„ეროვნულ - დემოკრატიული ინსტიტუტის“ (NDI)-ის კვლევის მიხედვით, გამოკითხულთა 37% ფიქრობს, რომ „საქართველო არასწორი მიმართულებით ვითარდება“, 33% მიიჩნევს, რომ „საქართველო სწორი მიმართულებით ვითარდება“, ხოლო 25% -ის აზრით „საქართველო საერთოდ არ იცვლება“.

ორგანიზაციის ცნობით, მოსახლეობის აზრი გაყოფილია იმასთან დაკავშირებით, თუ რა მიმართულებით ვითარდება ქვეყანა, თუმცა დადებითი შეფასების მაჩვენებელი ოდნავ გაზრდილია. ამასთან, კვლევის თანახმად, ქვეყნის მიმართულებასთან დაკავშირებით ყველაზე კრიტიკულად თბილისის მცხოვრებლები, ოპოზიციის მხარდამჭერები და ქალები არიან განწყობილნი.

როგორც ორგანიზაციის მიერ გამოქვეყნებულ კვლევაშია აღნიშნული, 2022 წელთან შედარებით, მეტი ადამიანი ფიქრობს, რომ საქართველო დემოკრატიაა. კითხვაზე: „თქვენი აზრით, საქართველოში ამჟამად არის დემოკრატია?“ 46% ფიქრობს, რომ „არის“. 44%-ის აზრით „არ არის“, ხოლო 9%-მა „არ იცის“.

კვლევის მიხედვით, გამოკითხულთა 69% ფიქრობს, რომ საქართველოში თავს დაცულად გრძნობს, 30%-ს კი ჰგონია, რომ დაუცველია, თავს ყველაზე ნაკლებად დაცულად დიდი ქალაქების მცხოვრებლები, ქალები, 18 -34 წლის ადამიანები და ოპოზიციის მხარდამჭერები გრძნობენ.

ამასთან, კვლევის მიხედვით, მოქალაქეები თავს დაუცველად, ძირითადად, სიღარიბის გამო გრძნობენ, მეორე ადგილზეა უმუშევრობა, სამუშაო ადგილების ნაკლებობა, ხოლო მესამეზე ინფლაცია, მაღალი ფასები.

როგორც ორგანიზაციის მიერ გამოქვეყნებულ კვლევაშია აღნიშნული, უმრავლესობა ფიქრობს, რომ საჯარო სივრცეებში მათი და მათი შვილების უსაფრთხოება დაცულია, თუმცა მოსახლეობის მეოთხედი ამბობს, რომ არ იცის, როგორ მოიქცეს საგანგებო სიტუაციების დროს და როგორ გასწიოს პირველადი დახმარება.

კვლევის მიხედვით, გამოკითხულთა 45% ეთანხმება მოსაზრებას, რომ ქვეყნის მომავლის მიმართ ოპტიმისტურად განწყობილია, 39% არც ეთანხმება და არც არ ეთანხმება, ხოლო 14% არ ეთანხმება.

ცნობისთვის, კვლევის მიზანია, ხელი შეუწყოს ისეთი პოლიტიკისა და მმართველობის ჩამოყალიბებას, რომელიც უფრო მეტად იქნება მორგებული მოსახლეობის საჭიროებებზე. აღნიშნული ანგარიში 14 ოქტომბრიდან 4 ნოემბრამდე ქვეყნის მასშტაბით ჩატარებულ, საქართველოს ზრდასრული მოსახლეობის წარმომადგენლობით პირისპირი გამოკითხვის შედეგებს ემყარება (ოკუპირებული ტერიტორიების გამოკლებით). ოქტომბერში ჩატარებული გამოკითხვა სულ 2,068 დასრულებულ ინტერვიუს მოიცავს. საშუალო ცდომილების ზღვარი კვლევაში +/- 2,2 პროცენტია.