«The Times» (დიდი ბრიტანეთი): „ანტიევროპელი პოპულისტები მზად არიან, რომ ევროპარლამენტის არჩევნებში წარმატებას მიაღწიონ“

Date:

დიდი ბრიტანეთის გაზეთ „თაიმსში“ (The Times) გამოქვეყნებულია სტატია სათაურით „ანტიევროპელი პოპულისტები მზად არიან, რომ ევროპარლამენტის არჩევნებში წარმატებას მიაღწიონ“ (ავტორი - ბრუნო უოტერფილდი). „ევროკავშირში ახლო მომავალში შეიძლება ტექტონიკური პოლიტიკური ძვრები მოხდეს - ზაფხულში დაგეგმილ ევროპარლამენტის არჩევნებში შეიძლება პოპულისტურმა ულტრამემარჯვენე ძალებმა გაიმარჯვონ, რითაც ევროკავშირში მრავალწლიანი ცენტრისტული კონსენსუსი დაირღვევა“, - ნათქვამია მასალაში.

გთავაზობთ პუბლიკაციის შინაარსს:

ბერლინის ანალიტიკური ცენტრის პროგნოზის თანახმად, გამოკითხვები აჩვენებენ, რომ კონსერვატორები, ნაციონალისტები, უკიდურესად მემარჯვენეები და ევროსკეპტიკოსები ევროპულ საზოგადოებაში სულ უფრო მეტი პოპულარობით სარგებლობენ. ივნისისათვის, როცა ევროპარლამენტის კონტინენტური არჩევნების თარიღი მოახლოვდება, ისინი შეიძლება ერთ დიდ ევროპულ ოპოზიციურ დაჯგუფებად ჩამოყალიბდნენ - სიტუაციას ისეთი პირი უჩანს, რომ ევროკავშირის წევრ ქვეყნებში როცა ევროპარლამენტის არჩევნები გაიმართება, მათ უმრავლესობაში პოპულისტი პოლიტიკოსები გაიმარჯვებენ.

„პოპულისტური დარტყმითი ტალღა“ დაფარავს საფრანგეთს, იტალიას, პოლონეთს, ნიდერლანდებს, ბელგიას, უნგრეთს, ავსტრიას, სლოვაკეთს და ჩეხეთს, რითაც ევროკავშირში ცენტრისტული კონსენსუსი დაირღვევა. გარდა მისა, პროგნოზების მიხედვით, ის პარტიები, რომლებიც ოდესღაც ექსტრემისტულად და მარგინალურად იყვნენ მიჩნეული, მეორე ადგილს დაიკავებენ გერმანიაში, შვედეთში, ლატვიაში, ესტონეთში და ბულგარეთში ჩატარებულ ევროპარლამენტის არჩევნებში, ხოლო მესამე ადგილს - პორტუგალიაში.

სამომავლო ცვლილებებეი ბლოკში შეშფოთებას იწვევს. „იმის რისკი, რომ ევროპა უმართავი გახდება, სრულიად რეალურია“, - ამბობს საფრანგეთის საგარეო საქმეტა მინისტრი სტეფან სეჟურნე, რომელიც ემანუელ მაკრონის პარტიის „აღორძინების“ ლიდერია და იმავდროულად ევროპარლამენტის დღევანდელ შემადგენლობაში ცენტრისტულ ჯგუფს „ევროპულ განახლებას“ ხელმძღვანელობს.

ამ დროს კი ევროკავშირის ზოგიერთი მაღალჩინოსანი პოლიტიკოსი, ჟოზეპ ბორელის ჩათვლით, ყურადღებას არ აქცევს პოპულისტური მოძრაობის გაძლიერებას და მსზე ფიქრით „თავს არ იტკივებენ“. ისინი ამ ყველაფერს „ჰორმონალური სპაზმებით“ და „დეზინფორმაციის გავრცელებით“ ხსნიან, რომლებიც ევროპელებში დაბნეულობა შეაქვთ.

