომელშიც გამოყენებულია დონალდ ტრამპის პუტინისებური გამონათქვამი: „მე გავიმარჯვე. საერთოდ, გამარჯვება კარგია. თქვენც ხომ გაიგეთ ჩემი გამარჯვება?“. პრეზიდენტს მხედველობაში ჰქონდა გოლფში გამარჯვება, რომელიც მან მარა-ლაგოში, თავის ვილაში ითამაშა“.

თეთრ სახლში უარყვეს სამხედრო აღუმისათვის მზადება და განაცხადეს, რომ ამჯამად მსგავსი „ღონისძიება დაგეგმილი არ არის“, თუმცა არც ის არ უთქვამთ, რომ მოგვიანებით აღლუმი არ გაიმართება. სხვათა შორის, 7 აპრილს ვაშინგტონის მერს მარიელ ბაუზერს „წამოსცდა“, რომ აღლუმისათვის მზადება ჯერ კიდევ „ადრეულ სტადიაშია“.

დონალდ ტრამპის მომხრეების თვალსაზრისი ამ ახალ ამბავთან მიმართებით სხვადასხვანაირია: ერთ-ერთმა კომენტარში დაწერა; „მართალია, რომ პრეზიდენტს აღლუმის ჩატარება სურს? და ეს ხდება ვეტერანებისათვის დახმარების შემცირების ფონზე? ამერიკულმა  საზოგადოებამ სიმართლე უნდა იცოდეს“.  მეორემ კი მოითხოვა, რომ „თუ დონალდ ტრამპი  აღლუმს მართლაც ჩაატარებს, მან ფული ამისათვის საკუთარი ჯიბიდან უნდა გადაიხადოს“.

წყარო: