უკრაინის პრეზიდენტმა, ვოლოდიმირ ზელენსკიმ გამოცემა AXIOS-ს განუცხადა, რომ იმედოვნებს, კვირას დაგეგმილ შეხვედრაზე პრეზიდენტ ტრამპთან ერთად ომის დასრულების ჩარჩო ხელშეკრულებაზე შეთანხმდება.

ზელენსკიმ ასევე განაცხადა, რომ მზადაა აღნიშნული გეგმა რეფერენდუმზე გაიტანოს, თუ რუსეთი, სულ მცირე, 60-დღიან ცეცხლის შეწყვეტაზე დათანხმდება.

მიუხედავად იმისა, რომ ზელენსკიმ ხაზი გაუსვა მიღწეულ დიდ პროგრესს, ტრამპის გეგმა კვლავ მოითხოვს უკრაინისგან მტკივნეულ ტერიტორიულ დათმობებს ქვეყნის აღმოსავლეთში.

ზელენსკი კვლავ იმედოვნებს ამ პირობების გაუმჯობესებას და განაცხადა, რომ მას უკრაინელი ხალხის თანხმობის მოპოვება დასჭირდება, თუ ტერიტორიულ საკითხებთან დაკავშირებით „მტკიცე“ პოზიციის დაკავება ვერ მოხერხდება.

ამერიკული მხარე დიდ წინგადადგმულ ნაბიჯად მიიჩნევს იმას, რომ ზელენსკი მზადაა ჩაატაროს რეფერენდუმი და აღარ გამორიცხავს ტერიტორიულ დათმობებს.

თუმცა, როგორც ზელენსკიმ AXIOS-თან სატელეფონო ინტერვიუს დროს აღნიშნა, ასეთი პლებისციტის ჩატარებას თან ახლავს სერიოზული პოლიტიკური, ლოგისტიკური და უსაფრთხოების სირთულეები.

სწორედ ამიტომ, მას მიაჩნია, რომ 60-დღიანი ცეცხლის შეწყვეტა კენჭისყრის მოსამზადებლად და ჩასატარებლად „არის მინიმუმი“.

ზელენსკიმ ასევე აღნიშნა, რომ მისთვის ჯერ კიდევ გაურკვეველია, თანახმაა თუ არა თავად რუსეთი ტრამპის გეგმაზე.

ზელენსკიმ განაცხადა, რომ მას კვლავ სურს ტერიტორიულ საკითხებზე უფრო ხელსაყრელი პირობების მიღწევა. თუმცა, თუ გეგმა ამ საკითხთან დაკავშირებით „ძალიან რთულ“ გადაწყვეტილებას მოითხოვს, მას მიაჩნია, რომ საუკეთესო გამოსავალი მთლიანი 20-პუნქტიანი გეგმის რეფერენდუმზე გატანა იქნება.