საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტმა თბილისის შემოვლითი მაგისტრალური გზის მესამე ლოტის მშენებლობაზე საერთაშორისო ტენდერი გამოაცხადა. პროექტი ავჭალა–აეროპორტის 22.5-კილომეტრიან მონაკვეთს მოიცავს.

შესყიდვის სავარაუდო ჯამური ღირებულება 932.02 მლნ ლარს შეადგენს. პროექტი აზიის განვითარების ბანკის (ADB) ფინანსური მხარდაჭერით ხორციელდება.

გამოცხადებული ტენდერი ორი ძირითადი სეგმენტის მშენებლობას გულისხმობს:

• ავჭალა–გლდანის 5.8-კილომეტრიანი მონაკვეთი;
• გლდანი–აეროპორტის 16.7-კილომეტრიანი მონაკვეთი.

გეგმის მიხედვით, მაგისტრალი იქნება 4-ზოლიანი და მოიცავს რთულ საინჟინრო ნაგებობებს: 16 ხიდს, 4 პარალელურ გვირაბსა და 4 სატრანსპორტო კვანძს. გზა სათავეს ავჭალის სარკინიგზო ხიდთან იღებს, მიემართება სამხრეთ-აღმოსავლეთით და დიდი ლილოს შესასვლელთან, ლილოს ბაზრობამდე სრულდება.

თბილისის შემოვლითი გზა (ნატახტარი/წიწამური - რუსთავი) საერთო ჯამში 49 კილომეტრია და ოთხ ლოტად არის დაყოფილი. იგი აღმოსავლეთ–დასავლეთის საერთაშორისო მაგისტრალის (E60) საკვანძო ნაწილია.

პროექტის რეალიზაცია ორ უმთავრეს მიზანს ემსახურება:

• სატრანზიტო ფუნქციის გაძლიერება: საერთაშორისო ტვირთბრუნვის ეფექტურობის გაზრდა.
• დედაქალაქის განტვირთვა: თბილისის სატრანსპორტო ნაკადების შემცირება და საცობების პრობლემის გრძელვადიანი გადაჭრა.

ცნობისთვის: პროექტის მეორე ლოტის (წიწამური–ავჭალა) მშენებლობაზე საერთაშორისო ტენდერი 2025 წლის დეკემბრის ბოლოს გამოცხადდა.

მესამე ლოტით (ავჭალა–აეროპორტი) დაინტერესებული კომპანიებისთვის წინადადებების მიღება 2026 წლის 11 აპრილს დაიწყება და 15 აპრილს დასრულდება.

წყარო:https://bm.ge/