მაგრამ ბრიუსელელი ანალიტიკოსი, პროფესორი ფრანკ ფურედი თვლის, რომ პოპულისტების მომრავლების ნამდვილი მიზეზი ამომრჩეველთა უკმაყოფილებაა - იმ რიგითი ამომრჩევლებისა, რომლებსაც „დიდი ხნის განმავლობაში ქედმაღლურად უყურებდნენ და მათ ინტერესები იგნორირებული იყო“.

„პოლიტიკური მიწისძვრა ევროპაში სწრაფად ახლოვდება. მილიონით ევროპელი ამბობს: „გვეყოფა ამდენი მოთმენა, ჩვენ მეტად აღარ ვენდობით იმ პოლიტიკოსებს, რომლებმაც თავი მოგვაბეზრეს და ყელში გვყავს ამოსული. დგება პოპულარული იდეების მქონე ადამიანებისადმი ნდობის მომენტი“, - ხაზს უსვამს ექსპერტი.

წყარო: https://www.thetimes.co.uk/article/anti-eu-populists-poised-to-dominate-in-european-elections-brtrh5hp2

მეუფე შიო - განსაკუთრებით გვამხნევებს ღირსი გაბრიელის სიტყვები, რომ სულიწმინდის მადლს არასდროს დაუტოვებია საქართველო და არც არასდროს მოაკლდება

მხოლოდ გულმოწყალე ადამიანმა შეიძლება დაიმკვიდროს სასუფეველი, - ამის შესახებ საპატრიარქო ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი)სულთმოფენობიდან ოცდამეერთე კვირას, ღირსი გაბრიელ აღმსარებლისა და სალოსის ხსენების დღეს ქადაგების დროს განაცხადა.

მიტროპოლიტის თქმით, ცათა სასუფევლის დამკვიდრებისთვის საჭიროა, ისე მოვალბოთ ჩვენი გული, რომ მასში შემოვიდეს სულიწმინდის მადლი, რომელიც ფერს უცვლის ადამიანს...

მისივე განცხადებით, დღევანდელ მსოფლიოში, როდესაც ასეთი სულიერი ძნელბედობაა, ჩვენ განსაკუთრებით გვამხნევებს ღირსი გაბრიელის სიტყვები, რომ სულიწმინდის მადლს არასდროს დაუტოვებია საქართველო და არც არასდროს მოაკლდება“.

„სახელითა მამისათა და ძისათა და სულისა წმინდისათა.

ძვირფასო მამებო, დედებო, ძმებო და დებო, გილოცავთ დღევანდელ კვირა დღეს, რომელიც დაემთხვა ღირსი გაბრიელ სალოსისა და აღმსარებლის ხსენებას. შეგვეწიოს მისი მადლი და ლოცვა ჩვენ და სრულიად საქართველოს.

გადმოგცემთ მისი უწმინდესობის და უნეტარესობის, კათოლიკოს-პატრიარქ ილია II-ის მოლოცვას და კურთხევას.

დღეს წაკითხული იყო იგავი სახარებიდან მდიდარსა და ლაზარეზე. ეს ორი ადამიანია, ორი სახეა წარმოდგენილი ჩვენ წინაშე. მდიდარს საერთოდ არ ენაღვლებოდა, რომ მის კართან იწვა მძიმე ავადმყოფი და გლახაკი, სრულიად გულგრილი იყო მისი ბედისადმი. ლაზარე კი ძალიან მოკრძალებული იყო. მას ის კი არ უნდოდა, რომ მდიდრის სუფრიდან ლანგრით მიეტანათ მისთვის საჭმელი, არამედ იმას ნატრობდა, რომ ძირს დაცვენილი ნამცეცი მაინც შეხვედროდა. იმდენად ავად იყო, რომ სიარულიც კი არ შეეძლო. ამ მდიდარს ეს ამბავი სრულიად არ აღელვებდა, ის იმდენად გართული იყო თავისი ნადიმებით და ფუფუნებით. გარდაცვალების შემდეგ ყველაფერი შეიცვალა, ღარიბი აღმოჩნდა აბრაამის წიაღში, მდიდარი კი - ცეცხლოვან გეენიაში, ჯოჯოხეთში.

