,
რუსული გაზეთის „კომერსანტის“ (Коммерсантъ) 20 ივნისის ნომერში დაბეჭდილია სტატია სათაურით „ღვინოები აქ მშვიდია“: საქართველომ „შეუმჩნევლად“ დაიკავა პირველი ადგილი რუსეთის ღვინით უზრუნველყოფაში“ (ავტორი - ანატოლი კოსტირევი).
„ქართული ღვინოები რუსეთის ბაზარზე პოზიციებს იმტკიცებენ: მიმდინარე წლის პირველი ხუთი თვის განმავლობაში ქართული ღვინის ექსპორტი რუსეთში 63%-ით გაიზარდა, ანუ 15,5 მილიონ ლიტრამდე, რის შედეგადაც საქართველომ იტალია უკან ჩამოიტოვა და პირველი ადგილი დაიკავა „მშვიდი ღვინოების“ (ისეთების, რომლებიც ნახშირორჟანგ გაზს არ შეიცავენ, ანუ ცქრიალა ღვინოებს არ მიეკუთვნებიან) რუსეთის ბაზარზე გატანაში. ამ ფაქტმა შეიძლება ადგილობრივი მეღვინეების ბიზნესი გაართულოს“, - წერს „კომერსანტი“.
როგორც ღვინით მოვაჭრე რუსული კომპანიის Fort-ის აღმასრულებელი დირექტორი ალექსანდრე ლიპილინი ამბობს, საქართველოდან ღვინის იმპორტის ზრდა 2022 წელს დაიწყო, დასავლური სანქციების ფონზე. არსებობს ამის რამდენიმე მიზეზი: ქართული ღვინის იმპორტის დროს პრობლემა არ არსებობს არც ლოჯისტიკისა და არც გადახდის თვალსაზრისით. ქართულ ღვინოების ფასი დაბალია და მისი ვოლატილობა (ცვლილება) ნაკლებად ხდება... გარდა ამისა, მასზე არ მოქმედებს იმპორტის ბაჟი. „როსკაჩესტვოს“ მიერ გამოშვებული „რუსეთის ღვინის გიდის“ მიხედვით, ქართული „მშვიდი ღვინოების“ იმპორტი რუსეთში ყოველწლიურად 20%-ით მატულობს.
ამასთან, რუსი მეღვინეები თვლიან, რომ უცხოური ღვინის მოძალება რუსულ ბაზარზე ხელს უშლის და პრობლემებს უქმნის ადგილობრივი ღვინის მწარმოებლებს. რაც შეეხება უშუალოდ ქართულ ღვინოს, ის რუსულ ბაზარზე შედის ა) როგორც უშუალოდ საქართველოში ბოთლებში ჩამოსხმული და ბ) როგორც ნედლეული, რომელიც ბოთლებში უკვე რუსეთში ისხმება. არის შემთხვევები, რომ ევროპული ღვინო რუსეთში საქართველოს ტერიტორიის გავლით შედის (ქართულ ბოთლებში ჩამოსხმული სახით).
საინტერესოა, რომ მევენახეობა-მეღვინეობის საერთაშორისო ორგანიზაციის შეფასებით, საქართველოში ღვინის წარმოება 2022 წელს 210 მილიონ ლიტრს შეადგენდა და ყოველწლიურად 2%-ით მატულობს. ამასთან, „როსკაჩესტვოში“ აღნიშნავენ, რომ წითელი ღვინოებისათვის საქართველოში სანედლეულო ბაზა უკვე არსაკმარისია და არის ეჭვი, რომ ის მოლდოვადან შეაქვთ. ამის თაობაზე „კომერსანტმა“ კითხვა გაუგზავნა საქარტველოს ღვინის ეროვნულ სააგენტოს, მაგრამ პასუხი ჯერ-ჯერობით არ ჩანს.
მოკლედ, რუსი ექსპერტების პროგნოზით, საქართველოს აქვს შესაძლებლობა, რომ რუსულ ბაზარზე ღვინოების გატანით პირველი ადგილი მიმდინარე წლის ბოლომდე შეინარჩუნოს, [თუმცა არ არის გამორიცხული, რომ ტენდენცია 2024 წლის პირველ ნახევარშიც გაგრძელდეს].
წყარო: https://www.kommersant.ru/doc/6054649
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
