უკრაინის პრეზიდენტი ვოლოდიმირ ზელენსკი აცხადებს, რომ ქვეყანა არ აპირებს ტერიტორიული დათმობების განხილვას, მიუხედავად გარკვეული სიგნალებისა, რომლებიც აშშ-დან მოდის. მისი თქმით, უკრაინისა და ტრამპის ურთიერთობა გაგრძელდება, ისევე როგორც პარტნიორების მხარდაჭერა უკრაინის მიმართ.
„თუ აშშ-ის პრეზიდენტი კონსტრუქციულ დიალოგზე დამპატიჟებს, ჩავალ,“ – განაცხადა ზელენსკიმ, პასუხად ჟურნალისტის კითხვაზე, გეგმავს თუ არა ამერიკაში ვიზიტს.
უკრაინის პრეზიდენტის ძირითადი თეზისები:
„მე წარმოვადგენ ქვეყნის ინტერესებს, რომელიც დიდადაა დამოკიდებული მხარდაჭერასა და პარტნიორობაზე.“
„უკრაინა მზადაა აშშ-სთან მინერალების შესახებ შეთანხმება გააფორმოს, თუ უკრაინული პოზიცია იქნება გათვალისწინებული.“
„შეთანხმების საბოლოო ვერსია უკვე მზადაა და მინისტრებს შეუძლიათ მისი ხელმოწერა.“
„თუ შევთანხმდით, რომ შეთანხმება ჩვენი მხრიდან უნდა დაიდოს, ჩვენ მზად ვართ მის გასაფორმებლად. გულწრფელად მჯერა, რომ აშშ-ც მზად იქნება.“
უკრაინის პრეზიდენტმა ასევე ხაზი გაუსვა მშვიდობის მნიშვნელობას:
„უკრაინას სჭირდება მშვიდობა და არა სამუდამო ომი. სწორედ ამიტომ, ვამბობთ, რომ უსაფრთხოების გარანტიები ამ პროცესის მთავარი გასაღებია,“ – აღნიშნა მან ლონდონის სამიტის შემდეგ.
ზელენსკის თქმით, უკრაინა ევროპელ პარტნიორებთან ერთად ჩამოაყალიბებს საერთო პოზიციებს, რომლებიც შემდეგ წარედგინება აშშ-ს. მისი პრიორიტეტია სანდოობა, ხანგრძლივი მშვიდობა და სწორი შეთანხმება, რომელიც ომს დაასრულებს.
„ჩვენ ველით აშშ-ის დახმარებას, ხოლო თუ ის შეწყდება, ეს იქნება პუტინისთვის დახმარება. ამ დრომდე არ შეჩერებულა ამერიკის სამხედრო დახმარება, თუმცა საუბარია ადრე მიღებულ (ბაიდენის ადმინისტრაციის დროს) პაკეტებზე,“ – განაცხადა ზელენსკიმ.