რატომ მოხდა ასე? რაზეა ეს იგავი, საერთოდ?

ეს იგავი არის მოწყალებაზე. ასე იმიტომ მოხდა, ძვირფასო ძმებო და დებო, რომ ღმერთი არის მოწყალე. მხოლოდ გულმოწყალე, მოწყალე გულის მქონე ადამიანმა შეიძლება დაიმკვიდროს სასუფეველი. ვერცერთი ულმობელი, ვერცერთი უსიყვარულო, სასტიკი, ბოროტი ადამიანი სასუფეველს ვერ დაიმკვიდრებს, რაგინდ ბევრი დამსახურება ჰქონდეს ამ დედამიწაზე, იმიტომ რომ ცათა სასუფეველი არ არის ის, რაც გაიცემა რაღაც დამსახურებების სანაცვლოდ, არამედ ცათა სასუფევლის დამკვიდრებისთვის საჭიროა, ისე მოვალბოთ ჩვენი გული, რომ მასში შემოვიდეს სულიწმინდის მადლი, რომელიც ფერს უცვლის ადამიანს და ხარბიდან გადააქცევს ხელგაშლილად, ამპარტავნიდან - თავმდაბლად, შურიანიდან - მოსიყვარულედ, ნაყროვანიდან - მმარხველად და ა. შ. არცერთი ულმობელი ადამიანისთვის, ვინც არ არის მოწყალე გულის მქონე, ეს ფერისცვალება შესაძლებელი არ არის. ვერ მოხდება ეს სასწაული მის სულში. ვიმეორებ: რატომ? - იმიტომ, რომ ასეთი ადამიანის სულში სულიწმინდის მადლი ვერ შემოდის.

ამიტომ მთელი ცხოვრება უნდა იღვაწოს ადამიანმა ქმედით სიყვარულში, რომ ეს ლმობიერება და მოწყალება ისწავლოს. სწორედ ამაზეა დღევანდელი იგავი, რომ ვისწავლოთ ეს თვისებები, ეს სათნოებები და ჩვენი ცხოვრების შედეგად ამ მდიდრის მსგავსად არ აღმოვჩნდეთ ცეცხლოვან გეენიაში, არამედ მოვემზადოთ მარადისობასთან შესახვედრად. ეს ცხოვრება იმისთვის გვაქვს მოცემული, რომ ღირსეულად მოვემზადოთ მარადისობაში გადასვლისთვის, როცა იქნება სამსჯავრო ჩვენი, როცა წარვდგებით სამსჯავროზე. თუმცა სამსჯავრო არის მთელი ცხოვრება, ადამიანი ამ ცხოვრებაშივე გამოუტანს განაჩენს თავის თავს და აკეთებს არჩევანს, თუ სად იქნება მარადისობაში.

თუ ამ ცხოვრებაში შეიძინე შური, უმოწყალობა, სიძვა, ვერცხლისმოყვარეობა, ამპარტავნება და სხვა ასეთი ვნებები, მარადისობაშიც თან წაგყვება ეს თვისებები, იქაც ასეთი იქნები. მაგრამ უფალს უნდა, რომ შეიძინო სიმდაბლე, სიყვარული, ლოცვა, მოთმინება, სულგრძელება, მოწყალება. რატომ? - იმიტომ, რომ თვითონ არის ასეთი უფალი ჩვენი იესო ქრისტე; და თუ ეს თვისებები გექნება, მაშინ ის თავისთან წაგიყვანს და გაცხონებს.

ძვირფასო ძმებო და დებო, მაგრამ ეს ადამიანის დახმარების გარეშე შეუძლებელია. თუ ადამიანს ეს არ უნდა, ყველაფერი ამაო იქნება, ხოლო თუ უნდა და იღვწის ამისთვის, მაშინ უფალი აუცილებლად შეეწევა მას, განკურნავს ამ ვნებებისგან და აცხონებს.

