,
საქართველოს საჯარო სამსახური 300 ათასამდე ადამიანს ასაქმებს, მათ ხელფასებზე წლიურად რამდენიმე მილიარდი ლარი გაიცემა, მათ შორის სამინისტროებში 2.5 მილიარდი ლარი, შტატგარეშე მოხელეებზე ნახევარი მილიარდი ლარი, საჯარო სკოლებში 700 მილიონ ლარამდე, ხოლო ადგილობრივ თვითმმართველობებში ასევე რამდენიმე ასეული მილიონი ლარის ანაზღაურებები. მთლიანობაში საჯარო სექტორის ხელფასები 3.5-4 მილიარდი ლარის ფარგლებშია.
საჯარო სექტორში მოხელეთა ხელფასები ხშირ შემთხვევაში არალოგიკურად არის განაწილებული და სუბორდინაციას არ ექვემდებარება. მაგალითად, პრემიერ-მინისტრის წლიური ხელფასი 45 ათასი ლარია, მინისტრის 75 ათასი ლარი, ხოლო მინისტრის ზოგიერთი მოადგილე 130 ათასი ლარის ხელფასსაც იღებს. ამ არალოგიკური გადანაწილების შეცვლას ისახავს მიზნად ახალი კანონი, რომელიც 2025 წლიდან ამოქმედდება და პრემიერის, მინისტრების და მათი მოადგილეების ხელფასებს სპეციალურ კოეფიციენტებზე დაყრდნობით გადაანაწილებს. მაგალითად, პრემიერის ხელფასი 168 ათას ლარამდე გაიზრდება, პრეზიდენტის ხელფასი 87 ათასი ლარიდან 168 ათას ლარამდე მოიმატებს, მინისტრის ხელფასი 75 ათასიდან 136 ათას ლარამდე, მინისტრის მოადგილის ხელფასი კი 116 ათასი ლარით განისაზღვრება.
უფრო მაღალია ანაზღაურებები დამოუკიდებელ მარეგულირებელ სტრუქტურებში. მაგალითად, სებ-ის პრეზიდენტის წლიური ანაზღაურება 244 ათასი ლარია, კომუნიკაციების კომისიის თავმჯდომარის 202 ათასი ლარია, ხოლო სემეკის თავმჯდომარის კი 191 ათასი ლარი.
თუმცა, ეს პირები საჯარო სექტორში ყველაზე მაღალანაზღაურებადი მოხელეები არ არიან. ქონებრივი დეკლარაციების თანახმად, მათზე გაცილებით უფრო მაღალი ხელფასები უცხოეთში საქართველოს ელჩებს აქვთ და ის არაერთი დიპლომატის შემთხვევაში წლიურ 200,000 ლარს აჭარბებს, ხოლო ზოგიერთ შემთხვევაში 300,000 ლარსაც. დეკლარაციების თანახმად, დიპლომატები ანაზღაურებებს დოლარსა და ევროში იღებენ.
| პოსტი | დიპლომატის სახელი | ხელფასი | ხელფასი ლარში |
| იაპონიაში საქართველოს ელჩი | თეიმურაზ ლეჟავა | $141,300 | 382,697 |
| კანადაში საქართველოს ელჩი და სამოქალაქო ავიაციის ორგანიზაციაში საქართველოს მუდმივი წარმომადგენელი | კახა იმნაძე | $117,526 | 318,307 |
| დანიის სამეფოში საქართველოს ელჩი | ნათელა მენაბდე | €100,098 | 292,794 |
| ირანის ისლამურ რესპუბლიკაში საქართველოს ელჩი | იოსებ ჩახვაშვილი | $95,616 | 258,966 |
| აზერბაიჯანის რესპუბლიკაში საქართველოს ელჩი | ზურაბ პატარაძე | $88,704 | 240,246 |
| მექსიკის შეერთებულ შტატებში საქართველოს ელჩი | ზაზა გაბუნია | $88,000 | 238,339 |
| უზბეკეთის რესპუბლიკაში საქართველოს ელჩი | ზურაბ აბდუშელიშვილი | $84,752 | 229,542 |
| ნიდერლანდების სამეფოში საქართველოს ელჩი | დავით სოლომონია | €77,532 | 226,787 |
| საქართველოს ელჩი იორდანიის ჰაშიმიტურ სამეფოში | ზაზა კანდელაკი | $82,528 | 223,519 |
| ყაზახეთის რესპუბლიკაში საქართველოს ელჩი | ნიკოლოზ ლალიაშვილი | $78,000 | 211,255 |
| ირლანდიაში საქართველოს ელჩი | გიორგი ზურაბაშვილი | €71,392 | 208,827 |
| ბულგარეთის რესპუბლიკაში საქართველოს ელჩი | ოთარ ბერძენიშვილი | €70,083 | 204,998 |
| ამერიკის შეერთებულ შტატებში საქართველოს ელჩი | დავით ზალკალიანი | $70,596 | 191,202 |
| ესტონეთის რესპუბლიკაში საქართველოს ელჩი | არჩილ ყარაულაშვილი | €63,156 | 184,736 |
| საგანგებო და სრულუფლებიანი ელჩი ლატვიის რესპუბლიკაში | თეა მაისურაძე | €62,375 | 182,451 |
წყარო:https://bm.ge
