,
რუსეთის პრეზიდენტი ვლადიმერ პუტინი ადასტურებს მოსკოვის გეგმებს, ოკუპირებულ სოხუმს გაუწიოს ყოველმხრივი დახმარება „სოციალურ-ეკონომიკური ამოცანების გადაჭრისა და ეროვნული უსაფრთხოების უზრუნველყოფის საკითხში“. კრემლის პრესსამსახურის ინფორმაციით, ამის შესახებ საუბარია რუსეთის პრეზიდენტის აფხაზეთის ე.წ. ლიდერის ასლან ბჟანიასადმი გაგზავნილ წერილში, რომელიც დაკავშირებულია „რესპუბლიკის“ გამარჯვებისა და დამოუკიდებლობის დღისადმი.
„ეს დღესასწაული განასახიერებს აფხაზი ხალხის მამაცობასა და მდგრადობას, რომელიც რთული ბრძოლით იცავს საკუთარი თავისუფალი, მშვიდობიანი ცხოვრების უფლებას“, - აცხადებს კრემლის ლიდერი.
ის ხაზგასმით აღნიშნავს, რომ „რუსეთ-აფხაზეთის ურთიერთობა ვითარდება მოკავშირეობის და სტრატეგიული პარტნიორობის საფუძველზე და დარწმუნებულია, რომ სამომავლო კონსტრუქციული ორმხრივი კავშირების გამყარება სხვადასხვა სფეროებში პასუხობს ორივე ქვეყნის მოქალაქეთა საფუძვლიან ინტერესებს“.
„გარდა ამისა, პუტინმა დაადასტურა რუსეთის მიზანი კვლავაც გაუწიოს ყოველმხრივი დახმარება აფხაზეთს აქტუალური სოციალურ-ეკონომიკური ამოცანების გადაჭრაში, ასევე უზრუნველყოს ეროვნული უსაფრთხოება“, - ნათქვამია წერილში.
ევროკომისიამ ვიქტორ ორბანის მმართველობის პერიოდში გაყინული 35 მილიარდი ევროს განბლოკვის მიზნით პიტერ მადიარს 27 პირობა წაუყენა, - ინფორმაციას Financial Times-ი ავრცელებს.
გამოცემის ინფორმაციით, უნგრეთის საპარლამენტო არჩევნებში გამარჯვების შემდეგ ევროკომისიამ პიტერ მადიარის პარტია „ტისასთან“ მოლაპარაკებები უკვე დაიწყო.
ევროკომისიის მიერ წამოყენებულ პირობებს შორის უნგრეთის მიერ რეფორმების განხორციელება და უკრაინასთან ურთიერთობების გაუმჯობესება შედის.
ევროპელი დიპლომატების განცხადებით, ევროკავშირის წევრი სახელმწიფოები ელიან, რომ პიტერ მადიარის მთავრობა ვიქტორ ორბანის მიერ უკრაინისთვის 90 მილიარდი ევროს სესხის გამოყოფასა და რუსეთის წინააღმდეგ სანქციების ახალ პაკეტზე დაწესებულ ვეტოს მოხსნის.
ასევე, ევროკომისიის წარმომადგენლის ცნობით, 35 მილიარდი ევრო გაყინულია უნგრეთის მოქმედი პრემიერ-მინისტრის ვიქტორ ორბანის მიერ აუცილებელ რეფორმებზე უარის, ასევე, კანონის უზენაესობის დარღვევისა და კორუფციის გაზრდის გამო.
გამოცემა წერს, რომ გაყინული თანხების განბლოკვის მიზნით უნგრეთის ახალ მთავრობას ისეთი წარსული გადაწყვეტილებების გაუქმება მოუწევს, რომლებსაც ევროკავშირი მისი წესების დარღვევად მიიჩნევს.
