,
2023 წელი სამშენებლო-დეველოპერულ სექტორისთვის მნიშვნელოვანი და გამორჩეული წელი იყო. მიუხედავად იმისა, რომ 11 თვის მონაცემებით, ტრანზაქციების რიცხვი 2022 წლის ანალოგიურ პერიოდთან შედარებით შემცირებულია, სექტორის წარმომადგენლები აცხადებენ, რომ ბაზარი ჯანსაღია და ის სტაბილურად ვითარდება.
ბიზნესს რომ მოთხოვნის ნაწილში პოზიტიური მოლოდინები აქვს, მეტყველებს ის ფაქტიც, რომ 2023 წელს არაერთი მასშტაბური პროექტი დაანონსდა.
გთავაზობთ TOP 10 პროექტს, რომელიც გადაცემა "უძრავი ქონების პროსპექტის" შეფასებით, ყველაზე გამორჩეული კონცეფციისა და მნიშვნელობის იყო.
1) „ცათამბრეჯენები გმირთა მოედანზე“ - წლის ბოლოს თბილისის საკრებულომ გმირთა მოედანთან მრავალფუნქციური ცენტრის პროექტს მხარი დაუჭირა. პროექტის თანახმად, თბილისის ცენტრალურ ნაწილში 52 და 40-სართულიან შენობებში აშენდება. თითოეულში 1000-1000 საცხოვრებელი ბინა და კომერციული ფართი იქნება, ჯამში, პროექტი 155 599 კვადრატულ მეტრს მოიცავს.
2) „ალიანს რენესანსი“ – სპორტულ გამაჯანსაღებელი პროექტი ქობულეთში, რომელსაც სამშენებლო-დეველოპერული კომპანია „ალიანს ჯგუფი“ აშენებს. კომპლექსი საერთო პოდიუმით აკავშირებს A, B, და C თაუერებს, ისევე როგორც დამოუკიდებელ, 14 სართულიან, საერთაშორისო ბრენდის სპორტულ-გამაჯანსაღებელ ცენტრსა და მის უნიკალურ, 25 სახეობის თერაპიული პროცედურების სივრცეს. პროექტის საინვესტიციო ღირებულება 220 000 000$-ია.
3) „VR Vake Skyview Tower“ - კომპანია VR Holding-ის პრემიუმ კლასის პროექტია, რომელიც ვაკეში, ჭავჭავაძის 49-ში, კერძოდ, ყოფილი სპორტის უნივერსიტეტის ადგილას განთავსდება. მისი სიმაღლე 180 მეტრი იქნება, რითაც თბილისში ყველაზე მაღალი შენობის სტატუსს შეიძენს.
მულტიფუნქციური კომპლექსის ბოლო სართულზე ამიერკავკასიაში ყველაზე დიდი საცურაო აუზი განთავსდება. ამასთან, შენობის სახურავზე ვერტმფრენის ასაფრენი მოედნის მოწყობაც იგეგმება.
4)„საკენი“ & „მატიანი“ - 2023 წლის მაისში დეველოპერულ ბაზარზე კიდევ ერთი მსხვილი მოთამაშე „ბიოგრაფი ლივინგი“ გამოჩნდა, რომელიც "ვისოლ ჯგუფის" პორტფელში შემავალი კომპანიაა. წლის განმავლობაში „ბიოგრაფი ლივინგმა“ ბაზარს ორი საცხოვრებელი პროექტი წარუდგინა.
„საკენი“ რომელიც 90,000 კვ.მ.-ს აჭარბებს და აქტიურ სამშენებლო ფაზაშია. მეორე კი "„მატიანია,“ რომელიც დიდუბეში წერეთლის #45-ში აშენდება. ეს იქნება მულტიფუნქციური საცხოვრებელი კომპლექსი, რომელიც საცხოვრებელ, საოფისე და კომერციულ ფართებს გააერთიანებს. პროექტს ექნება 25 მეტრიანი საცურაო აუზი, სპა და ფიტნესი. 31-სართულიანი კომპლექსის ფართი 60,000 კვ.მ.-ა, მომხმარებელს კომპლექსში ბინადრობა 2026 წლიდან შეეძლება.
