,
ევროკავშირი, უკრაინის უსაფრთხოებასთან დაკავშირებით, გრძელვადიან ვალდებულებს ამზადებს. ამის შესახებ კიევში ვიზიტისას ჟოზეფ ბორელმა განაცხადა. ევროკავშირის უმაღლესი კომისარი უკრაინის დედაქალაქში კვირას, დღის მეორე ნახევარში ჩავიდა. ის პრეზიდენტ ვოლოდიმირ ზელენსკისა და საგარეო საქმეთა მინისტრ დმიტრო კულებას შეხვდა. მათ ერთად მიაგეს პატივი ომში დაღუპულ უკრაინის დამცველთა ხსოვნას.
მოგვიანებით კი ბორელი უკრაინის თავდაცვის ახალ მინისტრს, რუსტემ უმეროვს შეხვდა და ევროკავშირის სამხედრო დახმარების გაგრძელების საკითხი განიხილა. მანამდე ის ოდესაში მოულოდნელი ვიზიტით იმყოფებოდა, სადაც რუსული ძალების სარაკეტო თავდასხმის შედეგად დაზიანებული სპასო-პრეობრაჟენსკის ტაძარი დაათვალიერა.
„ევროკავშირის დახმარება უკრაინისთვის არა მარტო გრძელდება, არამედ მისი მოცულობაც იზრდება. ვამზადებთ გრძელვადიან ვალდებულებებს უკრაინის უსაფრთხოებასთან დაკავშირებით - უკრაინას მეტი შესაძლებლობა, თან უფრო სწრაფად სჭირდება. ჩვენი მხარდაჭერა არ არის კონიუნქტურული, ეს არის სისტემატური, სტრუქტურირებული დახმარება, რადგანაც ევროპისთვის ეგზისტენციალური საფრთხის წინაშე აღმოვჩნდით და მისი დროულად მოგვარებაა საჭირო. უკრაინელები იბრძვიან მთელი თავისი სიმამაცით და საშუალებებით, ჩვენი სურვილია მათ წარმატებას მიაღწიონ. ამიტომ ვალდებული ვართ მათ უფრო მეტი და უკეთესი იარაღი მივაწოდოთ“, - განაცხადა ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ჟოზეფ ბორელმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
