,
სტუ-ის რექტორი, აკადემიკოსი დავით გურგენიძე, ქართულ საინჟინრო სკოლას, ქართველ მეცნიერებს და საზოგადოებას პირველი ქართული კოსმოსური ობიექტის დღეს ულოცავს.
როგორც დავით გურგენიძის მიმართვაშია აღნიშნული, 24 წლის წინ, 1999 წლის 23 ივლისს, ღია კოსმოსურ სივრცეში ისტორიაში პირველი ქართული კოსმოსური ობიექტი - “რეფლექტორი” გავიდა და აქედან დაიწყო საქართველოს ისტორიის კიდევ ერთი ახალი ეპოქა.
„24 წლის წინ ქართული ხელთქმნილი ნაკეთობა პირველად გავიდა კოსმოსში. ეს იყო ქართული საინჟინრო სკოლისა და აკადემიკოს ელგუჯა მეძმარიაშვილის ხელმძღვანელობით, რეფლექტორზე მომუშავე ქართველი მეცნიერების დიდი გამარჯვება, რომელშიც განსაკუთრებული წვლილი სწორედ ჩვენმა ალმა-მატერმა, საქართველოს ტექნიკურმა უნივერსიტეტმა, შეიტანა.
ვულოცავ, ქართული კოსმოსური ობიექტის შექმნაში მონაწილე მეცნიერთა ჯგუფს, პირველი ქართული კოსმოსური ობიექტის დღეს!
გვეამაყება რომ ეს დღე დაკავშირებულია საქართველოს ტექნიკური უნივერსიტეტის ინჟინრების მოღვაწეობის ერთ-ერთ უმნიშვნელოვანეს ეტაპთან - სწორედ ჩვენმა მეცნიერებმა ჩაუყარეს საფუძველი რეფლექტორის კოსმოსში გაშვების ისტორიას.
ორმაგად საამაყოა, რომ გასაშლელი რეფლექტორი დაპროექტდა, დამზადდა და წინასაფრენოსნოდ გამოიცადა საქართველოში, საქართველოს ტექნიკური უნივერსიტეტის მიერ.
24 წლის წინ, საქართველოს ტექნიკურ უნივერსიტეტში დაწყებული „რეფლექტორის“ ისტორია დღეს წარმატებით გრძელდება. საქართველოს ტექნიკუ რი უნივერსიტეტი და აკადემიკოსი ელგუჯა მეძმარიაშვილი სტუ-ის მეცნიერ-მკვლევრებთან ერთად, ამერიკულ კომპანია EOS DATA ANALITIKS, INC-თან თანამშრომლობის ფარგლებში, კოსმოსური რეფლექტორების დარგში თეორიულ და ექსპერიმენტულ კვლევებს ატარებს და კოსმოსური ნაკეთობების პროექტირება-შექნაზე მუშაობს. ეს არის საქართველოს ტექნიკური უნივერსიტეტისა და ქართველი ინჟინერ-მეცნიერების, ქართული საინჟინრო სკოლის მიერ წარმატებისკენ გადადგმული მორიგი, კიდევ ერთი მნიშვნელოვანი ნაბიჯი და გარანტი იმისა, რომ საქართველო თავის სიტყვას იტყვის კოსმოსის ათვისების მიმართულებით.
კიდევ ერთხელ ვულოცავ საქართველოს ტექნიკური უნივერსიტეტის ქართულ საინჟინრო სკოლას, ასევე, აკადემიკოს ელგუჯა მეძმარიაშვილს და კოსმოსური ნაკეთობების პროექტირება-შექნაზე მომუშავე მეცნიერთა ჯგუფს, პირველი ქართული კოსმოსური ობიექტის დღეს და ვუსურვებ მათ წარმატებებს საქართველოს სახელის სადიდებლად “, - აღნიშნულია დავით გურგენიძის მიმართვაში.
ინფორმაციისთვის: “რეფლექტორი”, რომლის გენერალური კონსტრუქტორია სამხედრო მეცნიერებათა დოქტორი, ტექნიკურ მეცნიერებათა დოქტორი, პროფესორი, გენერალ-მაიორი ელგუჯა მეძმარიაშვილი, ღია კოსმოსურ სივრცეში 1999 წლის 23 ივლისს გავიდა. 1999 წლის 28 ივლისს, ღია კოსმოსურ სივრცეში დაიწყო პირველი ქართული კოსმოსური ობიექტის გამოცდა, წარმატებულად დამთავრდა. ამის შემდეგ, პირველი ქართული კოსმოსური ობიექტი — 6,4 მ. გაბარიტის მქონე გასაშლელი რეფლექტორი, ჩამოცილდა ორბიტალურ სადგურ „МИР”-ს და დაიწყო დამოუკიდებელი ფრენა კოსმოსში. 1999 წლის 23 ივლისი შეტანილია მსოფლიო კოსმონავტიკის უმნიშვნელოვანეს ქრონიკათა ჩამონათვალში, ხოლო საქართველოში ყოველი წლის 23 ივლისი აღინიშნება პირველი ქართული კოსმოსური ობიექტის დღედ.
თბილისის მერია გადასასვლელ ხიდთან, ცოტნე დადიანისა და სადგურის მოედნის დამაკავშირებელი ესტაკადის მშენებლობას გეგმავს. ახალი ინფრასტრუქტურული პროექტი 2026 წლის ბიუჯეტში უკვე გათვალისწინებულია და მასზე მომდევნო წელს 10 მილიონი ლარი დაიხარჯება, 2027 წელს კი დამატებით 87.5 მილიონი ლარი. მთლიანობაში 280-მეტრიანი ესტაკადის პროექტირება-მშენებლობის წინასწარი სავარაუდო ღირებულება 100 მილიონ ლარს შეადგენს. პროექტზე საგზაო მარშრუტის კვლევაზე 2025 წელს უკვე 2.5 მილიონი ლარი დაიხარჯა.