5) "არქი მაიამიში“ - კომპანია „არქი“ ამერიკულ დეველოპერულ კომპანია „ელიტ გრუპთან“ პარტნიორობით ფლორიდის შტატში, პომპანოს სანაპიროზე მულტიფუნქციურ საცხოვრებელ სახლს აშენებს. ის 97 ბინას, აუზს, საერთო სამუშაო სივრცეს, ლაუნჯს, გოლფის სათამაშო სივრცეს, შიდა/გარე ფიტნეს ცენტრებსა და 129 საპარკინგე ადგილს გააერთიანებს. პროექტის ჯამური ინვესტიცია 50 მლნ დოლარს შეადგენს. მისი დასრულება 2026 წელს არის დაგეგმილი.
6) „ლისი ტრიო“ - მულტიფუნქციური პროექტია ლისის ტბის მიმდებარედ, რომელიც 60 000 კვ.მეტრზე შენდება და საცხოვრებელთან ერთად, საოფისე და კომერციულ ფართებს გააერთიანებს. ახალი კომპლექსი ამაშუკელის ქ #5 ხორციელდება და სამ 15 სართულიან კორპუსს, 200 საპარკინგე ადგილზე გათვლილ ორ მიწისქვეშა სართულს გააერთიანებს. პროექტის ბიუჯეტი 35$ მლნ-ია.
7) „ცენტრალ პარკ თაუერი“ - თბილისში, ყაზბეგის გამზირზე, კომპანია „ორბი ჯგუფი“ და „ბლოკ ჯგუფი“ 300$ მლნ-იან პროექტს აშენებენ. პროექტი 140 000 კვ/მ ფართობისგან შედგება და ორ 42-სართულიან თაუერსს 6-სართულიანი პოდიუმით გააერთიანებს. "ცენტრალ პარკ თაუერსი", 1500-ნომრიანი 25-ი 5-ვარსკვლავიანი სასტუმროების ჰაბია, სადაც 150 ნომერზე ოპერირებას “რედისონ ბლუ” განახორციელებს. პარკ თაუერსი პირველ სტუმრებს 2025 წლის მაისში მიიღებს.
8) „პეტრა სი რეზორტი“ - ციხისძირში მშენებარე ახალი მრავალფუნქციური კომპლექსია, რომელიც 42 შენობას მოიცავს. ცენტრალურ შენობაში 150-ნომრიანი 5-ვარსკვლავიანი ბრენდული სასტუმრო განთავსდება. პროექტის გამორჩეული არქიტექტურის მქონე, ყველაზე მაღალ 54-სართულიან შენობას კი 1000 ბრენდული რეზიდენცია დაიკავებს. „პეტრა სი რეზორტის“ მხოლოდ 30%-ზე განთავსდება შენობები, ხოლო კომპლექსის მთლიანი ფართის 70%-ს ინსფრასტრუქტურა და რეკრეაციული ზონები დაიკავებს. კომპლექსის სამშენებლო სამუშაოების პირველი ეტაპი 2025 წლის ბოლოსკენ დასრულდება.
9) “სითიზენი“ – 300$ მლნ-იანი პროექტი, რომელიც თბილისში, უნივერსიტეტის ქუჩაზე მდებარე, ე.წ. ზაკვოს შენობის ადგილას ხორციელდება. პროექტი "სითიზენი" 46 000 კვ/მეტრზე განთავსდება, საიდანაც 22 000 კვადრატული მეტრი რეკრეაციულ ზონას დაეთმობა. კომპლექსი ოთხი საცხოვრებელი ბლოკისგან და ერთი 32 სართულიანი თაუერისგან შედგება. ტერიტორიაზე რეკრეაციული სივრცე, ხელოვნურ ტბა, ZEN სივრცე, იაპონურ ბაღი და საბავშვო მოედანი მოეწყობა.
10) „იდეა პანორამა“ - კიდევ ერთი მასშტაბური პროექტია, რომელიც კომპანია "იდეა დეველოპმენტმა" 2023-ში წარადგინა. პროექტის ჯამური ინვესტიცია 100მლნ ლარზე მეტია. პროექტი ვაკე-საბურთალოს ტერიტორიაზე მდებარეობს და 3 ჰა-ს მოიცავს.
კომპლექსი სამი დამოუკიდებელი ბლოკისგან შედგება, სადაც განთავსდება სკვერი საბავშვო-სათამაშო ზონებით, პადელის მოედანი, ასევე საერთო სარეკრეაციო ზონები, მათ შორის სასეირნო ბილიკები და გამწვანებული ტერასა. მშენებლობა ეტაპობრივად წარიმართება, მისი დასრულება კი 2025 წლის შემოდგომაზეა გათვალისწინებული.
წყარო:https://bm.ge/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
