ვოლოდიმირ ზელენსკიმ უკრაინის ნატოში გაწევრიანების მისწრაფება შეაფასა. მისი თქმით, კიევს უკვე მიახვედრეს, რომ ალიანსის „ღია კარის“ პოლიტიკა უკრაინაზე არ ვრცელდება. ამის შესახებ პრეზიდენტმა ლონდონში მიმდინარე Joint Expeditionary Force-ზე ონლაინგამოსვლისას განაცხადა.

„გასაგებია, რომ უკრაინა NATO-ს წევრი არ არის; ეს გვესმის, ადეკვატური ხალხი ვართ. წლების განმავლობაში ღია კარის შესახებ გვესმოდა, მაგრამ ახლა ასევე გავიგეთ, რომ იქ ჩვენ არ შევალთ და ეს უნდა ვაღიაროთ. მოხარული ვარ, რომ ჩვენი ხალხი ამის გაგებას იწყებს და ჩვენს თავსა და პარტნიორებზე ამყარებენ იმედებს, რომლებიც ჩვენ გვეხმარებიან“, - განაცხადა პრეზიდენტმა.

მან კიდევ ერთხელ მოუწოდა დასავლეთს უკრაინის ცის დახურვისკენ და ასევე აღნიშნა, რომ დადებითი გადაწყვეტილების შესაძლებლობა მაღალი არ არის.

„უკრაინა ახლა NATO-ს შეთანხმების მე-5 მუხლის ამოქმედებაზე პრეტენზიას არ აცხადებს. ჩვენ ყოველთვის ვამბობთ, რომ ჩვენი ცა ისე უნდა დავიცვათ, როგორც ალიანსის ცა, მაგრამ გვესმის, რომ ყოველთვის არსებობს „მაგრამ“ და როგორი იქნება ალიანსის პასუხი, თუ აღმოსავლეთ ევროპაში იქნებიან და მათ დაცვისთვის მიმართავენ, თუ მათთან რუსული რაკეტები ჩაფრინდება, ღმერთმა არ ქნას რუსული თვითმფრინავები... რუსეთი ჩვენი ლვოვის ოლქს დაესხა თავს, სარაკეტო თავდასხმა NATO-ს საზღვრიდან 20 კილომეტრში მოხდა. ალიანსის ტერიტორიაზე რუსული უპილოტოები უკვე ჩავარდა“, - თქვა ვოლოდიმირ ზელენსკიმ.

სამიტზე პრეზიდენტმა უკრაინის წინააღმდეგ რუსული აგრესიის შეჩერებისა და უსაფრთხოების ახალი გარანტიების შექმნის შესახებ თავისი ხედვა წარადგინა: „რუსული სამხედრო მანქანის, ხალხის დახოცვის შეჩერება კიდევ შეიძლება და თქვენ ხედავთ, როგორ ვიბრძვით. თქვენთან ერთად უფრო მარტივი იქნება. ახლა ყველაზე მთავარი ჩვენს მიწაზე დემოკრატიის ნგრევის შეჩერებაა ან ისინი თქვენთან მოვლენ“.

Unian-ი წერს, რომ უკრაინის ცის დაკეტვის შესახებ გადაწყვეტილების მიუღებლობის გამო, მოსახლეობაში უკრაინის NATO-ში შესვლის მომხრეთა რიცხვი 76%-დან 72%-მდე შემცირდა.