"გირჩი მეტი თავისუფლება", "სტრატეგია აღმაშენებელი" და "დროა", ასევე საინიციატივო ჯგუფის წევრები ხელმოწერების შეგროვებას იწყებენ.
გიორგი ვაშაძის განცხადებით "ქართული ოცნების" ქმედებებს და "რუსულ კანონს", რომელიც პარლამენტშია ინიცირებული ამ ფორმით უპასუხებენ.
"24 თებერვლის საინიციატივო ჯგუფი შემდგომ ნაბიჯს ვდგამთ და ვიწყებთ კამპანიას მილიონი ხელმოწერა ევროკავშირისთვის. ჩვენ ვხედავთ, რომ 24 თებერვალს ათობით ათასი საქართველოს მოქალაქე შეიკრიბა რუსთაველზე, რითაც მკაფიო გზავნილი გავუგზავნეთ ჩვენ უკრაინელ მეგობრებს, რომ სოლიდარული ვართ უკრაინის, მკაფიო გზავნილი გავუგზავნეთ ჩვენ ევროპელ და ამერიკელ პარტნიორებს, რომ საქართველოს, ქართველი ხალხის არჩევანი არის ევროკავშირი და ნატო, მაგრამ სამწუხაროდ, ამის ფონზე "ქართული ოცნება" პირდაპირ ვთქვათ, რომ არღვევს საქართველოს კონსტიტუციას, სადაც ძლიერი საქართველოს იდეის რეალიზებად პირდაპირ არის მითითებული ევროკავშირში და ნატოში გაწევრიანება, არა თუ არ ასრულებს რეფორმების 12 პუნქტიან გეგმას, არამედ სამწუხაროდ, აინიცირებს რუსულ კანონს, რომელზეც მთელი ცივილიზებული სამყარო გვეუბნება, რომ ეწინააღმდეგება საქართველოს ევროპისკენ სვლის საკითხს. ამიტომ ერთადერთი გზა არის, რომ ჩვენ ჩვენი საერთო მანდატით, ქართველი ხალხის მანდატით, პირდაპირ დავიწყოთ საუბარი ჩვენ ევროპელ და ამერიკელ პარტნიორებთან", - თქვა გიორგი ვაშაძემ.