2026 წლის ბიუჯეტის განმარტებით ბარათში მითითებულია, რომ სარკინიგზო მაგისტრალი ქალაქის ცენტრალურ მონაკვეთს ყოფს იმგვარად, რომ მოედნის პარალელურად არსებულ ქუჩებს შორის დაკავშირებადობა მინიმალურია და აუცილებელია საზოგადოებრივი ტრანსპორტისთვის ახალი ინფრასტრუქტურის შექმნით ქალაქის უბნების დაკავშირებადობა გაუმჯობესდეს.
"ქალაქ თბილისის ცენტრში არსებული რკინიგზის კორიდორი და თანმდევი ინფრასტრუქტურა ქმნის 4-კილომეტრიან მონაკვეთს აღმოსავლეთ-დასავლეთ სატრანსპორტო კავშირის გარეშე, გარდა შეზღუდული რაოდენობის საფეხმავლო კავშირებისა. ეს ისტორიული დაბრკოლება ხელს უშლის თბილისის სატრანსპორტო გეგმის პრიორიტეტებისკენ მისწრაფებას. სადგურის მოედანი მდებარეობს აღნიშნულ ამ 4-კილომეტრიან მონაკვეთში. ის წარმოადგენს დედაქალაქის უმნიშვნელოვანეს სატრანსპორტო „ჰაბს“, სადაც თავს იყრის 61 ავტობუსის მარშრუტი, მეტროს 2 ხაზი, ისევე როგორც საქართველოს რკინიგზის სერვისები. ტერიტორია ემსახურება საათში 330 ავტობუსის სერვისს, საიდანაც მომავალში 150 გამოიყენებს ხიდს. თბილისის სატრანსპორტო გეგმის თანახმად, სადგურის მოედანი ასევე იქნება თბილისის საგარეუბნო რკინიგზის სერვისების თავმოყრის წერტილი, რაც კიდევ უფრო მნიშვნელოვანს გახდის მისი, როგორც სატრანსპორტო ჰაბის ფუნქციას. ამჟამინდელი მდგომარეობით, აღმოსავლეთ-დასავლეთ კავშირის არარსებობა აფერხებს მაღალი ხარისხის ჰაბის განვითარებას, ხშირად 22 ავტობუსის მარშრუტის შეწყვეტა ხდება ვადაზე ადრე ან ახორციელებენ 1.5 კილომეტრიანი შემოვლითი მგზავრობას, რომელიც მნიშვნელოვნად ზრდის გადაადგილების დროს, ჰაერის დაბინძურებასა და ვიბრაციას, ისევე როგორც ამცირებს მარშრუტების ხარჯეფექტიანობას. თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევამ, რომელიც მსოფლიო ბანკის დახმარებით ჩატარდა, მულტიკრიტერიუმიანი ანალიზის საშუალებით, გამოავლინა თბილისის ცენტრში არსებული რკინიგზის ხაზის ორ მხარეს (აღმოსავლეთ და დასავლეთ) შორის ახალი კავშირის შექმნის საუკეთესო ალტერნატივა - საზოგადოებრივი ტრანსპორტის პრიორიტეტის მქონე საავტომობილო ხიდი, დადიანის ქუჩასა და სადგურის მოედანს შორის. ქ. თბილისის მუნიციპალიტეტის მერია ფლობს თბილისის სატრანსპორტო გეგმით გათვალისწინებულ აღმოსავლეთ-დასავლეთის შეკავშირებულობის ალტერნატივების ანალიზის კვლევის საფუძველზე შექმნილ ანგარიშს, კონცეფციას. პროექტის მიზანი არის, ამ კონცეფციით განსაზღვრული, საავტომობილო ხიდის მშენებლობა.
აღნიშნული ობიექტი წარმოადგენს საავტომობილო ხიდს ქალაქ თბილისში, რომელიც დააკავშირებს სადგურის მოედანს დადიანის ქუჩასთან და იქნება 280 მეტრი სიგრძის, 8.5 მეტრი სიგანის სწორ მონაკვეთში, ხოლო 15 მეტრი სიგანის მოხვევის მონაკვეთში (ე.წ. სპირალი, რომელიც ეშვება სადგურის მოედანზე). ხიდი იქნება ორზოლიანი და დასავლეთით, სადგურის მოედანზე დაშვებისას, რამპას ექნება მარჯვნივ ჩამხვევი ზოლი. რკინიგზის დერეფნის კვეთისას აუცილებელია 7 მეტრიანი სხვაობა რკინიგზის ლიანდაგსა და ხიდის სტრუქტურას შორის. საავტომობილო ხიდი ითვალისწინებს 18 მეტრიანი ავტობუსების მართვის ტრაექტორიებს, მისი მაქსიმალური გრძივი ქანობი - 10.7%, ხოლო მინიმალური რადიუსი - 12 მეტრი. საავტომობილო ხიდის გამტარობა შერეული ნაკადების პირობაში იქნება 800 ავტომობილი ერთ საათში ერთი მიმართულებით", - ნათქვამია 2026 წლის ბიუჯეტის განმარტებით ბარათში.
წყარო: https://bm.ge
