ხელოვნური ინტელექტის ტექნოლოგიაზე მუშაობა მეცნიერებმა ჯერ კიდევ 1980-იან წლებში დაიწყეს, მაგრამ მის შესახებ ფართო აუდიტორიამ 2022 წლის ბოლოს გაიგო, როცა OpenAI-მ ChatGPT წარადგინა. ეს თარიღი ითვლება გენერაციული ხელოვნური ინტელექტის, იგივე GenAI-ის ეპოქის დასაწყისად, რომელსაც ბევრი ექსპერტი მეოთხე ინდუსტრიულ რევოლუციად მიიჩნევს.

მას შემდეგ თითქმის სამი წელი გავიდა და ტექნოლოგია, ისევე, როგორც მისი გამოყენების გზები და მიზნები, არაერთხელ შეიცვალა. ChatGPT-ის შემდეგ, ბაზარზე არაერთი სხვა AI-მოდელი გამოჩნდა, რომელთა უმეტესობა კონკრეტულ მიზანს ემსახურება, მათ შორისაა: დაავადებების აღმოჩენა და დიაგნოსტიკა, კოდის წერა, კვლევა და განვითარება, ტექსტის რედაქტირება და ზოგადი კონსულტაცია.

მერამდენე წელია, რაც ხელოვნური ინტელექტის გამოყენების გზებით ამერიკელი მწერალი და ანტრეპრენიორი, მარკ ზაო-სანდერსი ინტერესდება და ამ თემაზე Harvard Business Review-სთვის ნაშრომებს წერს. როგორც მისი 2024 წლის ნარკვევიდან გავიგეთ, იმ დროს, ყველაზე ხშირად მომხმარებლები, AI-ის ბრეინშტორმინგისთვის, თერაპიისთვის, კონკრეტული ინფორმაციის ძებნისთვის, ტექსტის რედაქტირებისთვის და იდეების გასავრცობად იყენებდნენ.

მიმდინარე წელს, ტენდენცია შემობრუნებულია და GenAI-ის გამოყენების მიზნებს შორის ჭარბობს არა პროფესიული, არამედ ადამიანური, სოციალური და საგანმანათლებლო ასპექტები. როგორც სხვადასხვა ფორუმზე გამოქვეყნებული ათასობით პოსტის ანალიზის შედეგად დადგინდა, 2025 წელს AI-ის გამოყენების მთავარი ტენდენცია — მენტალური ჯანმრთელობაა.

#1 — თერაპია და სოციალური მხარდაჭერა: როგორც პრაქტიკა აჩვენებს, AI-მოდელები ადამიანურ პრობლემებს ობიექტურად, ყოველგვარი სუბიექტური მიკერძოების გარეშე აღიქვამენ, რაც მომხმარებელს ემოციის გამოხატვას უმარტივებს და მარტოობასთან გამკლავებაში და შფოთის შემცირებაში ეხმარება. AI-სთან კონსულტაცია, მართალია, პროფესიულ თერაპიას, ჯერჯერობით, სრულად ვერ ანაცვლებს, მაგრამ ადამიანების და ხელოვნურ ინტელექტის ყოველდღიური საუბარი სულ უფრო და უფრო პოპულარული ხდება.

#2 — ცხოვრების ორგანიზება: ხელოვნური ინტელექტს შეუძლია ადამიანს ყოველდღიური ცხოვრების მართვაში დაეხმაროს, ანუ მისი ერთგვარი ასისტენტის ფუნქცია შეითავსოს. ამისთვის, AI-მოდელები აღასრულებენ დავალებებს, მომხმარებელს შეხვედრების და სხვა გეგმების შესახებ ახსენებენ და გრაფიკის შედგენაში ეხმარებიან. ადამიანი ასისტენტისგან განსხვავებით, AI-მოდელი ყველა დავალებას ზედმიწევნით კარგად აღასრულებს და თან 24/7-ზე მუშაობს.

#3 — ცხოვრებისეული მიზნის პოვნა: ცხოვრებაში გარდაუვალია კრიზისული მომენტები, როცა ადამიანმა არ იცის, რა უნდა გააკეთოს ან რამდენიმე ვარიანტს შორის არჩევანის გაკეთება უჭირს. ასეთ დროს, ტრადიციულად, რჩევისთვის სხვა ადამიანებს მივმართავთ, მაგრამ მათი პასუხი, შესაძლოა მიკერძოებული და მეტად დამაბნეველი იყოს. ამიტომაც, ცხოვრებისეული მიზნის პოვნისთვის ადამიანები სულ უფრო და უფრო ხშირად იყენებენ AI-მოდელებს.

#4 — სწავლის გაუმჯობესება: ადამიანები ხშირად იყენებენ ხელოვნურ ინტელექტს სწავლების პროცესის გამარტივებისთვისაც, რადგან AI-მოდელებს შეუძლიათ ამოხსნან რთული დავალებები, უპასუხონ კითხვებს და მოირგონ ნებისმიერი სწავლების სტილი. ამასთან, ხელოვნურმა ინტელექტმა ნებისმიერ თემაზე გაცილებით მეტი იცის, ვიდრე ნებისმიერმა მასწავლებელმა, შესაბამისად მოსწავლეები AI-მოდელებს იყენებენ, როგორც მათემატიკური დავალებების ამოსახსნელად, ასევე ენების შესასწავლად და ნაშრომების დასაწერად.

#5 — კოდის წერა: გამომდინარე იქიდან, რომ AI-მოდელები მათემატიკურ ჩარჩოებში მოქმედებენ, კოდის წერა ერთ-ერთი ის საქმეა, რომელიც ხელოვნურ ინტელექტს ზედმიწევნით კარგად გამოსდის. შესაბამისად, დეველოპერები ხშირად იყენებენ AI-მოდელებს კოდის დასაწერად, შესამოწმებლად და დასარედაქტირებლად, რაც აჩქარებს პროგრამირების პროცესს და პროგრამირების უნარს ისეთ ადამიანებსაც აძლევს, რომელთაც ეს ტექნიკური ცოდნა არ აქვთ.

წყარო:https://bm.ge/