ყულევის ნავთობტერმინალმა 2024 წლის საქმიანობის ანგარიში გამოაქვეყნა. დოკუმენტის თანახმად, გასული წლის განმავლობაში კომპანიის შემოსავალი 24 მილიონი ლარით, ანუ 23%-ით, 129.4 მილიონ ლარამდე გაიზარდა. ასევე გაიზარდა კომპანიის მოგებაც, რაც გასულ წელს 82.8 მილიონ ლარს შეადგენდა (ზრდა 30 მილიონი ლარი).

სოფელ ყულევში მდებარე ნავთობტერმინალი აზერბაიჯანის სახელმწიფო ნავთობკომპანია SOCAR-ის საკუთრებაშია.

ნავთობტერმინალი ფლობს 6 სარეზერვუარო პარკს და მისი ჯამური მოცულობა 402,000 კუბურ მეტრს შეადგენს.

ამასთან, როგორც ირკვევა, კომპანია გაფართოებას და ახალი რეზერვუარების დამატებას გეგმავს, რის შესახებაც კომპანიამ გარემოსდაცვითი ზედამხედველობის დეპარტამენტს სკოპინგის ანგარიში ოქტომბერში წარუდგინა. ოთხი ახალი რეზერვუარის ჯამური მოცულობა 80 000 მ³ იქნება.

ცნობისთვის, "შავი ზღვის ტერმინალი" 2008 წლიდან ოპერირებს. მისი რეზერვუარების ჯამური მოცულობა ამჟამად 402,000 კუბური მეტრია, შესაბამისად, ახალი რეზერვუარების დამატებით ჯამური მოცულობა 482,000 კუბურ მეტრამდე გაიზრდება. ტერმინალს ამჟამად წლიურად 10 მილიონი ტონა ნავთობპროდუქტების გატარება შეუძლია.

SOCAR-მა 2023 წელს ტერმინალის ინფრასტრუქტურის გაუმჯობესების მიზნით ფსკერის დაღრმავების სამუშაოები ჩაატარა. 2024 წელს განხორციელდა ნავსადგომის დაღრმავება, რაზეც მიახლოებით დაიხარჯა 12 150 000 ლარი. ნავსადგურის დაღრმავებითი სამუშაოები მიმდინარეობს 2025 წელსაც. 2023 წელთან შედარებით 2024 წელს გადაზიდული საქონლის რაოდენობა გაიზარდა დაახლოებით 16 %-ით.

მნიშვნელოვანია გარემოება, რომ ყულევის ტერმინალის მომიჯნავე მიწის ნაკვეთზე ქართული კომპანია "ბლექ სი პეტროლიუმი" ქვეყანაში პირველი სრული ციკლის ნავთობგადამმუშავებელი ქარხნის პროექტს ავითარებს. აღნიშნული ქარხნის მშენებლობა გასულ წელს დაიწყო და მისი საინვესტიციო ღირებულება 600 მილიონ დოლარს აღწევს. არსებული ინფორმაციით, ახალი ნავთობგადამმუშავებელი ქარხნისთვის ნავთობის ერთ-ერთ მიმწოდებლად სწორედ ყულევის ნავთობტერმინალიც განიხილება.

"2024 წელს დაიწყო და 2025-შიც მიმდინარეობს ნავთობგადამამუშავებელი ქარხნის მილების მოწყობის სამუშაოები, სადაც უკვე გაიხარჯა დაახლოებით 6 770 000 ლარი,"- ნათქვამია მმართველობით ანგარიშში.