გორიჯვრის წმინდა გიორგის სახელობის ეკლესიაში საზეიმო წირვა დღეს ატენისა და გორის მიტროპოლიტმა აღავლინა. ტაძარში მოსასვლელი გზა დილიდან ტრანსპორტისთვის ჩაიკეტა. ეკლესიაში მისვლა მომლოცველებს მხოლოდ ფეხით შეუძლიათ. საგანგებო მდგომარეობის ფარგლებში გათვალისწინებული წესების დაცვას ადგილზე საპოლიციო ძალები უზრუნველყოფენ.

მეუფე ანდრიამ მრევლს გიორგობა მიულოცა. ჟურნალისტებთან საუბრისას მან ეკლესიის წევრების სტიგმატიზაციის მცდელობაზე ისაუბრა.

„ეკლესიის კლასტერის გამოყოფაზე, მგონი, ყველაფერი გარკვეულია. ვწუხვარ იმაზე, რომ ამ დღეების განმავლობაში ვხედავდით ეკლესიის წევრების სტიგმატიზაციის მცდელობასა და მოწოდებას. მე ასე ვაფასებ ამას. სამწუხაროდ, ამას ვხედავდით ჩვენი ქვეყნის მთავარ სახელმწიფო ორგანოში, პარლამენტში და ზოგადად, თანამდებობის პირებისგანაც, რაც მაკვირვებს, რადგან ამ ადამიანების ამომრჩევლები არიან ეკლესიის წევრებიც და ამგვარი შეფასება ვფიქრობ, მათ პოლიტიკურ მოუმწიფებლობაზე მეტყველებს“, – განაცხადა წირვის დასრულების შემდეგ გორისა და ატენის მიტროპოლიტმა, მეუფე ანდრიამ. მან ასევე ისაუბრა ყინწვისში მომხდარ შემთხვევაზე. მისი თქმით, თუ მედიასაშუალებებით გავრცელებული ინფორმაცია სიმართლეს შეესაბამება, სამწუხაროა, რომ მეუფე იობის ეპარქიის ზოგიერთმა სასულიერო პირმა არ გამოიჩინა სამღვდელო პირისთვის შესაბამისი ცხოვრების წესი.

„ჩემთვის ინფორმაცია მხოლოდ მედიასაშუალებებითაა ცნობილი. ვიტყვი ერთს, რომ გულწრფელად თანავუგრძნობ მეუფე იობს, თუ ეს ყოველივე არის სინამდვილე. სამწუხაროა, რომ მისი ეპარქიის ზოგიერთმა სასულიერო პირმა არ გამოიჩინა სამღვდელო პირისთვის შესაბამისი ცხოვრების წესი, სულიერება, არ გაუფრთხილდა ეკლესიას, მღვდელმთავარს და თქვენს პირში ჩააგდო მეუფე იობი“, – განუცხადა მეუფე ანდრიამ ჟურნალისტებს.

შეგახსენებთ, პროკურატურამ ყინწვისის მონასტრის მღვდელმსახურს ბრალდება 28 აპრილს წარუდგინა. მას გამოძიება განზრახ მკვლელობის მცდელობას და ცეცხლსასროლი იარაღისა და საბრძოლო მასალის მართლსაწინააღმდეგო შეძენა-შენახვა-ტარებას ედავება.

გამოძიების ინფორმაციით, 2020 წლის 20 აპრილს, საღამოს საათებში, გორის მუნიციპალიტეტის სოფელ რიეთის მიმდებარე ტერიტორიაზე, კ.კ.-მ ცეცხლსასროლი ავტომატური იარაღიდან, რომელიც მართლსაწინააღმდეგოდ შეიძინა და ინახავდა, ავტომანქანით მოძრავ ს.ჟ.-ს მიმართულებით რამდენიმეჯერ გაისროლა.

ყინწვისის მონასტრის მღვდელმსახურს დავით (კობა) კობაიძეს აღკვეთის ღონისძიების სახით პატიმრობა შეეფარდა