TBC Capital-ის მიმოხილვის თანახმად, საცხოვრებელი უძრავი ქონების ბაზარი სტაბილურ ფაზაში შედის, ხოლო კომერციული უძრავი ქონების ბაზარზე მოთხოვნა მაღალი კლასის სავაჭრო და ბიზნეს ცენტრებისკენ ინაცვლებს.

2025 წლის 8 თვეში ტრანზაქციები 0.5%-ით გაიზარდა და 25,219 შეადგინა.

მოთხოვნასთან ერთად დასტაბილურდა უძრავი ქონების გასაყიდი ფასიც.

"თბილისის საცხოვრებელი უძრავი ქონების ფასები უახლოვდება ევროპის რიგ ქვეყნებში არსებულ დონეს",- წერია პუბლიკაციაში.

TBC Capital-ში აღნიშნავენ, რომ მათი მოლოდინების შესაბამისად, ქირა განაგრძობს შემცირებას.

თბილისის უძრავი ქონების ბაზარზე პოტენციური მიწოდება აგრძელებს ზრდას და კონკურენცია კიდევ უფრო მძაფრდება. 2025 წლის 8 თვეში გაცემული პროექტების დაახლოებით 60% უკვე მშენებლობის ფაზაშია.