,
რუსი ოპოზიციონერი ალექსეი ნავალნი „ნოვიჩოკის“ ახალი მოდიფიკაციით მოწამლეს, რომლითაც ის თვითმფრინავშივე უნდა მომკვდარიყო. ამის შესახებ თავის წყაროებზე დაყრდნობით გერმანული გამოცემა Die Zeit-ი წერს.
მისი ცნობით, საუბარია ნივთიერება „ნოვიჩოკის“ ახალ სახეობაზე, რომლის შესახებაც აქამდე არაფერი იყო ცნობილი, თუმცა ის უფრო აგრესიული და მომაკვდინებელი აღმოჩნდა, ვიდრე „ნოვიჩოკის“ სხვა ცნობილი სახეობები. მეცნიერებმა მომწამლავი ნივთიერების კვალი ნავალნის ხელებზე და წყლის ბოთლის თავსახურზე აღმოაჩინეს.
გერმანელი სპეციალისტები ვარაუდობენ, რომ რუსეთის საიდუმლო სამსახურის აგენტმა, რომელიც ნავალნის უთვალთვალებდა, მას „ნოვიჩოკი“ ჩაიში ჩაუყარა. მათივე მტკიცებით, ნავალნი თვითმფრინავის ბორტზე უნდა მომკვდარიყო და მისი გადარჩენა განპირობებულია მხოლოდ იმით, რომ პილოტმა თვითმფრინავი ავარიულად დასვა, ხოლო ქალაქ ომსკის ექიმებმა ნავალნის დაუყოვნებლივ ანტიდოტი ატროპინი შეუყვანეს.
გერმანელი ექსპერტების ვარაუდით, ასეთი მომაკვდინებელი ნივთიერების გამოყენებით ოპერაციის ჩატარება მხოლოდ სპეცსამსახურებს შეეძლოთ.
20 აგვისტოს ქალაქ ტომსკიდან მოსკოვში თვითმფრინავით მგზავრობისას, ალექსეი ნავალნი ცუდად გახდა, რის გამოც თვითმფრინავი ავარიულად, ომსკში დაეშვა, სადაც ნავალნი მოწამვლის სიმპტომებით რეანიმაციაში მოათავსეს. 22 აგვისტოს ალექსეი ნავალნი სამკურნალოდ გერმანიაში გადაიყვანეს.
2 სექტემბერს გერმანიის მთავრობაში განაცხადეს, რომ ალექსეი ნავალნი „ნოვიჩოკის“ მსგავსი ნერვულ-პარალიტიკური ნივთიერებით მოწამლეს. გერმანიის კანცლერმა, ანგელა მერკელმა განაცხადა, რომ რუსი ოპოზიციონერი, ალექსეი ნავალნი მკვლელობის მცდელობის მსხვერპლი გახდა, რომლის მიზანი მისი გაჩუმება იყო.
წყარო:https://www.zeit.de/
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