ასე რომ, დავფიქრდეთ ამ იგავზე: ვინ ვართ ჩვენ - მდიდარი თუ ლაზარე? და თუ ჩვენს თავში ჯერ კიდევ ვხედავთ ამ უმოწყალო მდიდრის თვისებებს, გონს მოვიდეთ, სანამ კიდევ გვაქვს ფიზიკური და სულიერი ძალები, რომ ფერი ვიცვალოთ და გამოვსწორდეთ.

დღეს არის ღირსი გაბრიელ სალოსისა და აღმსარებლის ხსენება. საოცარი სიხარული სუფევს დღეს ჩვენს მსახურებაზე, ძალიან ბევრი ხალხია შეკრებილი. გილოცავთ ამ დღესასწაულს. შეგვეწიოს მამა გაბრიელის ლოცვა და მადლი.

იგი იყო სრულიად გამორჩეული ადამიანი და მოღვაწე ჩვენი ეკლესიის უახლეს ისტორიაში. მოგეხსენებათ, ის მოღვაწეობდა ათეისტურ პერიოდში და მრავალ ადამიანს გაუნათა გზა უფლისკენ, რისთვისაც იგი მრავალჯერ ტანჯეს, დევნეს, გვემეს და დააპატიმრეს. ის ამ თავის დიდ სულიერებას ფარავდა სალოსობის ღვაწლით. ამის გამო, მრავალჯერ შეშლილი ეგონათ, მაგრამ, როგორც ამბობს პავლე მოციქული: „სულელი იგი ღვთისა უბრძენეს არს კაცთა“ (1 კორ. 25). თავისივე სიცოცხლეში ის მრავალ სასწაულს აღასრულებდა და მისი გარდაცვალების შემდეგ კიდევ უფრო მეტი სასწაული სრულდება, ადამიანები მოდიან არამხოლოდ საქართველოს სხვადასხვა კუთხიდან, არამედ მსოფლიოს სხვადასხვა მხარიდან და წმინდა გაბრიელის ლოცვით უფალი მათ უსრულებს თხოვნას და ანიჭებს სულიერ და ხორციელ კურნებებს.

დღეს, დღევანდელ მსოფლიოში, როდესაც ასეთი სულიერი ძნელბედობაა, ჩვენ განსაკუთრებით გვამხნევებს ღირსი გაბრიელის სიტყვები, რომ სულიწმინდის მადლს არასდროს დაუტოვებია საქართველო, საქართველოს არასდროს მოჰკლებია სულიწმინდის მადლი და არც არასდროს მოაკლდება.

მაშ, დღეს, მისი ხსენების დღეს, განსაკუთრებით ვევედროთ ღირს გაბრიელს, აღმსარებელსა და სალოსს, რომ მისი ლოცვით უფალმა დაიფაროს და გააძლიეროს ჩვენი ქვეყანა, ჩვენი ეკლესია, გააძლიეროს და ადღეგრძელოს სრულიად საქართველოს კათოლიკოს-პატრიარქი ილია II და შეგვეწიოს ღირსი მამა გაბრიელი, რომ ამ ლაზარეს მსგავსად, უფალმა დაგვამკვიდროს აბრაამის წიაღში, რათა დავტკბეთ იმ გამოუთქმელი სიკეთეებით, რომლებიც „თვალს არ უნახავს და ყურს არ სმენია“ (1 კორ. 2,9), რისი ღირსიც დაე, გავმხდარიყავით მადლითა და კაცთმოყვარებითა უფლისა ჩვენისა იესო ქრისტესითა, რომელსაც შვენის ყოველი დიდება, პატივი და თაყვანისცემა, თანა მამით და სულიწმინდითურთ, აწ და მარადის და უკუნითი უკუნისამდე. ამინ.

ჩვენთან არს ღმერთი!“, - განაცხადა მეუფე შიომ.