,
უკრაინის პრეზიდენტი, ვოლოდიმირ ზელენსკი აშშ-ის მხრიდან მზარდ ზეწოლას განიცდის, რათა დაეთანხმოს პრეზიდენტ ტრამპის სამშვიდობო გეგმით გათვალისწინებულ მნიშვნელოვან ტერიტორიულ დანაკარგებსა და სხვა დათმობებს. ინფორმაციას ამის შესახებ ამერიკული გამოცემა AXIOS-ი ორ უკრაინელ ოფიციალურ პირზე დაყრდნობით ავრცელებს.
რამდენიმე კვირიანი ინტენსიური დიპლომატიის შემდეგაც კი, უკრაინელები კვლავ ფიქრობენ, რომ აშშ-ის ამჟამინდელი გეგმის გარკვეული ასპექტები მოსკოვისთვის სასარგებლოა და რომ აშშ ზელენსკის ბევრად უფრო მეტად უბიძგებს, ვიდრე ვლადიმირ პუტინს.
აშშ-ის ოფიციალურმა პირმა უარყო ეს, ხაზგასმით აღნიშნა რა, რომ აშშ ასევე ახდენდა ზეწოლას პუტინზე, რათა მასაც შეერბილებინა თავისი მოთხოვნები.
მოლაპარაკებები ფოკუსირებულია ორ საკითხზე: რუსეთის მოთხოვნაზე, რომ უკრაინამ დათმოს დონბასის რეგიონი, მათ შორის ის ნაწილებიც, რომლებსაც მისი ჯარები არ აკონტროლებენ, და უკრაინის მოთხოვნაზე უსაფრთხოების ძლიერი გარანტიების შესახებ აშშ-ის მხრიდან, რათა თავიდან იყოს აცილებული რუსეთის მომავალი აგრესია.
უკრაინელმა ოფიციალურმა პირმა განაცხადა, რომ კიევის გადმოსახედიდან აშშ-ის შეთავაზება გაუარესდა მას შემდეგ, რაც ტრამპის მრჩევლებმა, სტივ უიტკოფმა და ჯარედ კუშნერმა გასულ კვირას კრემლში პუტინთან ხუთსაათიანი შეხვედრა გამართეს.
ოფიციალური პირის თქმით, უიტკოფსა და კუშნერს, როგორც ჩანს, ზელენსკისგან მკაფიო „დიახ“ სურდათ, როდესაც ისინი შაბათს ორსაათიანი სატელეფონო საუბრის დროს მასთან გეგმას განიხილავდნენ.
„გვეგონა, რომ აშშ სხვადასხვა გზით ცდილობდა ჩვენთვის მიეყიდა რუსეთის სურვილი, დაეპყრო მთელი დონბასი და რომ ამერიკელებს უნდოდათ, ზელენსკის ყველაფერი მიეღო სატელეფონო ზარის დროს“, - განაცხადა უკრაინელმა ოფიციალურმა პირმა.
