პლანეტის უმსხვილესი კომპანიების რეიტინგში დიდი ცვლილებაა - ბილ გეიტსის მიერ დაფუძნებულმა ამერიკულმა ტექნოლოგიურმა გიგანტმა, Microsoft-მა საბაზრო შეფასებით სტივ ჯობსის და სტივ უოზნიაკის მიერ დაფუძნებულ Apple-ს გადაუსწრო და გლობალურ ჩამონათვალში 1-ელი ადგილი დაიკავა.

ამჟამინდელი მდგომარეობით, Microsoft-ის კაპიტალიზაცია 3 ტრილიონ 260 მილიარდ დოლარს შეადგენს, ხოლო Apple-ის შეფასება 3 ტრილიონ 80 მილიარდი დოლარია. რეიტინგში ასეთი მნიშვნელოვანი ცვლილება მიმდინარე კვირას კომპანიების მიერ ფინანსური შედეგების გასაჯაროებასთან არის დაკავშირებული.

როგორც ცნობილია, 2025 წლის პირველ კვარტალში Microsoft-მა $70 მილიარდის შემოსავალი მიიღო, რაც წლიურად 13%-ით გაზრდილი მაჩვენებელია, ხოლო მოგებამ კოლოსალური 25 მილიარდ 800 მილიონი დოლარი შეადგინა, რაც ანალიტიკოსების პროგნოზს მნიშვნელოვნად აღემატება.

შედარებისთვის, Apple-მა ამავე პერიოდში 95 მილიარდ 400 მილიონი დოლარის შემოსავალი მიიღო, რაც წლიურად 5%-ით გაზრდილი მაჩვენებელია, თუმცა კომპანია სამომავლო პროგნოზების გაუარესებაზე მიუთითებს და ტიმ კუკი აცხადებს, რომ ტრამპის სატარიფო პოლიტიკა Apple-ის ხარჯებს მომავალ კვარტალში მინიმუმ 900 მილიონი დოლარით გაზრდის.

საერთო ჯამში, Microsoft-ის მხრიდან მოლოდინების გადაჭარბებამ მისი აქციების მკვეთრი ზრდა გამოიწვია, Apple-ის გაუარესებულმა სამომავლო პროგნოზმა კი პირიქით - მისი კაპიტალიზაცია შეამცირა, ამიტომაც პლანეტის უმსხვილესი კომპანიების რეიტინგში დღეს ეს მნიშვნელოვანი ცვლილება ვიხილეთ.