2024 წლის გზავნილია - “ერთად დავასრულოთ სტერეოტიპები.”
2011 წლის 10 ნოემბერს, გაერთიანებული ერების ორგანიზაციის გენერალურმა ასამბლეამ, ცნობიერების ამაღლების მიზნით -21 მარტი დაუნის სინდრომის მსოფლიო დღედ გამოაცხადა და მოუწოდა გაეროს წევრ ქვეყნებს, ჩართულიყვნენ საგანმანათლებლო კამპანიებში. მსოფლიოს მრავალ ქვეყანაში, მათ შორის საქართველოში, ამ დღეს სხვადასხვა ღონისძიებები იმართება.
დაუნის სინდრომით ყოველი 800-დან ერთი იბადება; დაუნის სინდრომის მქონე ბავშვი შესაძლოა ეყოლოს ნებისმიერ ადამიანს; დაუნის სინდრომი დაავადება კი არა, გენეტიკური ცვლილებაა; დაუნის სინდრომი არც მემკვიდრეობითი და არც გადამდებია.
უთვალავი წინდის („Lot`s of Socks“) ტრადიცია, რომელიც 2013 წელს დაუნის სინდრომის საერთაშორისო ორგანიზაციის ინიციატივით დამკვიდრდა ამ დღის სიმბოლოდ იქცა. ფერადი წინდების შეძენით, რომელიც ქრომოსომის მსგავსია, ადამიანები ხდებიან ინფორმაციის გამავრცელებლები, იღებენ სოციალურ პასუხისმგებლობას, წვლილი შეაქვთ დაუნის სინდრომის საერთაშორისო ორგანიზაციის ფონდში, რომელიც თემის უფლებების დაცვასა და სტიგმის დაძლევაზე მუშაობს.
ჩვენს ქვეყანაში დანერგილი პროგრამები დაუნის სინდრომის მქონე ბავშვებს აწვდის სხვადასხვა ტიპის თერაპიას (ოკუპაციური, მეტყველების თერაპია, ფიზიოთერაპია), რომელიც მათ საჭიროებას მორგებულია. მნიშვნელოვანია არსებული, საჭირო სერვისებისადმი ხელმისაწვდომობა.
ბავშვის განვითარებისა და ფიზიკური ჯანმრთელობისთვის სოციალური მომსახურების სააგენტოს მიერ გახნორციელებული ბავშვთა ადრეული განვითარების პროგრამა ხელს უწყობს ბავშვის განვითარებას, მის სოციალიზაციას, განათლებას. ასევე, კომუნიკაციის, შემეცნებითი, თვითმოვლის სფეროების განვითარებას და აღზრდის მიმართულებით ბავშვის ოჯახის გაძლიერებას.
დაუნის სინდრომის მქონე ადამიანებს, როგორც ყველა ჩვენთაგანს, განსხვავებული შესაძლებლობები აქვთ. ამ მიმართულებით საზოგადოების ცნობიერების ამაღლება, დაუნის სინდრომის მქონე პირებისთვის თანაბარი შესაძლებლობების უზრუნველყოფის განმსაზღვრელი ფაქტორია, რაც განათლების, ჯანდაცვის სერვისებით სარგებლობას და მათი ყველა მიმართულებით ჩართულობას გულისხმობს.
