კომპანია “დადიანი ინვესტმა”, რომელიც “არქი ჯგუფის” დამფუძნებელ ილია წულაიას ეკუთვნის, თბილისში 217,288 კვადრატული მეტრის უძრავი ქონება შეიძინა. აქტივი ცოტნე დადიანის გამზირის მიმდებარედ ყოფილი ვაგონშემკეთებელი ქარხნის ტერიტორიას მოიცავს. ნასყიდობის ხელშეკრულება 2025 წლის 16 აპრილს გაფორმდა.

ტერიტორიაზე განაშენიანების რეგულირების გეგმა ჯერ კიდევ 2022 წელს შეთანხმდა. ნაწილობრივ შეიცვალა სატრანსპორტო ზონის და რეკრეაციული სტატუსი.

ახალი ინვესტორის, ილია წულაიას თქმით, ადგილზე მრავალფუნქციური კომპლექსი აშენდება, რომელიც საცხოვრებელ ბინებს, კომერციულ და საოფისე სივრცეებს, ასევე, კაფე-რესტორნებს და მუზეუმს გააერთიანებს.

„21 ჰა ტერიტორია დამტკიცებული განაშენიანების რეგულირების გეგმის მიხედვით განაშენიანდება. სამშენებლო ფართი 420 000კვ.მ-ია, სადაც ჯამურად $250 მილიონის ინვესტიციას ჩავდებთ“, - ამბობს ბიზნესმენი.

ყოფილი ვაგონშემკეთებელი ქარხნის ტერიტორიის განვითარების გეგმა ასეთი იყო და წულაიას თქმით, ამ გეგმის ფარგლებში განაშენიანდება:

• ახლად აშენებული შენობების 75% საცხოვრებელი იქნება, 25% კომერციული.
• ახალი შენობებიდან ყველაზე მაღალსართულიანი ნაგებობა 33-სართულიანი და 117 მეტრის სიმაღლის იქნება.
• საშუალოსართულიანობა ახალ კვარტალში აშენებულ შენობებს 15-20 სართული ექნება.
• საპროექტო სივრცეში არსებული შენობების ჩათვლით ახალი კვარტალი სულ 51 შენობას გააერთიანებს.
• ჯამური საცხოვრებელი ფართობი 445 904 კვ.მ იქნება.
• 217 288 კვადრატულ მეტრ საპროექტო ტერიტორიაზე სარეკრეაციო სივრცისთვის 21 000 კვადრატული მეტრია გამოყოფილი.
• დაგეგმილია 3 653 მანქანისთვის მიწისქვეშა და მიწისზედა ავტოსადგომის მოწყობა.
• ცენტრალური გზები იქნება 7-მეტრიანი და გზის ორივე მხარეს მოეწყობა 2.5-მეტრიანი ტროტუარები. გათვალისწინებულია ველობილიკებიც.

გრგ-ს მიხედვით ტერიტორიის განაშენიანება ასეთი იქნება:

შეგახსენებთ, ტერიტორია დეპუტატ ნინო წილოსანის ოჯახის წევრების საკუთრებაში არსებულ კომპანიებს - „ვილსონ გარდენს“, შპს „იუ ეს თრეიდინგ კომპანის“ და სს „ფროფგრუპს” ეკუთვნოდა; ადგილზე $250-მილიონიანი საინვესტიციო პროექტის განხორციელებას სწორედ “ვილსონ გარდენი” გეგმავდა, რომლის სამეთვალყურეო საბჭოშიც ადგილს “ლიბერთი ბანკის” აქციონერი ირაკლი რუხაძეც იკავებდა; თუმცა როგორც ირკვევა, ილია წულაიას "დადიანი ინვესტმა" ქონება "საქართველოს ბანკისგან" გამოისყიდა. აღსანიშნავია, რომ იმ პერიოდშიც, როცა ტერიტორია წილოსანების ოჯახის კომპანიებს ეკუთვნოდა, აქტივები “საქართველოს ბანკის” იპოთეკით იყო დატვირთული, შემდეგ კი ბანკის მოთხოვნით მას ყადაღაც ედო; რის შემდეგაც, ის ბანკის საკუთრებაში გადავიდა, რომლისგანაც ის ილია წულაიას “დადიანი ინვესტმა” შეიძინა.

წყარო:https://bm.ge/