,
საქართველოს საკალათბურთო ნაკრების კაპიტანი და NBA-ის სამგზის ჩემპიონი, ზაზა ფაჩულია გაეროს მსოფლიო ტურიზმის ორგანიზაციის (UNWTO) ელჩად დაინიშნა. აღნიშნულ საპატიო თანამდებობაზე ზაზა ფაჩულია ორგანიზაციის გენერალურმა მდივანმა, ზურაბ პოლოლიკაშვილმა სან-ფრანცისკოში “გოლდენ-სტეიტ უორიორსის” მატჩზე წარადგინა. ქართველთან ერთად, UNWTO-ს ელჩის სტატუსი NBA-ის ყველა დროის ერთ-ერთმა საუკეთესო კალათბურთელმა, სტეფ კარიმაც მიიღო.
როგორც BMG-ისთვის მიწოდებულ მასალაში ვკითხულობთ, სპორტსმენებმა აღნიშნული წოდება საზოგადოების განვითარებისადმი შეტანილი წვლილისთვის მიიღეს. “სპორტულ კარიერაში მიღწეული წარმატება და საზოგადოების განვითარებისადმი ერთგულება ორივე მათგანს სამაგალითო ფიგურებად აქცევს. ეს ფაქტები კი, მთელს მსოფლიოში სპორტის ტურიზმის სარგებლიანობის პოპულარიზაციაზე დადებითად აისახება”, - განაცხადა გაეროს მსოფლიო ტურიზმის ორგანიზაციის გენერალურმა მდივანმა, ზურაბ პოლოლიკაშვილმა.
გლობალური ტურიზმის მმართველი ორგანიზაციის ელჩად დანიშვნას თავად ზაზა ფაჩულიაც გამოეხმაურა. კალათბურთელის თქმით, UNWTO-ს ელჩის სტატუსი მსოფლიოში სპორტის დადებითი გავლენის შესახებ ცნობიერების ამაღლების საშუალებას მისცემს. “მთელი ცხოვრება სპორტს მივუძღვენი და ზუსტად მესმის რა დადებითი გავლენის მოხდება შეუძლია მას როგორც ტურიზმზე, ასევე ზოგადად ადამიანების ცხოვრებაზე. ამიტომ ეს როლი ჩემთვის ძალიან სასიამოვნო და ამავე დროს საპასუხისმგებლოა. ორგანიზაციასთან ერთად ჩემს გამოცდილებასა და ცოდნას მაქსიმალურად გამოვიყენებ იმისთვის, რომ სამყაროში სპორტის დადებითი გავლენის შესახებ ცნობიერება კიდევ უფრო გაიზარდოს. ეს კი, დარწმუნებული ვარ მსოფლიოს ჯანსაღი კუთხით განვითარებას ძალიან დაეხმარება. ამ შესაძლებლობისთვის მადლობა მინდა გადავუხადო ჩემს კარგ მეგობარს - გენერალურ მდივან ზურაბ პოლოლიკაშვილს”, - განაცხადა ზაზა ფაჩულიამ.
გაეროს მსოფლიო ტურიზმის ორგანიზაციის სპორტის ელჩების მთავარ მიზანია ისეთი ინიციატივებისა და აქტივობების მხარდაჭერა, რომელიც ხელს უწყობს სპორტის დახმარებით ტურიზმის განვითარებას, კულტურათა შორის კავშირების გაღრმავებას და ამ ყველაფრის საფუძველზე მდგრად ეკონომიკურ განვითარებას. ზაზა ფაჩულია, სტეფ კარისთან და სხვა ელჩებთან ერთად, მთელი მსოფლიოს მასშტაბით, სწორედ მსგავსი ტიპის აქტივობებში ჩაერთვება. საინტერესოა, რომ მოქმედ ელჩებს შორის საკალათბურთო სამყაროს მხოლოდ ორი წარმომადგენელი ჰყავს, როცა ფეხბურთელებს შორის ისეთ სახელებს ვხვდებით, როგორიცაა ლიონელ მესი, ანდრეს ინიესტა, დიდიე დროგბა, იკერ კასილასი და ფერნანდო იერო.
ცნობისთვის გეტყვით, რომ იმავე მატჩზე, სადაც ზაზა ფაჩულია გაეროს მსოფლიო ტურიზმის ორგანიზაციის ელჩად წარადგინეს, ქართველმა კალათბურთელმა Money Ball-ით “გოლდენ-სტეიტ უორიორსის” ის მოთამაშეები დააჯილდოვა, რომელთაც NBA All Star-ის კვირეულში განსაკუთრებული შედეგი აჩვენეს.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
