ვეტერანების საქმეთა სახელმწიფო სამსახურმა ‘’არემჯის’’ წარმოების დირექტორს, კობა მენაბდიშვილს და უსაფრთხოების სამსახურის უფროსს, აფხაზეთის ომის ვეტერანს, ვლადიმერ კახეთელიძეს უმასპინძლა.
ვეტერანების საქმეთა სახელმწიფო სამსახურის დირექტორმა, ვლადიმერ იმნაძემ კომპანია ‘’არემჯის’’ ომისა და თავდაცვის ძალების ვეტერანების თანადგომისა და მათი მხარდაჭერისთვის მადლობა გადაუხადა და უწყების სამახსოვრო საჩუქრები გადასცა.
კობა მენაბდიშვილი, "არემჯის" წარმოების დირექტორი: " ჩვენ თითოეულ ადამიანს, რომელმაც საქართველოს ერთიანობისთვის ბრძოლაში მიიღო მონაწილეობა, უდიდესი პატივისცემით, უდიდესი მოწიწებით ვეპყრობით. ისინი არიან ქვეყნის ერთობის მაგალითი ჩვენი მომავალი თაობისთვის. მადლობა მინდა, გადაგიხადოთ კომპანიის დირექციის სახელით, თითოეული თანამშრომლის სახელით, რომ გვაქვს იმის საშუალება, ასეთი ბუმბერაზი ადამიანებისგან მივიღოთ მადლობის სიგელი. პირიქით, ჩვენ ვართ თქვენი მადლიერები და თქვენს გვერდით ვართ."
ვლადიმერ იმნაძე ვეტერანების საქმეთა სახელმწიფო სამსახურის დირექტორი: "ჩვენმა სტუმრებმა შეძლეს და თავიანთ საწარმოში დაასაქმეს 110 ვეტერანი. მიხარია, რომ დღეს მათ თავიანთი წვლილი შეაქვთ საქართველოს აღმშენებლობაში. დიდი მადლობა მინდა, გამოვუცხადო კომპანიის დირექციას, დაცვის სამსახურს, სადაც უმთავრესად არიან დასაქმებული ჩვენი ვეტერანები. მინდა, ყველა საწარმოს დირექტორს მაგალითად დავუყენო ეს ფაქტი და მოვუწოდო მათ, რომ ვეტერანებს მიაქციონ ყურადღება."