,
დონალდ ტრამპის მეორე საპრეზიდენტო ინაუგურაციას არაერთი მილიარდერი დაესწრო, მათ შორის ილონ მასკი, ჯეფ ბეზოსი, სერგეი ბრინი, მარკ ზაკერბერგი და ბერნარ არნო. თავად ინაუგურაცია სიმდიდრით ყველაზე დიდი ყრილობა იყო, რომელთა დამსწრეების ჯამური ქონება $1.2 ტრილიონს აღწევდა, რაც დაახლოებით იმდენია, რამდენიც ნიდერლანდების ან თურქეთის მთლიანი შიდა პროდუქტი. თავად ამ შეფასებას კი, იმ დროს, მილიარდერები სწორედ დონალდ ტრამპს უმადლოდნენ, რადგან პრეზიდენტად რესპუბლიკელი კანდიდატის არჩევამ კაპიტალის ბაზრებზე დიდი ზრდა გამოიწვია.
თუმცა კი, ყველა დიდ ზრდას დიდი კლება ახლავს ხოლმე და საფონდო ბირჟის კოლექტიური ისტორია, სწორედ ამის დასტურია. დონალდ ტრამპის საპრეზიდენტო ინაუგურაციიდან თითქმის ორი თვე გავიდა, რა დროსაც ბაზარზე არსებული აღელვება, ანუ ე.წ. “ჰაიპი” ფაქტობრივად სრულად განეიტრალდა. დონალდ ტრამპის პოზიტიური ეფექტი რამდენიმე პოლიტიკურ დაპირებას ეფუძნებოდა, რომლებიც, ჯერჯერობით, არ გამართლდა და, შესაძლოა, არც არასდროს გამართლდეს, რამაც ინვესტორებში შიში და პანიკა წარმოშვა, რაც კაპიტალის ბაზრიდან ასობით მილიარდი დოლარის გადინებით გამოიხატა.
საფონდო ბირჟებზე ფასების კლება ყველაზე მეტად პლანეტის უმდიდრესმა ადამიანმა, ილონ მასკმა იგრძნო. გასული წლის დეკემბერში დაფიქსირებული ლოკალური პიკის შემდეგ, როცა TESLA-ს აქციები $480-ად ივაჭრებოდა, აქციის ფასმა 54%-ით იკლო. მხოლოდ გუშინ, TESLA-ს საბაზრო კაპიტალიზაცია 15%-ზე მეტით შემცირდა, რაც ნიშნავს, რომ ილონ მასკმა სრულად დაკარგა ის ამონაგები, რომელიც მილიარდერმა და მისმა კომპანიამ საარჩევნო ბუსტით მიიღეს. საპრეზიდენტო ინაუგურაციის შემდეგ, ილონ მასკის ქონებამ $148 მილიარდით იკლო.
ილონ მასკის შემდეგ, ქონების მკვეთრი შემცირებით განცდილი ტკივილი Amazon-ის დამფუძნებელმა ჯეფ ბეზოსმაც იგრძნო, რომელმაც ამ პერიოდში $29 მილიარდი დაკარგა. დონალდ ტრამპის პირველი საპრეზიდენტო ვადის დროს, ამერიკელი მილიარდერი პრეზიდენტის მოწინააღმდეგე იყო, მაგრამ წელს, ვითარება მკვეთრად შეიცვალა, ხოლო ჯეფ ბეზოსმა პრეზიდენტის საინაუგურაციო ფონდში $1 მილიონიც კი ჩარიცხა. დროსთან ერთად ასევე შეიცვალა ბეზოსის საკუთრებაში არსებული გამოცემის, Washington Post-ის სარედაქციო პოლიტიკა.
საპრეზიდენტო ინაუგურაციის შემდეგ ქონების მსუყე ნაწილი Google-ის თანადამფუძნებელმა და ერთ-ერთმა უდიდესმა აქციონერმა, სერგეი ბრინმაც დაკარგა. ჯეფ ბეზოსის მსგავსად, დონალდ ტრამპის პირველი საპრეზიდენტო ვადას ისიც აპროტესტებდა, მაგრამ ახლა, პრეზიდენტის მიერ ორგანიზებულ ექსკლუზიურ ვახშმებს ესწრება. პრეზიდენტთან ამგვარი სიახლოვის მიუხედავად, ტრამპის ეფექტი სერგეი ბრინმაც იგრძნო, რომლის ქონებამ ინაუგურაციის შემდეგ $22 მილიარდით იკლო.
ქონებადაკარგულ მილიარდერებს შორის ასევე მოხვდა მსოფლიოს უდიდესი სოციალური ქსელების მფლობელი ჰოლდინგის, META-ს დამფუძნებელი, მარკ ზაკერბერგი. წლის დასაწყისიდან დღემდე, დიდი შვიდეულის აქციებს შორის META-მ საუკეთესო შედეგი დააფიქსირა და, რეალურად, დიდი ხნის განმავლობაში, S&P 500-ის ზრდაზე უდიდეს გავლენას სწორედ META ახდენდა. იანვრის შუა რიცხვებიდან თებერვლის შუა რიცხვებამდე META-მ 19%-იანი ზრდა დააფიქსირა, მაგრამ მას შემდეგ, კომპანიამ აღნიშნული ნამატი დაკარგა, ხოლო თავად მარკ ზაკერბეგმა $5 მილიარდის ქონება დაკარგა.
აგრეთვე $5-მილიარდიანი კლება განიცადა ფრანგმა მილიარდერმა ბერნარ არნომ, რომელიც დონალდ ტრამპის პირადი მეგობარია. გასული წლის განმავლობაში, LVMH-ის აქციების ფასმა არც თუ ისე სახარბიელო შედეგი დააფიქსირა, რაც ჩინეთში გაყიდვების მკვეთრ შემცირებასთანაა დაკავშირებული, მაგრამ საპრეზიდენტო არჩევნებიდან იანვრის ბოლომდე LVMH-მა 20%-იანი ზრდა დააფიქსირა. მას შემდეგ კი, ამონაგები LVMH-მა ისევე დაკარგა, როგორც სხვა კომპანიებმა, რასაც თან ერთვის ევროკავშირისთვის ტარიფების შესაძლო დაწესების საკითხი, რომელმაც, შესაძლოა, მაღალი მოდის ფრანგული გიგანტის შემოსავალი კიდევ უფრო შეამციროს.
წყარო: https://bm.ge/
