რონდელის ფონდის მკვლევარი ზურაბ ბატიაშვილი საკუთარ ფეისბუკის გვერდზე ეხმაურება უკრაინაში მიმდინარე საომარ ვითარებას და აანალიზებს თუ რატომ შეეცდება პუტინი ერთი დიდი შეტევის ორგანიზებას:
"კრემლში შესანიშნავად ესმით, რომ დასავლური ტანკებისა და სხვა სერიოზული შეიარაღების ჩამოსვლა ფრონტის ხაზზე რუსეთისთვის ომის წაგებას ნიშნავს. ისინი ფიქრობენ, რომ დასწრებაზე მოქმედებაა საჭირო და ამიტომ შეეცდებიან ამ შეიარაღების ჩასვლამდე შეუტიონ უკრაინელებს.
მაგრამ ცხადია, რუსეთს სერიოზულ დახმარებას არავინ გაუწევს და მათ კიდევ უფრო ძველი, უმეტეს შემთხვევაში საბჭოთა პერიოდში წარმოებული შეიარაღებით მოუწევთ ბრძოლა. ცალკე საკითხია, რომ მათი მობილიზებულები ცუდად არიან მომზადებული.
ამიტომ კიდევ უფრო დიდი იქნება რუსების მსხვერპლი. მაგრამ ეს არც პუტინს ადარდებს და არც რუსეთის მოსახლეობას, რომლებიც მორჩილად მიყვებიან უფროსობას სასაკლაოზე.
მეორე საკითხია, რამდენად შედეგიანი იქნება მათი ეს წამოწყება. საეჭვოა, რომ მათ ამ ომში რაიმე სახის სტრატეგიული გარდატეხის შეტანა მოახერხონ. თუ რაიმე სახის წინსვლა ექნებათ, ეს იქნება უდიდესი დანაკარგების შედეგად, რაც დავინახეთ კიდეც სოლედართან გამართული ბრძოლებისას.
ასეთ შემთხვევაში რუსები შეტევის შემდეგ კიდევ უფრო გამოიფიტებიან და უკრაინას გაუადვილდება წარმატებული კონტრშეტევის განხორციელება. ამიტომ ამ ბრძოლებში უკრაინელებს მაგალითად ბახმუტის ან მსგავსი დასახლებების დატოვებაც რომ მოუწიოთ, სტრატეგიულად ეგ არაფერს ცვლის. თან ეს იქნება რუსების ბოლო დიდი შეტევა ან შეტევის მცდელობა (არც ისაა გამორიცხული, რომ უკრაინელებმა შეძლონ მაგ შეტევის ჩაშლა).
დასავლური შეიარაღების დიდი რაოდენობის ჩამოსვლის შემდეგ კი უკრაინელები ყველაფერს დაიბრუნებენ.
უკრაინა გაიმარჯვებს და ეს წელს მოხდება!"
